Ным IукIагъ

Урысые гвардием ишъолъыр къулыкъу ипащэ хэушъхьа­фы­кIыгъэ дзэ операцием хэлажьэрэм янэ зыIуигъэкIагъ.

Урысые гвардием Адыгэ Республи­кэмкIэ и ГъэIорышIапIэ ипащэу Дмитрий Зима ОМОН-у «Фыщт» зыфиIорэм иветеранэу, полицием имладшэ лей­тенантэу СултIан В. янэ Пщыжъхьаблэ щыIукIагъ.Офицерым къыфагъэуцугъэ пшъэ­рылъхэр хэушъхьафыкIыгъэ дзэ операцием щигъэцакIэхэзэ, уIагъэ къытыращэнэу хъугъэ, лIыхъужъныгъэу зэрихьагъэм фэшI къэралыгъо тын — бгъэхалъхьэу «За отвагу» зыфиIорэр ащ къыфагъэшъошагъ. ЛIыгъэ хэлъэу, Хэгъэгум иухъумэкIо шъыпкъэу икIалэ зэригъэсагъэмкIэ Дмитрий Зима рэзэныгъэ гущыIэхэр бзылъфыгъэм пигъохыгъэх. Джащ фэдэу яунагъокIэ сыд фэдэрэ IэпыIэгъу ящыкIагъэ зыхъукIэ, зыкъа­фагъэзэнэу риIуагъ.— УикIалэ илIыгъэ — зыхэт къулы­къушIэхэу Хэгъэгум фэ­шъып­къэнхэу гущыIэ зытыгъэхэм ящыс. Ащ фэдэ дзэкIолIхэм тарэгушхо ыкIи тилIыхъужъхэм яунагъохэм ящыкIэгъэ IэпыIэгъур ядгъэ­гъотыным тыфэхьазыр. ГъэIоры­шIапIэм ипчъэхэр шъощ пае сы­дигъокIи зэIухыгъэх, шъуиIо­фыгъо пэпчъ тынаIэ тедгъэтыщт, — хигъэунэфыкIыгъ полицием иподполковникэу Дмит­рий Зима.Нэужым Урысые гвардием ишъолъыр къулыкъу илIыкIохэр СултIан В. зыщеджэгъэ гурыт еджапIэм еблэгъагъэх. «Фыщтым» икомандир игуадзэу Заур Д. кIэлэегъэджэ купым гущыIэгъу фэ­хъугъ, мыщ щеджагъэхэм лIыгъэу зэра­хьагъэм ишIэжь къызэтегъэнэгъэным, къыткIэхъухьэрэ лIэужхэр патриотическэу пIугъэнхэмкIэ ахэм ящысэ мэхьанэ зэриIэр хигъэунэфыкIыгъ. Мы къулы­къум игъэзетэу «Урысые гвардиер непэ» зыфиIорэр еджапIэм ратыгъ, СултIан лIыгъэу зэрихьагъэр ащ итхагъ.ЗэIукIэгъур Урысые гвардиер илъэси 10 ыкIи хэбзэухъумэкIо дзэхэр илъэс 215-рэ зэрэхъугъэхэм афэгъэхьыгъагъ.