Мыгъэ Адыгеим, тихэгъэгу инэмыкI шолъырхэм афэдэу, ТекIоныгъэм и Мафэ щыхагъэунэфыкIы зыхъукIэ, щынэгъончъэным иамалхэр зэкIэ къыдалъытэщтых.
ШIэжь Iофтхьабзэу «МыкIодыжьыщт полкыр» пэIудзыгъэ шIыкIэ закъом тетэу рекIокIыщт. Урысые Iофтхьабзэм хэлэжьэнхэм пае лъэIу тхылъхэм яштэнкIэ непэ аужырэ маф.Сайтэу «https://2026.polkrf.ru/» зыфиIорэмкIэ, ВКонтакте (https://vk.com/polk_app), Одноклассники (https://ok.ru/apppolk) е МАКС-мкIэ (https://max.ru/polk_app_bot) 2026-рэ илъэсым жъоныгъуакIэм и 6-м нэс шIэжь Iофтхьабзэм хэлэжьэнхэ алъэкIыщт. Хэгъэгу зэошхом хэлэжьагъэхэм, ветеранхэм, партизанхэм, тылым Iоф щызышIагъэхэм, концлагерхэм адэсыгъэхэм, пыим ыштэгъэгъэ чIыпIэхэм арысыгъэхэм, зикIэлэцIыкIугъо зэо илъэсхэм атефагъэхэм афэгъэхьыгъэ сурэтхэмрэ къэбархэмрэ шъуиунэе кабинет ижъугъахьэх. ЖъоныгъуакIэм и 9-м сайтэу «2026.polkrf.ru» зыфиIорэм ыкIи телеэфирым чIыпIэ уахътэмкIэ мафэм сыхьатыр 12-м шIэжь Iофтхьабзэр ащырагъэжьэщт.«Республикэм щыпсэухэрэм сыкъяджэ цифрэ Iофтхьабзэу «МыкIодыжьыщт полкым» хэлэжьэнхэу, ятэхэу, ятэжъхэу, ятэжъ пIашъэхэу фронтми, тылми лIыгъэшхо ащызезыхьагъэхэр, лъэпкъхэм яшъхьафитныгъэ къэзыухъумагъэхэр джыри зэ агу къагъэкIыжьынхэу. Ахэр ары уи Хэгъэгу шIу зэрэплъэгъун, лIыхъужъныгъэ зэрэзепхьан фаемкIэ хэбзэшIухэм лъапсэ афэзышIыгъэхэр. Непэ ахэм якъорылъфхэмрэ япхъорэлъфхэмрэ Урысыем исуверенитетрэ ищынэгъончъагъэрэ къаухъумэзэ, хэушъхьафыкIыгъэ дзэ операциер зыщыкIорэ чIыпIэм а хэбзэшIухэр щылъагъэкIуатэх. ЛIыхъужъхэм псэемыблэжьныгъэу зэрахьагъэр тызэгъусэу къызэдэдгъэгъунэщт ыкIи къыткIэхъухьэрэ лIэужхэм тарихъ шъыпкъагъэр алъыдгъэIэсыжьыщт», — къыIуагъ Адыгеим и ЛIышъхьэу, партиеу «Единэ Россием» ишъолъыр къутамэ и Секретарэу КъумпIыл Мурат.