«Хъяр джэгунхэр» зыфиIорэ Iофтхьабзэу зыныбжь хэкIотагъэхэм атегъэпсыхьагъэр Мыекъуапэ щыкIуагъ.
Адыгеим ирайон зэфэшъхьафхэм къарыкIыгъэ купипшI республикэ стадионым щызэрэугъоигъ ыкIи анахь чанымкIэ зэнэкъокъугъэх. Ахэр Шэуджэн, Красногвардейскэ, Мыекъопэ, Теуцожь, Тэхъутэмыкъое, Кощхьэблэ, Джэджэ районхэм ыкIи Мыекъуапэрэ Адыгэкъалэрэ ялIыкIох.Джэгунхэм программэ гъэшIэгъон къафызэхагъэуцогъагъ: псауныгъэм игъэпытэнкIэ шIэгъэн фаер къизыгъэлъэгъукIырэ дэпкъ гъэзетым ишIын, зэнэкъокъу зэфэшъхьафхэр, адыгэ ыкIи нэмыкI къашъохэмкIэ мастер-классхэр. Анахь гъэшIэгъоныгъэхэм ащыщ илъэс 90-рэ зыныбжь Николай Власовым шъхьэкIэ зэрэуцурэ шIыкIэр къызэригъэлъэгъуагъэр. Ар ыкIи нэмыкIэу къыдэхъухэрэмкIэ ныбжь хэкIотагъэ зиIэ хъулъфыгъэр Iофтхьабзэм хэлэжьагъэхэм къадэгощагъ.ПстэумкIи зыныбжь хэкIотэгъэ нэбгырэ 200 фэдиз «Хъяр джэгунхэм» ахэлэжьагъ. Ныбжьым къызэрэзэкIимыгъакIохэрэр лIэуж нахьыжъхэм джыри зэ къаушыхьатыгъ. Адыгэ шэн-хабзэм тетэу удж хъураир Iофтхьабзэм кIэух дахэ фэхъугъ. Зыгъэчэфыгъэхэ зэхашIэхэм ямызакъоу, шIухьафтынхэри нэбгырэ пэпчъ къылэжьыгъэу ядэжь кIожьыгъэ.«Хъяр джэгунхэр» зыфиIорэ Iофтхьабзэр социальнэ проектэу «Хъярым ыныбжь» зыфиIорэм къыдыхэлъытагъэу рекIокIыгъ. АР-м игранткIэ гъэцэкIагъэ хъугъэ.