Къэралыгъо IэпыIэгъур къызфагъэфедэ

Зигъот мэкIэ унагъохэм IэпыIэгъу афэхъугъэнымкIэ программэу «Социальнэ зэзэгъыныгъэр» Джэджэ районым зэрэщагъэцакIэрэр «Адыгэ макъэм» зэригъэшIагъ. IофшIэнымкIэ ыкIи цIыфхэр социальнэу къэухъумэгъэнхэмкIэ Гупчэу районым щыIэм ипащэу Оксана Шикенинам гущыIэгъу тыфэхъугъ.

Мы къэралыгъо IэпыIэгъур къызе­жьакIэм ащ фэдэ шIуагъэ къытэу цIыфхэм агъэфедэн Iоу ашIагъэп ыкIи ыпэкIэ шапхъэу пылъыгъэр тхьамыкIэныгъэр дэгъэзыжьыгъэныр ары. Джыри а пшъэрылъыр къэнагъ, ау ар проектэу «Сабыибэ зэрыс унагъу» зыфиIорэм хагъэхьажьи, кIэлэцIыкIухэр зиIэ унагъо­хэу зигъот узэрыпсэун плъэкIыщт ахъщэ анахь макIэм нэмысыхэрэм адеIэнхэм атегъэпсыхьагъэ хъугъэ. Пособиеу къа­тыхэрэм мы социальнэ зэзэгъыныгъэр зэратекIырэр цIыфым ежь-ежьырэу зиIыгъыжьын амал зэрэритырэр ыкIи тапэкIэ унагъом хахъоу иIэр нахьыбэ ышIыныр ары.«Социальнэ зэзэгъыныгъ» зыфиIорэ къэралыгъо IэпыIэгъум къыдыхэлъытэгъэ ахъщэр зыпэIубгъэхьащтыр лъэныкъо гъэнэфагъэхэм ателъытагъ: унэе сатыу гъэпсыгъэныр — сомэ мин 350-м нэс; унэе хъызмэт зэхэщэгъэныр — сомэ мин 200-м нэс; IофшIэпIэ чIыпIэ улъы­хъуныр — Iоф зышIэрэ цIыфыр зэрыпсэун ылъэкIыщт анахь ахъщэ макIэу агъэнэфагъэр мэ­зи 4-м къыкIоцI къыра­тыщт; щыIэныгъэм чIыпIэ зэжъу ригъэуцогъэ уна­гъор къизыщыщтыр — Iоф зы­шIэрэ цIыфыр зэрыпсэун ылъэкIыщт анахь ахъщэ макIэу агъэнэфагъэр мэзи 6-м къыкIоцI е фаемэ зэтыгъоу къыратыщт.

— 2025-рэ илъэсым Джэджэ районым щыпсэухэрэм социальнэ зэзэгъы­ныгъи 101-рэ адэтшIыгъ, ахэм сомэ 22098057-рэ апэIухьагъ. Мэлылъфэ­гъум и 1-м ехъулIэу нэбгырэ 19-мэ къэралыгъо IэпыIэгъур яттыгъ. IофшIэн лъы­хъоу нэбгыри 7, унэе сатыу ыгъэпсымэ зышIоигъо нэбгыри 6 ыкIи унэгъо хъызмэт зэхищэнэу 6 къытэолIагъ, — хигъэунэфыкIыгъ Оксана Шикенинам.Социальнэ IэпыIэгъур цIыфым къыратыным пае игъот зэрэмакIэр къыгъэ­шъыпкъэжьын фае. Ащ ыуж лъэIу тхы­лъыр зыщитыгъэм ыпэрэ мазэм къыщыублагъэу мэзищым къыкIоцI хахъоу иIэр къалъытэ. Нэужым игухэлъхэр къизыIотыкIырэ проектыр цIыфхэм яфэIо-фашIэхэр зыгъэцэкIэрэ социальнэ къулыкъум рихьылIэнышъ, зэкIэ къыфагъэ­хьазырыщт.— Тирайон къутырыбэ ит, ахэм Iоф­шIэпIэ чIыпIэхэр афэмакIэх. Арышъ, цIыфхэр анахьэу унэгъо хъызмэтым, чIыгулэжьыным пылъых, малинэр, цумпэр къагъэкIы, щагу бзыухэр ахъу. Сэ зэрэслъытэрэмкIэ, мы IэпыIэгъур унагъомкIэ амалышIу. Сыда пIомэ, ащ процент техъорэп, зэкIэбгъэкIожьыни ищыкIагъэп. Шапхъэу пылъ закъор, ар тэрэзэу зэрагъэфедагъэр тикъулыкъу еуплъэкIужьы, — къыхигъэщыгъ Оксана Шикенинам.ЗыкIэхъопсыщтыгъэр къыдэхъугъСоциальнэ IэпыIэгъур мы аужырэ илъэсхэм республикэм дэгъоу щагъэфедэ хъугъэ, бэхэм унэе Iоф къызэIуахынымкIэ егъэжьэпIэшIу афэхъу. Ащ ишIуагъэ­кIэ станицэу Джаджэм щыщ Виктория Борзовам зыкIэхъопсыщтыгъэр къыдэ­хъугъ, псэупIэм игупчэ Iалъмэкъхэр зыщищэн тучан къыщызэIуихыгъ.— ЯтIонэрэу тучан къызэIусэхы, ыпэрэм сиIоф къикIыгъэп. Ахъщэу хэслъхьащтыр сфызэтемыгъэуцоу зэфэсшIыжьынэу хъугъагъэ. Ау икIэрыкIэу къызэрэзэIусхыжьыщт гупшысэр сыдигъуи зыдэсIыгъыгъ, хэкIыпIэхэм салъы­хъугъ. Мы IэпыIэгъур къызэратыгъэ цIыф горэу сызIукIагъэм ащ шIуагъэу пы­лъыр зэкIэ къысфиIотагъ. Нэужым къэралыгъо фэIо-фашIэхэм япорталкIэ сызщыпсэурэм щыIэ социальнэ къулыкъум зыфэзгъэзагъ. Ащ иIофышIэхэм псынкIэу тхылъхэр сфагъэхьазырыгъэх ыкIи унэе сатыур езгъэжьэнымкIэ IэпыIэгъоу сомэ мин 350-рэ къысатыгъ. 2023-рэ илъэсым имэзае тучаныр къызэIусхыжьыгъ, бэшIагъэу сызкIэхъопсыщтыгъэ гухэлъыр джы къыздэхъугъ, сэгушIо, — хигъэунэфыкIыгъ Викторие.ТигущыIэгъу къызэрэхигъэщыгъэмкIэ, уиунэе сатыур ебгъэжьэнымкIэ мы къэ­ралыгъо IэпыIэгъур амалышIу. Ежь иахъщэ закъокIэ ар къызэIуихын ылъэ­кIыщтыгъэп. Бзылъфыгъэм ыугъоигъэ ахъщэр тучаным ыцIэ тетхэгъэным, иIухьапIэ, итеплъэ зэтегъэпсыхьэгъэнхэм ыкIи рекламэ шIыгъэным тыригъэкIо­дагъ. Социальнэ зэзэгъыныгъэм къыкIэкIогъэ ахъщэм товархэр, ахэр зытырилъхьащт мэкIайхэр, зыпилъэщтхэр къырищэфыгъэх.Мы щэпIэ чIыпIэм пкъыгъо 200 фэдиз, Iэлъмэкъ къопсым е пшъэм адапхэхэрэр, щэтрэхэр чIэплъэгъощтых.— Iэлъмэкъ 25-кIэ езгъэжьэгъагъ, джы мары шъолъэгъу чIэлъыр зыфэдизыр. СиIоф лъыкIуатэу ригъэжьагъ. Джыдэдэм телъхэр шъом хэшIыкIыгъэх, фирмэ дэгъум къедых. Ау ахэр цIыфым бэрэ ыщэфышъущтэп. Ар къыдэслъытагъэу «бюджетнэ» зыфаIорэм фэдэхэр къасщэхэ сшIоигъу. Джащ фэдэу еджапIэм, спортым ащагъэфедэрэ рюкзакхэр, лъэпэдхэр сщэрэ товархэм ахэзгъэхьанхэ гухэлъ сиI. Ахэр нахь зэфэшъхьафхэ къэс, щэфакIохэри нахьыбэу къысэолIэщтых, — къеIуатэ Виктория Борзовам.Бзылъфыгъэ ныбжьыкIэм тучан къызэIуимыхызэ, Адыгэ къэралыгъо университетым экономикэмкIэ ифакультет чIэхьэгъагъ. Ау унагъо ихьи, сабыищ къызыпэфэм, къыухыжьынэу хъугъэп. НахьыжъитIур ублэпIэ классхэм ащеджэх, анахьыкIэр – кIэлэцIыкIу IыгъыпIэм чIэс. Викторие зэрилъытэрэмкIэ, унэе Iоф зэришIэрэм ишIуагъэкIэ зыщыфаем чIэкIын ыкIи къычIэхьажьын, исабыйхэм зэрэфаеу ынаIэ атыригъэтын елъэкIы.Iэшъынэ Сусан.