ТхэквондомкIэ Урысыем и Кубок икъыдэхынрэ Урысые зэнэкъокъурэ къалэу Москва щыкIуагъэх.
Къэралыгъом ишъолъыр 33-мэ къарыкIыгъэ спортсмен 1900-мэ заушэтыгъ.Мэфищрэ кIогъэ Iофтхьабзэр мы спорт лъэпкъыр зыгу рихьыхэрэмкIэ мэфэкI шъыпкъэ хъугъэ. Адыгэ Республикэр нэбгырэ 14-мэ къагъэлъэгъуагъ, купым ипэщагъ тренерэу Елена Самоделкинар. Тиспортсменхэм гъэхъэгъэшIухэр ашIыгъэх, тхэквондом хэхъоныгъэ ышIыным тишъолъыр мэхьанэшхо зэрэщыратырэр джыри зэ къагъэшъыпкъэжьыгъ.
Спортым имастер хъунымкIэ кандидатэу Эдгар Волошковыр килограмм 62-м нэс къэзыщэчыхэрэм якуп хэтыгъ ыкIи лъэныкъоу «спарринг» зыфиIорэм ятIонэрэ чIыпIэр къыщыдихыгъ. Мы купым нэбгырэ 45-мэ зызэрэщаушэтыгъэр къыдэплъытэмэ, тикIалэ гъэхъэгъэшIу зэришIыгъэр нафэ. Апэрэ нахьыжъ разряд зиIэ Даниил Качура анахь къахэщыгъэхэм ащыщ. Ар илъэс 12 — 13 зыныбжьхэм якуп хэтыгъ ыкIи лъэныкъоу «туль» зыфиIорэмкIэ чемпион хъугъэ. Джащ фэдэу мы спортсменым лъэныкъоу «спаррингымкIэ» джэрз медаль къыфагъэшъошагъ. Апэрэ спорт разряд зиIэ Дмитрий Жигулевым ухьазырыныгъэ дэгъу къыгъэлъэгъуагъ, тыжьын медалитIу къыхьыгъ.Тиспортсмен ныбжьыкIэхэр ыпэкIэ лъыкIотэнхэмкIэ, текIоныгъакIэхэр къыдахынхэмкIэ мыщ фэдэ зэнэкъокъухэм мэхьанэшхо зэряIэм щэч хэлъэп. Ахэм ыкIи зыгъасэхэрэм тафэгушIо, тапэкIи Адыгеим ыцIэ дахэкIэ рарагъэIонэу, медалыкIэхэр къахьынхэу афэтэIо.