Ныбэ А.
АР-м ыкIи Пшызэ шъолъыр культурэмкIэ язаслуженнэ IофышIэу Хэшх Аслъан ишIэжь фэгъэхьыгъэ концерт лъэпкъ культурэхэмкIэ Гупчэу ПсышIуапэ дэтым щыкIуагъ.
Ар къызыхъугъэр илъэс 90-рэ зэрэхъугъэр Iофтхьабзэм иушъхьагъу хъугъэ.Адыгэ культурэр ыкIи шэн-хабзэхэр зыпэблагъэхэу, уасэ афэзышIыхэрэр ащ зэхищагъэх. Лъэпкъ кIэным икъэухъумэнрэ изегъэужьыжьынрэ зищыIэныгъэ пэIузыгъэхьэгъэ цIыфым фэгъэхьыгъэ гущыIэ фабэхэр къыщаIуагъэх. Пчыхьэзэхахьэр къагъэдэхагъ творческэ купхэмрэ орэдыIохэмрэ. Ахэр: адыгэ къашъохэмкIэ ансамблэу «Шапсыгъ» зыфиIоу Тэрчыкъо Муратрэ Бибэрэ зипащэхэр, Гъырбэ Саидэ зипэщэ купэу лъэпкъ мэкъэмэ Iэмэ-псымэхэмкIэ ансамблэу «Насыпыр», адыгэ культурэм и Гупчэ иорэдыIохэу ХъокIон Люси, Нэпсэу Саидэ, Тэрчыкъо Асана ыкIи искусствэхэмкIэ кIэлэцIыкIу еджапIэу купэу Хьахъу Саидэ ригъаджэхэрэр.— Бэрэ ыкIи дэгъоу концертым зыфэдгъэхьазырыгъ, сыда пIомэ тэркIэ шъхьаIэу щытыгъэр ар редгъэкIокIын къодыер арэп — ифэшъуашэу Хэшх Аслъан ишIэжь дгъэлъэпIэныр, Iофэу ышIагъэр, культурэм иIахьышIоу хилъхьагъэр къэдгъэлъэгъоныр ары, — къыIуагъ адыгэ культурэм и Гупчэ ипащэу Гъырбэ (Хэшх) Сурэт.Хэшх лIакъом илIэужхэм зэIэпахызэ хыIушъо адыгэхэм якультурэ икъэухъумэнрэ изегъэужьыжьынрэ зыдэлажьэхэрэр илъэсишъэм къехъугъ. Лъэпкъ кIэныр къэуухъумэн зэрэфаем ахэр ищысэх. Арышъ, концертым ихьатыркIэ Хэшх Аслъан ишIэжь агъэлъэпIэгъэ къодыеп — лъэпкъ культурэм имэфэкI фэдэу рагъэкIокIыгъ ыкIи ащ имэхьанэ джыри зэ къыхагъэщыгъ.