КаратэмкIэ Урысые зэнэкъокъухэр мэлылъфэгъум и 16-м къыщегъэжьагъэу и 21-м нэс къалэу Санкт-Петербург щыкIуагъэх.
Къэралыгъом ишъолъыр 42-мэ къарыкIыгъэ спортсмен 2900-рэ фэдизмэ заушэтыгъ. Адыгэ Республикэр нэбгыри 5-мэ къагъэлъэгъуагъ.Тренерхэу Владимир Васильченкэм, Никита Ивахненкэм, Пэко Алихъан ыкIи Виталий Сердюченкэм агъэсэрэ кIалэхэм гъэхъэгъэшIухэр ашIыгъэх. Ахэм дышъэ медали 2, зы тыжьын къахьыгъ. Пэрытныгъэр аубытыгъ Пакохэу Самиррэ Астемиррэ. Хьамдэхъу Ислъам ятIонэрэ чIыпIэр къыдихыгъ.Турнирым изэфэхьысыжьхэмкIэ тикаратистхэм спорт разрядхэр къафагъэшъошэщтых.Къэралыгъо зэнэкъокъухэу Налщык щыкIощтхэм ыкIи Урысыем ипервенствэу жъоныгъуакIэм и 12-м къыщегъэжьагъэу и 17-м нэс къалэу Орел щызэхащэщтым ахэлэжьэнхэу тиспортсменхэм загъэхьазыры.ТикIалэхэм ыкIи ахэр зыгъасэхэрэм тафэгушIо, джыри нахь лъэгэпIэ инхэм анэсынхэу, республикэм ыцIэ дахэкIэ рарагъэIонэу афэтэIо.