Адыгэ Республикэм Iоф щызышIэрэ гъэсэныгъэм иорганизациехэм ащеджэхэрэм азыфагу щызэхащэгъэ Спартакиадэм къыдыхэлъытагъэу баскетболымкIэ зэнэкъокъу рагъэкIокIыгъ.
Нэбгырэ щырыщ зыхэт командэхэр олимпийскэ резервым испорт еджапIэу В. С. Максимовым ыцIэ зыхьырэм щызэIукIагъэх.Зэнэкъокъум ишъолъыр едзыгъо кIалэхэр зыхэт команди 8-рэ пшъашъэхэр къэзыгъэлъэгъорэ команди 7-рэ хэлэжьагъ. Зы ешIэгъур такъикъи 8-м телъытэгъагъ.КIалэхэм якомандэхэм язэнэкъокъу икIэух едзыгъо щызэIукIагъэх Мыекъуапэрэ Красногвардейскэ районымрэ. Республикэм икъэлэ шъхьаIэ илIыкIохэм ешIэкIэ дахэ къагъэлъэгъуагъ, 7:3-у текIоныгъэр къыдахи, чемпион хъугъэх. Тэхъутэмыкъое районыр 6:0-у Мыекъопэ районым текIуи, ящэнэрэ хъугъэ.Пшъэшъэ командэхэм яфинал щызэIукIагъэх Мыекъопэ ыкIи Тэхъутэмыкъое районхэм ялIыкIохэр. ЕшIэгъур гъэшIэгъонэу, узIэпищэу кIуагъэ, аужырэ такъикъым нэс текIоныгъэр къыдэзыхыщтыр къэшIэгъоягъ. Мызыгъэгум Мыекъопэ районыр нахь лъэшыгъ, ащ апэрэ чIыпIэр фагъэшъошагъ. Джэджэ районыр 2:1-у Шэуджэн районым текIуи, ящэнэрэ хъугъэ.