Гурыт еджапIэхэм кIэлэегъаджэу Iоф ащызышIэхэрэр зэримыкъурэр сыдигъокIи гумэкIыгъо шъхьаIэу щыт. Мы аужырэ илъэсхэм къэралыгъо программэ зэфэшъхьафхэм яшIуагъэкIэ ныбжьыкIэу къакIохэрэр нахьыбэ хъугъэх.

ИлъэсыкIэ еджэгъум ехъулIэу къуаджэу ШэхэкIэй дэт гурыт еджапIэу N 90-м специалист ныбжьыкIэ къаштагъ. Зихэкужъ къэзыгъэзэжьыгъэ, Сирием къикIыжьыгъэ унагъом Махъош Гучан къихъухьагъ. Къэрэщэе-Щэрджэс къэралыгъо университетыр ащ къыухыгъ, инджылызыбзэкIэ кIэлэегъэджэ сэнэхьат иI.

Пшъэшъэжъыер 1999-рэ илъэ­сым Мыекъуапэ къыщыхъугъ. Илъэс нахь ымыныбжьэу янэ-ятэхэр Сирием кIожьынхэ фае хъугъэ, ау 2012-рэ илъэсым ятэжъ пIашъэхэм яхэкужъ къагъэзэжьыгъ.

— Тыунэгъо Iужъу, — къеIуа­тэ Гучан. — Сятэ псэолъэшIыным фэгъэзагъэу Черкесскэ Iоф щешIэ, сянэ къалэу Краснодар арапыбзэр щарегъашIэ, сшыпхъунахьыжъ унагъо ихьагъэу Налщык щэпсэу, сшы Краснодар щэпсэу ыкIи Iоф щешIэ, ятIонэрэ шыпхъур къуаджэу Пэнэхэс дэс, езыгъэжьэгъэкIэ сценарист, актрис. Режиссерэу КIэныбэ Динэ игъусэу ашIыгъэ картинэу «КъыткIэныгъэм икъутаф» зыфиIорэм гъэрекIо щыIэгъэ Дунэе фестивалым текIоныгъэ къыщыдихыгъ.

Гучан урысыбзэр, адыгабзэр, арапыбзэр, инджылызыбзэр дэ­гъоу ешIэх нахь мышIэми, Iоф­шIэн ымыгъотэу щысыгъ. Янэ-ятэхэм апэчыжьэу IофшIапIэр къыгъотыгъэми, чIыпIэм шIэхэу есагъ. Къуаджэм щыпсэухэрэр къы­фэчэфыхэу къыпэгъокIыгъэх.

— ЗэкIэми сафэраз. КIэлэегъэджэ коллективыр къыспэгъо­кIыгъ, еджапIэм пэмычыжьэу сызыщыпсэущтыр къысфагъо­тыгъ, дэгъоу къысфыщытых. Къуаджэр лъэшэу сыгу рихьыгъ, чIыопсыр дахэ, щыпсэухэрэр цIыфышIух. КIэлэцIыкIухэм Iоф адэсшIэнэу бэшIагъэ сызыфаер, инджылызыбзэр зэрашIогъэшIэ­гъо­ным сегъэгушIо. Апэрэ ма­фэхэр къиныгъэх нахь мышIэми, сесагъ, кIэлэеджакIохэм сагуры­Iуагъ.

Гучан Шъачэ IофышIэ зэрэ­кIуа­гъэр инэу ягуапэ хъугъэ «Адыгэ Хасэм» итхьаматэу Чачыхъу Мэджыдэрэ ТОС «Кичмай» зыфиIорэм и Совет ипащэу ЛIыф Хъалидэрэ. Мыхэр къыфэгушIуагъэх, гъэхъэгъэшIу­хэр ышIынхэу къыфэлъэIуагъэх. Ныбэ Анзор.

Сурэтым итхэр: ЛIыф Хъалидэрэ КIакIыхъу Мэджыдэрэ Гучан къыготых.