Тиныдэлъфыбзэ гущыIэ мин зэфэшъхьафыбэу зэхэт. Гъэсэныгъэм ишапхъэхэмкIэ ахэм бэдэд къяпIолIэн плъэкIыщтыр, ау гъэзет нэкIубгъом ахэр ифэщтхэп.

ГущыIэ федэр – дэгъу. ГущыIэ фабэр – IэшIу. ГущыIэ зафэр – мафэ. ГущыIэ сакъыр – псау. ГущыIэ макIэр – Iуш. ГущыIэ шъабэр – бэрэчэт. ГущыIэ дахэр – хые. ГущыIэ псапэр – хьалэл. ГущыIэ гуаор – дэи. ГущыIэ чъыIэр – Iае. ГущыIэ хафэр – гомыIу. ГущыIэ дысыр – сымадж. ГущыIэ ныкъор – дымыIу. ГущыIэ зандэр – емыкIу. ГущыIэ мышъомылыр – лые. ГущыIэ бзаджэр – хьэрам.

ЦIыф къызэрыкIоу бзэр зыгъэфедэу зыIулъым, гущыIэм идахэрэ идэгъурэ, иIаерэ идэйрэ къыIорэ псалъэм елъытыгъэу егъэфедэх. Ар хэти ешIэ, ау жабзэр къабзэу, псалъэр псапэу хэти гущыIэшъурэп.

ГущыIэ дэим, гуаом цIыфыр ыукIын ылъэкIыщт, ГущыIэ дэгъум, гуапэм цIыфыр еIэты, кIуачIэ къыреты, щегъаIэ. Ащ ищысэу къэсэтых мы сатыр­хэр:

УигущыIэ дахэмэ, «гущыIэ дахэм блэр гъуанэм къырещы» — еIо адыгэ гущыIэжъым, ау о цIыфхэу узхэт­хэу, уздыщыIэхэу, узышIэхэрэм дахэкIэ агу уилъын. Ар къэлэжьыгъошIоп, ау ари насыпыгъ. Гъогу мэфэ, гъогу зэфэ, гъогу тэрэзым урыкIонэу уфаемэ, уигущыIэ фэсакъ! УмыIуапхъэ умыIо. ПцIы умыусы. Бзэгу умыхьы! УиIуагъэ уемып­цIэжь. ЦIэцIэным зыдемыгъэхьых. Iоры­жъорым – мышъо-мылыр ишапхъ. Зи­Iотэгъур блэмыгъэкI. ЦIыфыр псаузэ ифэшъошэ дахэр, дэгъур еIу е фаIу. IорыIуати, IурыIупчъи зигъэгъус. Пшъхьэ ифедэ зэгъашIэ, имыфедэмэ, умыIохъу, жэр ухъумэ.

ГущыIэ бзаджэу хьарамыр цIыфым иIэкIыбэу, гущыIэу хьалэлыр иныбджэгъоу хэти щыIэнэу фэсэIо. Зыгу къабзэу, хьалэлым игъогуи къыфэпсынкIэщт, игугъи дэгъоу къыдэхъущт.

Хъут Сар.