Гъэфэбэгъу лъэхъаным пстэури фэхьазырыщт
Адыгеим и ЛIышъхьэу КъумпIыл Мурат экологическэ, технологическэ, атомнэ надзорымкIэ Федеральнэ къулыкъум (Ростехнадзорым) и Темыр-Кавказ гъэIорышIапIэ ипащэу Дмитрий Масловым Адыгэ Республикэм и Правительствэ зычIэт унэм тыгъуасэ зэIукIэгъу щыдыриIагъ.
Республикэм ипсэупIэ-коммунальнэ хъызмэт ипредприятиехэр 2021 — 2022-рэ илъэсхэм ябжыхьэ-кIымэфэ лъэхъан зэрэфэхьазырхэм ахэр тегущыIагъэх.
ЗэIукIэгъум хэлэжьагъэх Адыгэ Республикэм и Премьер-министрэу Геннадий Митрофановыр, Адыгэ Республикэм экономикэ хэхъоныгъэмрэ сатыумрэкIэ иминистрэу Шэуджэн Заур, Адыгэ Республикэм псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэ игуадзэу Лафышъэ Рэмэзан.
Гъэфэбэгъу лъэхъаныр къэблагъэ зэхъум фабэр аIэкIэзыгъэхьэрэ предприятиехэм уплъэкIунэу зэхащагъэхэм якIэуххэм Дмитрий Масловыр къатегущыIагъ. Ащ къызэриIуагъэмкIэ, ЖКХ-м ипредприятиехэм уплъэкIунхэм якIэуххэмкIэ актхэр аратыгъэх. ЩыкIагъэу къафалъэгъугъэхэр тIэкIу-тIэкIузэ ахэм дагъэзыжьых. Гидротехническэ псэуалъэхэмкIэ республикэм пшъэрылъхэр дэгъоу зэшIуихыгъэх — зыми фэмыгъэзэгъэ ащ фэдэ псэуалъэхэр Адыгеим итхэп.
Адыгэ Республикэм и Премьер-министрэ къызэриIуагъэмкIэ, гъэстыныпхъэ-энергетическэ комплексым ипредприятиехэм 2021 — 2022-рэ илъэсхэм ягъэфэбэгъу лъэхъан изыфэгъэхьазырын джыдэдэм аухы. Адыгэ Республикэм псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ и Министерствэ къызэритыгъэмкIэ, Iоныгъом и 1-м ехъулIэу псэупIэ-коммунальнэ комплексым ипсэуалъэхэм япроцент 95-рэ фэдизмэ гъэфэбэгъу лъэхъаным зыфагъэхьазырыгъагъ. Чъэпыогъум и 1-м ехъулIэу предприятиехэр зэкIэ гъэфэбэгъу лъэхъаным фэхьазырыщтых.
«ПсэупIэ-коммунальнэ хъызмэтым ипредприятиехэм ялIыкIохэм мы IофшIэным мэхьанэшхо зэриIэр къагурыIон, пIэлъэ кIэкIкIэ щыкIагъэхэр дагъэзыжьынхэ, гъэфэбэгъум зэрэфэхьазырхэмкIэ паспорт къыдахын, гъэфэбэгъу лъэхъаныкIэм игъом техьанхэ фае», — къыIуагъ КъумпIыл Мурат.
Шъугу къэтэгъэкIыжьы республикэм щаухэсыгъэ планым диштэу гъэфэбэгъу лъэхъаным котельнэ 257-р, газрыкIопIэ километрэ мини 3-м ехъур, псыIыгъыпIэ 319-р, псырыкIопIэ километрэ мини 2,44-р, фэтэрыбэу зэхэт унэ 1748-р зэрэфагъэхьазырхэрэр. Чъэпыогъум и 15-м нэс гъэфэбэгъу лъэхъаным зэрэфэхьазырхэмкIэ муниципалитетхэм паспортхэр къыдахын фае.
Адыгэ Республикэм и ЛIышъхьэ ипресс-къулыкъу