Коронавирусым пэуцужьырэ вакцинэм ихэлъхьан епхыгъэ Iофтхьабзэр Урысыем ишъолъыр пстэуми ащэкIо. Iоныгъом и 22-м къытIэкIэхьэгъэ къэбархэм къызэрагъэлъагъорэмкIэ, Адыгеим вакцинэм иапэрэ Iахь нэбгырэ мини 114563-мэ, ятIонэрэ Iахьыр нэбгырэ 99862-мэ афашIыгъ.

Адыгеим псауныгъэр къэ­ухъумэгъэнымкIэ и Министерствэ къызэритыгъэмкIэ, мы узым пэуцужьырэ вакцинэу Адыгеим щыIэхэр «Спутник V» ыкIи «Спутник Лайт» зыфи­Iохэрэр ары.

Вакцинацием епхыгъэ Iоф­тхьабзэм чанэу хэлэжьагъэхэм ащыщых хэбзэухъумэкIо органхэм яIофышIэхэр. Коронавирусым пэуцужьырэ прививкэр языгъэшIыгъэ Адыгеим и Къэралыгъо автоинспекцие пропагандэмкIэ иотдел ипащэу Бзэджэжъыкъо Мурат гущыIэгъу тыфэхъугъ. Нэбгырабэмэ ядунай языгъэхъожьыгъэ зэпахырэ узым вакцинэм ишIуагъэкIэ щыухъумагъэхэ хъунэу елъытэ.

— Коронавирусым тиунагъокIэ лъэшэу тигъэсымэджагъ, — къеIуатэ тигущыIэгъу. — Антителахэр джыри зэрэтиIэхэ пэтзэ сишъхьагъуси, сикIэлитIуи прививкэр ядгъэшIыгъ. Ащ узым нахь тыщиухъумэнэу тэгугъэ. ТиIоф­шIэнкIэ цIыфыбэмэ тахэт, ахэм япсауны­гъэкIи ящынэгъончъагъэ, сяни ыныбжь хэкIотагъэу унэм тызэрэзэдисыр къыдэтлъыти, ар хэкIыпIэу къыхэтхыгъ.

Бзэджэжъыкъо Мурат къыхегъэщы вакцинациер егъэзыгъэ Iоф хэлъэу зэрэщымытыр, ау коронавирусым тыщызыухъу­мэщт прививкэм имэхьанэ зэхашIыкIынэу цIыфхэм зафе­гъазэ.

Шъугу къэдгъэкIыжьын, эпидемиологие Iофхэм язытет нахьышIу хъугъэ нахь мышIэми, коронавирусыр къытпыхьаным ищынагъо джыри къытшъхьарыт. Iофыгъом ихэкIыпIэр иммунитет тиIэныр ары. Прививкэр зыхябгъалъхьэмэ, ар уиIэщт. Шъуипсауныгъэ шъуфэсакъ!

Iэшъынэ Сусан.