Лъэпкъ проектэу «Дунэе кооперациер ыкIи экспортыр» зыфиIорэм игъэцэкIэн къыдыхэлъытагъэу Iахьзэхэлъ обществэу «Урысые экспорт гупчэм» илъэс къэс зэнэкъокъу зэхещэ. Илъэсым иэкспортер анахь дэгъум икъыхэхын ар фытегъэпсыхьагъ.

Урысые зэнэкъокъум илъэныкъоу «Экспортер года в сфере промышленности» зыфиIорэм хэлэжьэгъэ Адыгэ Республикэм Iоф щызышIэрэ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «ДомБытХимым» Къыблэ федеральнэ шъолъырым ящэнэрэ чIыпIэр щиубытыгъ.

Илъэс 20 хъугъэу бытовой химием ибэдзэр пэрытныгъэ щиIыгъэу компаниер мэлажьэ. Илъэ­сым къыкIоцI продукцие миллион 30-м ехъу къыдегъэкIы. Урысыем ишъолъыр 60-мэ ар ащыIуегъэкIы.

ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «ДомБытХим» зыфиIорэм ипащэхэм, икъулыкъушIэхэм тафэгушIо, тапэкIи гъэхъэгъэшIухэр ашIынхэу афэтэIо.