Къэралыгъо IэпыIэгъум ишIуагъэкIэ
1999-рэ илъэсым поселкэу Яблоновскэм къыщызэIуахыгъэ компаниеу «Экспресс-Кубань» зыфиIорэм къыдигъэкIырэ пхъэшъхьэ-мышъхьэхэм ахэшIыкIыгъэ псыхэм яIугъэкIын фэгъэзагъ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «АКК-р».
Илъэс 22-м къыкIоцI компанием хэхъоныгъэшIухэр ышIынхэ ыкIи ипродукцие зыщыIуигъэкIырэ чIыпIэхэм ахигъэхъоныр фызэшIокIыгъ. 2015-рэ илъэсым щыублагъэу пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «АКК-р» экспортым фэгъэзагъ.
Казахстан икъалэу Алматы щызэхащэгъэ гъомылэпхъэ промышленностым идунэе къэгъэлъэгъонэу «FoodExpo» зыфиIорэм республикэм икомпание хэлэжьагъ ыкIи ипродукцие мы IэкIыб къэралыгъом щыIуигъэкIынэу экспорт зэзэгъыныгъитIумэ акIэтхагъ.
Джащ фэдэу тызхэт илъэсым къалэу Минскэ щырагъэкIокIыгъэ дунэе Iофтхьабзэу «Белагро 2021» зыфиIорэм компаниер чанэу хэлэжьагъ, унэе стендэу къыгъэхьазырыгъэм ипродукцие къыщигъэлъэгъуагъ.