Ныбжьым нэмысыгъэу
Ыныбжь нэмысыгъэу пенсием кIонэу фитыныгъэ зиIэхэр УФ-м пенсиехэмкIэ исистемэ фэгъэхьыгъэ хэбзэгъэуцугъэм щыгъэнэфагъэх.
Ащ фэдэ фэгъэкIотэнхэр зиIэхэм медицинэм иIофышIэхэри ащыщых. Ахэм IофшIэгъэ илъэс гъэнэфагъэр рагъэкъумэ, пенсиер агъэпсынэу фитыныгъэ къареты. Ащ имызакъоу, мы уахътэм коронавирусыкIэр къызэолIагъэхэм зы мазэрэ Iоф адэзышIагъэхэм ар мэзищэу къафалъытэ. Арышъ, законым щытхыгъэм нахьыжьэуи ахэм пенсиер агъэпсын алъэкIыщт.
Джащ фэдэу медицинэм иIофышIэу коронавирусыкIэм пэшIуекIорэ Iофтхьабзэхэм ахэлажьэхэрэм автомашинэ къащэфыщтми фэгъэкIотэнхэр яIэ хъугъэх. Сомэ миллионрэ ныкъорэм нахь мылъапIэу къызыхахыкIэ, сомэ мин 375-м кIахьэу къафырагъэгъэзэжьыщт. Врачэу исэнэхьаткIэ IофшIэгъэ илъэсхэр мымакIэу зиIэхэм япсэупIэхэр приватизировать ашIынхэуи пенсиехэмкIэ системэм щыгъэнэфагъ.
Медицинэм иIофышIэхэм ямызакъоу, сабыибэ зиIэ ныхэми, пенсием зыныбжь екIолIагъэхэм ахалъытэхэу, IофшIэпIэ чIыпIэр чIэзынагъэхэми аныбжь нэмысызэ пенсиер агъэпсынэу фитыныгъэ законым къареты. ГущыIэм пае, бзылъфыгъэу сабыитф е нахьыбэу зиIэр илъэс 50-м пенсием кIон ылъэкIыщт. Сабыищ-плIы зыпIугъэхэр аныбжь нэсынкIэ илъэсищ-плIы къэнагъэу пенсиер агъэпсын фитых. ЯIофшIэгъэ илъэсхэр 15-м къыщымыкIэнхэр ары нэмыкI шапхъэу ащ къыщыдэлъытагъэр.
Хъулъфыгъэм ыныбжь пенсием екIолIагъэу IофшIапIэм иштат нахь макIэ зашIым е зызэфашIыжьым IофшIэпIэ чIыпIэр чIинагъэмэ, пенсием нэсынкIэ илъэситIу къэнагъэу ар ыгъэпсын фит. ЦIыфхэм IофшIэпIэ чIыпIэхэр ягъэгъотыгъэнхэмкIэ Гупчэм нэмыкI IофшIапIэ зэримыгъотыгъэр къэзыушыхьатырэ тхылъыр къыIихынэу ары ищыкIагъэр.