ШэнышIу зэрэхъугъэу, адыгэ шъуашэм и Мафэ илъэс къэс игъэкIотыгъэу республикэм щыхагъэунэфыкIы.

Iоныгъом и 28-м Адыгэ Рес­публикэм и Къэралыгъо филармоние зэхахьэр пчыхьэм сыхьатыр 5-м щырагъэжьэщт.

МэфэкI зэ­ха­хьэм ирежиссерэу, Урысыем, Абхъазым, Пшызэ язаслуженнэ артистэу, Адыгэ Республи­кэм инароднэ артистэу, рес­публикэм и Къэ­ралыгъо академическэ къэшъокIо ансамблэу «Налмэсым» ихудожественнэ пащэу Хъоджэе Аслъан адыгэ шъуашэм и Мафэ гъэшIэгъонэу зэрэкIощтым ицыхьэ телъ.

Республи­кэм ихэбзэ къу­лыкъушIэхэр, культурэм, гъэсэныгъэм яIофышIэхэр, искусствэр зышIогъэ­шIэгъонхэр, нэмыкIхэри Iоф­тхьабзэм хэлэ­жьэщтых.

Адыгэ Республикэм икъэралыгъо академическэ къэшъокIо ансамблэу «Налмэсыр», респуб­ликэм и Къэралыгъо орэдыIо- къэшъокIо ансамблэу «Ислъамыер», республикэм и Къэралыгъо филармоние иансамблэу «Ошъутенэр», орэдыIохэу Беданыкъо Замирэ, Хъурэнэ Азэ, фэшъхьафхэри хэлэжьэщтых.

ЗэлъашIэрэ сурэтышI-модельерэу СтIашъу Юрэ Iоныгъом и 28-м ыныбжь илъэс 90-рэ мэхъу. Искусствэм ицIыф цIэ­рыIо ищытхъу пчыхьэзэхахьэм щаIощт, фэгушIощтых.

Дунаим щыха­гъэунэфыкIы

Адыгэ шъуашэм и Мафэ тиреспубликэ имызакъоу, дунаим щыхагъэунэфыкIы. МэфэкI зэхахьэхэр къош республикэхэм, Краснодар краим, Москва, тилъэпкъэгъухэр зыщыпсэурэ хэгъэгухэм ащыкIощтых.

Адыгэ шъуашэм фэгъэхьыгъэ къэгъэлъэгъонхэр филармонием щызэхащэщтых, лъэпкъ шъуа­шэм ехьылIэгъэ къэбархэр зэха­хьэм къыщаIо­тэщтых.

— Лъэпкъ об­щественнэ движениехэу рес­публикэм щызэ­хащагъэ­хэр зэхахьэм къед­гъэблэгъагъэх, — къытиIуагъ Адыгэ Респуб­ликэм лъэпкъ IофхэмкIэ, Iэ­кIыб къэралхэм ащыпсэурэ ти­лъэпкъэгъухэм адыряIэ зэпхыныгъэхэмкIэ ыкIи къэбар жъу­гъэм иамал­хэмкIэ и Комитет итхьаматэу Шъхьэлэхъо Ас­кэр. — МэфэкIым Адыгеим ис лъэпкъхэр зэфещэх, адыгэ шъуа­шэм имэхьанэ къеIэты.

«Шъукъеблагъэх мэфэкIым, шъухэлажь», — ятэIо тигъэзет­еджэхэм, искусствэр зышIогъэ­шIэгъонхэм.

Сахьидэкъо Нурбый.