Iоныгъом и 21-м Адыгэ къэралыгъо университетым Iэнэ хъураеу щызэхащагъэм бзэ пчъагъэ зэзыгъэшIэрэ ныбжьыкIэхэр гумэкIыгъоу зэрихьылIэхэрэм щатегущыIагъэх. Научнэ–ушэтын университетэу «Экономикэм иапшъэрэ еджапI» зыфиIорэм епхыгъэ бзэм ыкIи акъылым я Гупчэ илъэтегъэуцо Iофтхьабзэм щыкIуагъ.

БзитIу е нахьыбэ зэзыгъа­шIэхэрэм япхыгъэ ушэтынэу ашIыгъэхэм, гумэкIыгъоу яIэхэм къатегущыIагъ Гупчэм ипащэу, филологие шIэныгъэхэмкIэ докто­рэу, профессорэу Ольга Драгой.

— Непэрэ зэIукIэм мэхьанэшхо иI, сыда пIомэ, Гупчэм иколлективрэ Адыгэ къэралыгъо университетымрэ ашIогъэшIэ­гъон, шIуагъэ къызыпыкIыщт лъэныкъохэр агъэунэфыгъэх. Зэгъусэхэу ушэтын IофшIэнхэр зэрашIыщтхэм тегущыIагъэх, — еIо зэIукIэм икураторэу, инджылызыбзэ филологиемкIэ кафедрэм ипащэу Сусанна Макеровам.

Iоныгъом и 23-м къыщегъэ­жьагъэу чъэпыогъум и 3-м нэс республикэ гимназием щыкIощт апэрэ зэхэт экспериментальнэ ушэтыным къытегущыIагъ Гуп­чэм инаучнэ IофышIэу, профессорэу Ольга Паршинар.

— УрысыбзэкIэ, адыгабзэкIэ ыкIи инджылызыбзэкIэ я 2 — 5-рэ классхэм арыс кIэлэцIыкIухэр къеджэхэ зыхъукIэ, анэ­хэр зэрагъэзекIорэр зэдгъэшIэныр ары типшъэрылъыр. АщкIэ шIыкIэ зэфэшъхьафхэр тэгъэфедэх. Портативнэ видеоокулографыр Москва къыздитщыгъ. Адыгэ къэралыгъо университетым ыкIи гимназием Iоф ащызышIэхэрэр тигъусэхэу пэшIорыгъэшъэу зыдгъэхьазырыгъ. КIэлэцIыкIухэр бзэ зэфэшъхьафхэмкIэ гущыIэухыгъэхэм къызэряджэхэрэр тыушэтыщт, — еIо ащ.

Къэзэрэугъоигъэхэм Ольга Драгой нэужым а Iофыгъом фэгъэхьыгъэ лекцие къафе­джагъ. Опытэу IэкIэлъымкIэ къадэгощагъ.

— Непэрэ зэIукIэр Гупчэм тыдэлэжьэнымкIэ апэрэ лъэбэ­къоу плъытэн фае. Мы IофшIэныр зышIогъэшIэгъонэу ныбжьыкIэхэм бэу къахэкIыгъэр. Арышъ, тызэгъусэу мы лъэныкъом Iоф дэтшIэщт. Опытэу аIэкIэлъыр тэркIэ шъхьапэ хъущт, — еIо С. Макеровам.

Iофтхьабзэм къыдыхэлъытагъэу гумэкIыгъо зэфэшъхьафхэм къызэрэугъоигъэхэр атегущыIагъэх. БзитIур, анахьэу урысыбзэмрэ адыгабзэмрэ зэрэзэрагъэшIэрэ шIыкIэм, бзитIумкIэ еджэнхэм шIуагъэу ыкIи къиныгъоу къыпыкIыхэрэм, ятIонэрэ бзэр зэрагъашIэ зыхъукIэ апэ­рэр зэраIэкIэзырэм игумэкIыгъохэм джащ фэдэу атегущыIагъэх. Мы IофшIэнымкIэ аужырэ технологиехэр зэрагъэфедэхэ­рэр къаIуагъ.

— Лъэныкъо зэфэшъхьафхэмкIэ Iоф зэрэзэдэтшIэщтыр дгъэу­нэфыгъэ. Ушэтынхэм ямыза­къоу, гурыт еджапIэхэм, гъэсэныгъэм иучреждение зэфэшъхьафхэм тадэлэжьэнэу зэзэгъы­ныгъэ адэтшIыгъ, — еIо Сусаннэ.

Iоныгъом и 22-м инджылызыбзэкIэ Ольга Паршинам лек­цие къытыгъ.

— Факультет зэфэшъхьафхэм ащеджэрэ студентхэр лекцием къекIолIагъэх, анахь чанэу хэлэжьагъэхэр IэкIыб къэралыгъуа­бзэхэмкIэ факультетым истудентхэр ары. Къыхэзгъэщымэ сшIоигъу лекцием къызэредэIугъэхэм имызакъоу, гумэкIыгъо зэфэшъхьафхэр къызэраIэтыгъэ­хэр, зэдэгущыIэгъу гъэшIэгъонэу лекциер зэрэкIуагъэр, — еIо Ольга Паршинам.

МэфитIум изэфэхьысыжьхэр къышIыхэзэ, Адыгэ къэралыгъо университетым зэрэдэлэжьэщтхэм мэхьанэшхо зэрэратырэр Ольга Драгой къыхигъэщыгъ. ДЕЛЭКЪО Анет.