АР-м хэгъэгу кIоцI IофхэмкIэ и Министерствэ изаслуженнэ IофышIэу, къуаджэу Нэчэрэзые ицIыф гъэшIуагъэу Гъомлэшк Руслъан Хьазрэт ыкъом ыныбжь илъэс 65-рэ хъугъэ.

Адыгэхэм мыр ныбжь дахэу алъытэ, иакъыл уцугъэу, цIыф­хэм ацIэкIэ обществэм къыщыгущыIэн ылъэкIыщтэу аIо.

Руслъан ренэу изыпкъитыныгъэкIэ, ишъырытыгъэкIэ зэкIэми къахэщыщтыгъэ, бэ къыIоныр икIэсагъэп, ау къызиIокIэ, ащ ублэкIынэу щытыгъэп. ЗыгорэкIэ уигъэгугъагъэмэ, ар къыпфи­шIэщт. Ау фызэшIомыкIынэу щытмэ, уигъэгугъэщтэп, занкIэу къыуиIощт. ЫIорэм епцIыжьырэ цIыфхэм зыкIи ащыщэп, зэкIэми гу алъетэ, гъунэ алъефы. Ащ къеушыхьаты унагъоу къызэ­рыхъухьагъэм нэхъойрэ шъхьэ­кIафэрэ зэрилъыгъэм. Арэущтэу щымытыгъэмэ, цIыфхэм уасэ ыкIи лъытэныгъэ къыфашIыщтыгъэп.

Унагъом къихъухьэгъэ ыш- ышыпхъухэм Руслъан анахьыкIагъ. Нухьэ, Аслъан ыкIи ышыпхъоу Минхъан бэкIэ нахьыжъыгъэх нахь мышIэми, Руслъан иеплъыкIэ къыдалъытэщтыгъэ, едэIущтыгъэх. Янэ-ятэхэу Хьазрэтрэ Налмэсрэ колхозым щылэжьагъэх, ащыгъум зэрэщытыгъэмкIэ, пчэдыжь нэфшъагъом икIыхэти, чэщыр хэкIотагъэу унэм къихьажьыщтыгъэх, етIани унэгъо IофшIэныр дагъэцакIэщтыгъэ. Руслъан ренэу егупшысэщтыгъэ: «Сыд фэдиз къарыу янэ-ятэмэ халъхьагъ ясабыйхэр апIунхэм, алэжьынхэм ыкIи алъакъо тырагъэуцонхэм фэшI?» Ащ къы­хэкIыкIэ дэгъоу къыгурыIощтыгъэ IофшIэныр зэкIэмэ апшъэу зэрэщытын фаер. ГущыIэжъым къызэриIоу «Улажьэмэ лыжъ пшхын».

Къулыкъур

Руслъан гурыт еджапIэр дэгъоу къыухи Мыекъопэ автотранспортнэ техникумым чIэ­хьагъ, нэужым дзэ къулыкъум кIуагъэ. Ащ къызекIыжьым, Те­уцожь районым и РОВД икъэралыгъо автоинспекцие IофшIэныр щыригъэжьагъ. Ащыгъум къулыкъу транспортымкIэ яIофхэр къиныгъэх… Арэу щытми, уахътэ зытешIэм, Гъом­лэшк Руслъан мотоциклэ къыратыгъ ыкIи Теуцожь районым ичIыпIэ зэфэшъхьафхэм бэрэ ащыплъэгъущтыгъэ. Ызыныкъо­хэр гушIоу къыпэгъокIыщтыгъэх, адрэхэр гумэкIыщтыгъэх. Пщэфын ыкIи къуалъхьэ IофкIэ уекIолIэн умылъэкIынэу, инспектор пхъашэу ары ыцIэ зэрэIугъагъэр. Шъыпкъэ, бэхэм пшъэ­дэкIыжь аригъэхьыщтыгъэ, ау гухьэ-гужъ зыми фишIыщтыгъэп, хабзэм тетэу зекIощтыгъэ.

Къэлэ хьыкумым ихьыкумышIэу, Руслъан иныбджэгъу­шIоу ЛIыхъурэе Бислъан къеIуа­тэ: «Краснодар тыкIон хъумэ, ащ къикIырэ машинэхэм тяуп­чIыщтыгъэ Руслъан а лъэны­къом къулыкъур щехьымэ. Гъогум темытэу къызытаIокIэ, гупсэфэу тыкIощтыгъэ. Сэ пчъагъэрэ сыкъыгъэуцузэ, пшъэдэкIыжь сигъэхьыгъ».

Ежь Руслъани щхыпцIызэ джэуап къетыжьы: «Къызэрэжъу­лэжьыгъэм фэдэу пшъэдэкIыжь шъозгъэхьыщтыгъэ, ау сэ сауж хабзэр шъумыукъоу, цIыф тэрэз шъузэрэхъугъэм непэ сегъэгу­шхо».

Иныбджэгъухэри мэщхых, ащ фэдэ хъугъэ-шIагъэу бэ агу къэкIыжьырэр.

IофшIэныр

Ыгу етыгъэу Iоф ышIэзэ, IэпэIэсэныгъэ зыхэлъ хъугъэ офицерыр гъогум къытыращи, Адыгэкъалэ имилицие хагъэ­хьагъ. Iоф ышIэзэ СССР-м и МВД иакадемие къыухыжьыгъ. Ащ къыщегъэжьагъэу гъэхъагъэ­хэр ышIызэ къулыкъумкIэ дэкIоягъ. IофшIэнымкIэ анахь шъхьа­Iэр ащ хэшIыкI фыуиIэныр, гъэцэкIэкIо дэгъоу ущытыныр, пшъэрылъэу къыпфагъэуцугъэр пшъэдэкIыжь пылъэу бгъэцэкIэныр ары. Руслъан инасып къы­хьи, иIофхэр дэгъоу зэпыфа­гъэх. Хэгъэгу кIоцI къулыкъум иотдел ипащэ игуадзэу агъэнэфагъ. А уахътэм тефэу Азэщыкъ Мирэ къыщи, унагъо зэдашIагъ. Зэшъхьэгъусэхэм лъфыгъитIу, Людэрэ Рустамрэ, къафэхъу­гъэх. Унагъом фэтэри къыратыгъ, ащ лъэшэу щыгушIукIы­гъэх.

Нэужым Гъомлэшк Руслъан АР-м и МВД къащэжьыгъ, общественнэ щынэгъончъэнымкIэ милицием ипащэ игуадзэу агъэ­нэфагъ. Ащи ищытхъу аригъа­Iозэ Iоф щишIагъ, республикэм иминистрэхэм я Кабинет изэхэ­сыгъохэм бэрэ МВД-м ыцIэкIэ ахэлэжьагъ. Руслъан Хьазрэт ыкъом IофшIэнэу ыгъэцакIэщтыгъэр зэфэшъхьафыгъ, общественнэ рэхьатныгъэр къэухъу­мэгъэным къыщегъэжьагъэу Къэралыгъо автоинспекцием икъулыкъу нэсэу.

Унагъом тхьамыкIагъоу къи­хъухьагъэр

МэкIэ-макIэу щыIэныгъэр лъыкIуатэщтыгъэ, къулыкъур зэрифэшъуашэу зэрихьырэмкIэ шъхьэкIэфэныгъэ къыфашIы­щтыгъ, къэлэ гупчэм унэ дэгъу щищэфыгъ, кIэлэцIыкIухэр еджа­пIэм кIощтыгъэх, ишъхьэгъусэ Iоф ышIэщтыгъэ. Упсэущтмэ, фэдэ щыIагъэп. Ау щыIэныгъэр о узэрэфаем фэдэу гъэпсыгъэп. «Тыдэ укъикIи, лажь?» аIо адыгэхэм. ОшIэ-дэмышIэу Руслъан тхьамыкIагъо къыфыкъокIыгъ — ишъхьэгъусэ сымаджэ хъугъэ. Игупсэ цIыфым ищыIэныгъэ къыгъэнэжьыным лъэшэу фэбэнагъ. Тыдэ Iоф щишIагъэми, Руслъан ныбджэгъу дэгъухэр иIагъэх, сыд фэдэрэ IофкIи IэпыIэгъу къыфэхъунхэм ренэу фэхьазырыгъэх. Ау мы чIыпIэм зыпари афэшIагъэп. Тхьэ за­къор ары зэкIэ зыIэ илъыр.

«Зыцэ мыузыгъэм ыкIи зи­шъуз мылIагъэм уиуз афэмы­Iуат» аIо адыгэхэм. Джащ фэдэ чIыпIэ иуцогъагъ Руслъан. Гъом­лэшкмэ яунагъо къинэу ылъэгъугъэм лIакъор зэридзагъ. Руслъан ишъхьэгъусэрэ ышна­хьыжъэу Нухьэ ишхьэгъусэрэ а зы мафэм ядунай ахъожьи, зэдагъэтIылъыгъэх.

Сыд фэдиз къин цIыфым къыфыкъокIыгъэми, щыIэныгъэр лъэкIуатэ. Илъфыгъэхэр еджапIэм кIощтыгъэх, ахэр ригъэ­джэнхэ, къыIэтынхэ фэягъ. Руслъан ащыгъум ыгу дэхъыкIыгъэр Тхьэшхо закъор ары зышIэрэр. Сыд фэдиз къин ылъэгъугъэми, къызэкIэкIуагъэп, непэ исабыйхэр, икъорэлъфхэр итхъагъохэу щыIэныгъэр лъэ­кIуатэ. Илъфыгъэхэм ахэсэу мэпсэу.

«Милицием къулыкъур зыщыпхьыгъэ лъэхъаным анахь къиныгъэр сыда?» пIоу Руслъан узеупчIыкIэ, джэуап къетыжьы:

— Ленинакан ары. Армением щыIэгъэ чIыгусысыным ыуж, 1988-рэ илъэсым, Краснодар краим и УВД исводнэ отряд сырикомандирэу ащ сагъэкIогъагъ. Ащыгъум хэкIодагъэхэм яIахьыл-гупсэхэм къинэу, хьазабэу алъэгъугъэр гъунэнчъ, къалэм дэт унэу зэхэкъутагъэ­хэм хьадэхэр къащыдгъотыщтыгъэх, мэзитIоу Армением сызэрэщыIагъэр щыIэныгъэм хэмыкIокIэжьынэу сыгу къинагъ. ПкIыхьапIэкIэ сынэгу кIэкIыжьэу бэрэ къыхэкIыгъ…

Зыгъэпсэфыгъо уахътэр

2011-рэ илъэсым, мэзаем полковник званиер иIэу Гъомлэшк Руслъан Хьазрэт ыкъор хэгъэгу кIоцI къулыкъум хэ­кIыжьыгъ. ШъхьэкIэфэныгъэ­шхорэ лъытэныгъэшхорэ къыфашIызэ ар агъэкIотэжьыгъ. Ащ ыужи иIофшIэгъугъэхэр бэрэ къыфытеощтыгъэх, къулыкъум епхыгъэу упчIэжьэгъу ашIы­щтыгъ. Сыда пIомэ иIофшIэн хэшIыкIышхо фыриIагъ, IэпэIэсэныгъэшхо хэлъыгъ. Руслъан илъагъо рыкIуагъэх ыкъуи, икъорэлъфхэри, ГИБДД-м, МВД-м ипресс-къулыкъу, нэ­мыкI подразделениехэм Iоф ащашIэ, ар къызэрамыгъэукIытэжьыщтым пылъхэу ящытхъу арагъа­Iозэ къулыкъур ахьы.

Къулыкъур зыдихьыгъэхэми Руслъан ащыгъупшэрэп, лъытэныгъэ къыфашIы, шIу алъэгъу.

Милицием щытхъу хэлъэу къулыкъур зэрэщихьыгъэм фэшI Руслъан тын лъапIэхэр мымакIэу къыфагъэшъошагъэх. Ар МВД-м икъулыкъушIэ гъэшIуагъ, АР-м и МВД изаслуженнэ IофышI, Урысыем и МВД ибгъэхалъхьэу «За доблесть в службе» зыфиIорэр шъолъыр ыкIи федеральнэ щытхъу тхылъ пчъагъэ къыфагъэшъошагъэх. Макаровым икIэрахъо иунаеу къыратыгъ. Ау ищыIэныгъэкIэ анахь тын лъапIэу Гъомлэшк Руслъан ылъытэрэр «Къуаджэу Нэчэрэзые ицIыф гъэшIуагъ» зыфиIорэр ичIыпIэгъухэм къызэрэфагъэшъошагъэр ары.

Къыпэблэгъэ цIыфхэр

Руслъан ныбджэгъубэ иI. Ахэм ащыщых шIэныгъэлэжьэу, тхакIоу, журналистэу, общественнэ IофышIэу Къуекъо Асфар, Къэралыгъо ансамблэу «Ислъамыем» ипащэу Нэхэе Аслъан, АР-м и Къэралыгъо филармоние идиректорэу Къулэ Мухьамэд, хэбзэухъумэкIо къу­лыкъум илъэхъан Iоф къыдэзышIэгъэхэ Нэгъуцу Хьисэрэ ЛIымыщэкъо Рэмэзанрэ, Красногвардейскэ районым ипэщагъэу, джырэ уахътэ предпринимателэу Осмэн Альберт, Тыркуем къикIыжьыгъэ тилъэпкъэгъоу Чэтэо Инал ыкIи нэмыкI­хэри. Зэныбджэгъухэр зызэ­IукIэхэкIэ, зы Iанэ зэдыпафэх, джащыгъум ар сыдигъуи зезыщэрэр Гъомлэшк Руслъан.

— Бэхэр егъэгумэкIых милиционерэу, полковникэу Руслъан тэ, творческэ цIыфхэм, тызэрепхыгъэм. Ахэм ашIэрэп Гъомлэшк Руслъан ыгукIэ, игъэ­сэныгъэкIэ творческэ Iофы­шIэхэм зэрапэблагъэр. Ар тэмэтелъхэр зиIэ тицIыф. Руслъан орэдым мэхьанэу иIэр дэгъоу къыгурэIо ыкIи зэхешIэ. Ар ныбджэгъу шъыпкъ, шIу къытфишIэным пылъ, ащ пае тэри лъытэныгъэшхо фэтэшIы, — еIо Нэхэе Аслъан.

Чэщи мафи Iоф ышIэзэ есэгъэ Руслъан хэбзэухъумэкIо IофшIэныр къэралыгъо къулыкъушIэнымкIэ зэблихъугъ. ЦIыфхэм ясоциальнэ фэIо-фашIэхэр гъэцэкIэгъэнхэм фытегъэпсыхьэгъэ гупчэу Мые­къуапэ дэтым ипащэу агъэнэфагъ. Мыщи дэгъоу зыкъыщигъэлъэгъон ылъэкIыгъ.

— Руслъан илъэси 10-м ехъу­гъэу ныбджэгъуныгъэ дысиI, зы уахътэ горэм тызэгъусэу кIэлэцIыкIу лагерым Iоф щытшIагъ. Зыфэгъэзэгъэ IофшIэныр зэрифэшъуашэу ыгъэцэкIэным, пшъэдэкIыжь ыхьыным сыди­гъуи фэхьазыр, зэфагъэ хэлъ. Руслъан псауныгъэ пытэ иIэу, игухэлъхэр къыдэхъоу щыIэнэу фэсэIо, — еIо «Интурист-Адыгеям» игенеральнэ директорэу КIыкI Ерстэм.

Мы цIыф шIагъор зышIэхэрэм къызэрэхагъэщырэмкIэ, Рус­лъан цыхьэ зыфэпшIын плъэкIыщт ныбджэгъу шъыпкъ, цIыфыгъэшхо хэлъ. Ныбжь дахэу хигъэунэфыкIыгъэмкIэ Гъомлэшк Руслъан иныбджэгъухэр фэгушIох, гу кIуачIэу иIэм къыкIимычынэу, илъфыгъэхэм, ахэм къакIэхъу­хьагъэхэм яхъяр ылъэгъоу, шIоу, дэгъоу щыIэр игъогогъухэу псэунэу фаIо.

КIАРЭ Фатим.