Адыгеим и ЛIышъхьэу КъумпIыл Мурат дзюдомкIэ Урысыем ичемпионат икъызэIухын тегъэпсыхьэгъэ Iофтхьабзэм хэлэжьагъ. Шъугу къэтэгъэкIыжьы тыгъуасэ къыщегъэжьагъэу Iоныгъом и 26-м нэс тиреспубликэ ар зэрэщыкIощтыр.

Джащ фэдэу Iофтхьабзэм хэлэжьа­гъэх Урысые Федерацием и Президент и Полномочнэ лIыкIоу ЮФО-м щыIэм иаппарат Адыгэ РеспубликэмкIэ ифедеральнэ инспектор шъхьаIэу Сергей Дрокиныр, Адыгэ Республикэм и Премьер-министрэу Геннадий Митрофановыр, Урысыем дзюдомкIэ ифедерацие ивице-президентэу, Урысыем изаслуженнэ тренерэу Валентин Хабировыр, дзюдомкIэ ЮФО-м ифедерацие ипащэу Ашот Маркарьян, Адыгеим дзюдомкIэ ифедерацие ипащэу Лъэустэнджэл Мурат, Адыгэ Республикэм иминистрэхэм я Кабинет хэтхэр, республикэм испортсмен, итренер цIэрыIохэр.

Мы чемпионат иныр Адыгеим зэрэщызэхащэрэм мэхьанэшхо зэ­риIэр Адыгэ Республикэм и ЛIышъхьэ хигъэунэфыкIыгъ. Къум­пIыл Мурат къэзэрэугъоигъэхэм шIуфэс арихи, дзюдомкIэ Адыгеим гъэхъэгъэшхохэр зэриIэр, дзюдомкIэ Мыекъопэ бэнапIэр зэрэдунаеу зэрэщызэлъашIэрэр къыIуагъ. Я XX-рэ лIэшIэгъумкIэ дзюдомкIэ тренер анахь дэгъоу Кобл Якъуб ары ащ лъапсэ фэзышIыгъэр. ТичIыпIэгъу цIэрыIо ыцIэ спортымкIэ Унэми ехьы, Урысыем ичемпионат мыгъэ джары зыщыкIорэр.

Адыгеим и ЛIышъхьэ зэрэхигъэунэфыкIыгъэмкIэ, Кобл Якъубэ джащ фэдэу АКъУ-м физкультурэмкIэ ыкIи дзюдомкIэ и Институт зэхищагъ, спортымкIэ мастер нэбгыришъэ пчъагъэ ыгъэхьазырыгъ. Ащ ыгъэсагъэхэм ащыщых тичIыпIэгъу цIэрыIохэу дзюдомкIэ олимпийскэ чемпионэу Владимир Невзоровыр, Олимпийскэ джэгунхэу 1980-рэ илъэсым щыIагъэхэм джэрз медалыр къащыдэзыхыгъэу Емыж Арамбый, Дунаимрэ Европэмрэ ячемпионэу Лъэцэр Хьазрэт. Мы аужырэ илъэсхэм дзюдомкIэ Олимпиадэхэм ащатекIуагъэхэу Арсен Галстяни, Мудрэнэ Бислъани, Тао Хьасанбыйи дзюдомкIэ Мыкъопэ бэнапIэм щагъэсагъэх.

«Адыгеим дзюдор щагъэлъапIэ, дзюдом тихэгъэгу зыщегъэушъомбгъу­гъэнымкIэ республикэм иIахь зэрэхи­шIыхьэрэм тырэгушхо, — къыIуагъ КъумпIыл Мурат. — ТикIэлэ, пшъэшъэ зэчыишIухэм амалэу яIэхэм зыкъызэ­Iу­рагъэхынымкIэ ящыкIэгъэ пстэур ягъэ­гъотыгъэным тэркIэ мэхьанэшхо иI. Хэгъэгум зэрэщыщытым фэдэу, фэе пстэури спортым пылъынхэмкIэ Адыге­им бэ щашIэрэр. Анахь шъхьаIэр спорт хабзэхэр лъыгъэкIотэгъэнхэр ары».

Джащ фэдэу Урысыем дзюдомкIэ ифедерацие ивице-президентэу Валентин Хабировым къэзэрэугъоигъэхэм закъыфигъэзагъ. Урысыем дзюдомкIэ ифедерацие ипрезидент ишIуфэс тхылъ Василия Анисимовар къеджагъ. Чемпионатым изэхэщэнкIэ IэпыIэгъу къазэрэфэхъу­гъэм фэшI Адыгеим ипащэхэм зэрафэразэр ащ къыIуагъ.

Валентин Хабировымрэ КъумпIыл Муратрэ чемпионатым хэлажьэхэрэм текIоныгъэшхохэр ашIынхэу, спортсменхэр зэрэбанэхэрэм яплъыхэрэм гукъэ­кIыжь дахэхэр яIэнэу афэлъэIуагъ. Мыекъуапэ икъэлэ парк дэжьи щызэхащэщт фан-зонэм чемпионатым илъэ­хъан тренер, спортсмен цIэрыIохэр щалъхэгъунхэ алъэкIыщт.

Урысые Федерацием ишъолъыр 61-мэ къарыкIыгъэ спортсмен 500-м ехъу чемпионатым къекIолIагъ. СпортымкIэ мастер 303-рэ, дунэе класс зиIэ мастер 25-рэ, спортымкIэ заслуженнэ мастерищ ахэм ахэт. ДзюдомкIэ Адыгэ Респуб­ликэм икуп спортсмен 31-рэ хэт, нэбгырэ 24-р хъулъфыгъ, 7-р бзылъфыгъ, спортымкIэ мастер 11, мастерынымкIэ кандидат 20 ахэм ахэт. Мэфи 4-м къы­кIоцI дзюдомкIэ ахэм IэпэIэсэныгъэу яIэр къагъэлъэгъощт, осэшIхэм анахь дэгъухэр къыхахыщтых.

АР-м и ЛIышъхьэ ипресс-къулыкъу