Адыгэ Республикэм наркотикхэр хэбзэнчъэу къыщемыгъэкIокIыгъэнымкIэ икомиссие изэхэсы­гъоу тыгъуасэ щыIагъэр Адыгеим и ЛIышъхьэу КъумпIыл Мурат зэрищагъ. Наркотикхэр хэбзэнчъэу зэрагъакIозэ, бзэджэшIагъэу зэрахьэхэрэм ягъогупэ пыбзыкIыгъэнымкIэ амалэу зэрахьэхэрэм, кIэлэцIыкIухэмрэ ныбжьыкIэхэмрэ физическэ культурэмрэ спортымрэ нахь апыщэгъэнхэ зэрэфаем атегущыIагъэх.

Адыгэ Республикэм и МВД иотделэу наркотикхэр зэрагъэзекIохэрэм гъунэ лъызыфырэм ипащэу Нэфышъэ Рустам мы лъэныкъомкIэ Iофхэм язытет къытегущыIагъ. Илъэсыр къызихьагъэм щегъэжьагъэу наркотикхэр хэбзэнчъэу зэрагъэ­кIуагъэу гъогогъуи 192-рэ къыхагъэщыгъ, уголовнэ Iофи 141-рэ хьыкумым IэкIагъэхьагъ. Информационнэ технологиехэр къызфагъэфедэзэ наркотикхэр зэраIэкIагъахьэрэм епхыгъэ Iофыгъор зэрэхьылъэу къэнэ­жьы. Мыгъэ Интернетыр яIэпыIэгъоу наркотикхэм яIугъэ­кIынкIэ бзэджэгъэ 95-рэ зэрахьагъэу агъэунэфыгъ.

Пщыныжь ягъэхьыгъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ ипащэ ипшъэрылъхэр пIалъэ горэкIэ зыгъэцакIэу Хъут Ас­лъан зэхэсыгъом къыщиIуагъ наркотикхэр хэбзэнчъэу зэрэзэрагъэ­кIуагъэм пае агъэтIысыгъагъэ­хэм ятIонэрэу ащ фэдэ бзэджэшIагъэхэр зэрахьэ зэрэмыхъущтымкIэ зэрадэгущыIэхэрэр.

Адыгэ Республикэм физическэ культурэмрэ спортымрэкIэ и Комитет итхьаматэ игуадзэу Андрей Бородин кIэлэцIыкIу­хэмрэ ныбжьыкIэхэмрэ физическэ культурэмрэ спортымрэ ренэу апылъынхэмкIэ республикэм испорт еджапIэхэм Iофэу ашIэрэм къытегущыIагъ. Республикэм испортеджапIэхэм непэ шъэожъые, пшъэшъэ мин 14-м ехъу къякIуалIэ. Ахэм мастер-классхэр, пчъэ зэIухыгъэм имафэхэр, спортсмен, тренер, спортымкIэ ветеран цIэрыIохэр зыхэлэжьэрэ флеш­моб­хэр зэхащэх. Спорт еджапIэхэмрэ спорт лъэпкъхэмкIэ федерациехэмрэ ягъусэхэу спартакиадэхэр, чемпионатхэр, марафонхэр, зэнэкъокъу зэфэшъхьафхэр зэхащэх.

Спорт лъэпкъ зэфэшъхьаф­хэмкIэ: хоккеимкIэ, фигурнэ катаниемкIэ, синхроннэ есынымкIэ отделениехэр къызэIуа­хых. ВоркаутымкIэ, киберспортымкIэ, маунтинбайкымкIэ спорт федерациехэр зэхэщэгъэнхэм иIофыгъо джыдэдэм дэлажьэх.

ГТО-м ишапхъэхэм ягъэцэ­кIэнкIэ Iофтхьэбзэ 30 мыгъэ зэхащагъ, нэбгырэ мини 5-м ехъу ахэм ахэлэжьагъ. ГТО-м ипортал пстэуми республикэм щыщ нэбгырэ мини 100 фэдиз щатхыгъ. ГТО-м ишапхъэхэм ятын нэбгырэ мин 50-м ехъу хэлэжьагъ, ахэм ащыщэу нэбгырэ мин 22-мэ шапхъэхэр дэгъоу атыгъэх.

Адыгэ Республикэм и ЛIышъхьэу КъумпIыл Мурат зэхэсыгъом агу къызэрэщигъэкIыжьыгъэмкIэ, спорт инфраструктурэм изегъэушъомбгъункIэ респуб­ликэм Iофышхо щызэшIуахы, непэкIэ Адыгеим спорт псэолъэ 969-рэ ит. Республикэм ипащэ зэрилъытэрэмкIэ, спорт псэуа­лъэхэу агъэпсыхэрэр шIогъэшхо къытэу агъэфедэнхэ, респуб­ликэм исхэр зэкIэ физическэ культурэмрэ спортымрэ апы­лъын­хэмкIэ амалхэр зэрахьанхэ фае.

«Муниципалитетхэм япащэхэм зафэсэгъазэ, — лъэпкъ проектхэмрэ къэралыгъо программэхэмрэ къадыхэлъытэгъэ псэуалъэу агъэцэкIэжьыгъэхэм е агъэ­псыгъэхэм акIуачIэ изэу Iоф ашIэн фае. Спорт псэолъэ закъохэр арэп сыкъызтегущыIэрэр, культурэмкIэ унэхэми, библиотекэхэми, нэмыкI учреждениехэми ар афэгъэ­хьыгъ. Ныбжь зэфэшъхьаф зиIэхэм ашIогъэшIэгъоныщт Iофтхьабзэхэр зэхэщэгъэнхэ фае», — къыIуагъ КъумпIыл Мурат.

Зыныбжь хэкIотагъэхэм япсауныгъэ зыщагъэпытэрэ клубхэу «Родник» зыфиIохэрэм афэдэ­хэм дэгъоу Iоф зэрашIэрэр республикэм и ЛIышъхьэ хигъэу­нэфыкIыгъ, ахэм IэпыIэгъу афэхъунхэу пшъэрылъ афи­шIыгъ.

Хэбзэнчъэу наркотикхэр зэрагъэзекIорэм пэуцужьыхэзэ пэшIорыгъэшъ Iофтхьабзэу зэрахьэхэрэр Адыгэ Республикэм къэбар жъугъэмкIэ иамалхэм къызэрагъэлъагъорэм ехьылIэгъэ къэбарыми зэхэсыгъом икIэух щедэIугъэх. КъумпIыл Мурат зэхэсыгъом хэлажьэхэрэм къяджагъ наркотикхэм зэрарэу къахьырэр цIыфхэм зэлъягъэшIэгъэнымкIэ амал зэфэшъхьаф­хэр, муниципалитетхэмрэ нэмыкI шъолъырхэмрэ ащкIэ опытэу яIэр къызфагъэфедэнэу. Зэхэсыгъом икIэух зэфихьысыжьзэ, наркотикхэр хэбзэн­чъэу зыгъэфедэхэрэм ягъогупэ пыбзыкIыгъэнымкIэ Iофэу ашIэрэр нахь агъэлъэшын зэрэфаер Адыгэ Республикэм и ЛIышъхьэ къыIуагъ. Адыгэ Республикэм и ЛIышъхьэ ипресс-къулыкъу