Дунаим щызэлъашIэрэ сурэтышI-модельерэу СтIашъу Юрэ ыныбжь илъэс 90-рэ зэрэхъурэм фэгъэхьыгъэу культурэм иволонтер ныбжьыкIэхэр Мыекъуапэ щыIукIагъэх.

КъокIыпIэм щыпсэухэрэ лъэпкъ­хэм искусствэхэмкIэ я Къэралыгъо музей и Темыр-Кавказ къутамэ щыкIогъэ зэхахьэм Мыекъуапэ щеджэхэрэр, кIэлэегъаджэхэр, культурэм иIофы­шIэхэр хэлэжьагъэх.

Адыгэ Республикэм игуфэкIо волонтерхэм я Гупчэ ипащэу Карен Каракьян зэхахьэр зэри­щагъ. Культурэм иволонтерхэм яшIоигъоныгъэ­кIэ СтIашъу Юрэ иIофшIагъэ ехьылIэгъэ къэгъэлъэгъо­нэу музеим чIэтым къытегущыIагъ.

Адыгэ саем, цыем, шъуа­шэхэу «Нэфылъэ бзыум», «Адыифым», «Лащынэ ишъуаш», «Гекатей ишъуаш», «ТекIоны­гъэм исау­гъэт» зы­фи­Iо­хэрэм, лъэпкъ тхып­хъэ­хэм, лIэкъо тамы­гъэхэм, лъэпкъ­хэр зэ­фэзыщэхэрэ IэшIагъэхэм, нэ­мыкIхэм Ю. СтIа­шъур къатегущы­Iагъ.

Волонтерхэр ашIогъэшIэгъо­нэу шъуашэхэм, нэмыкI IофшIагъэхэм яплъыгъэх, нэпэеплъ сурэтхэр атырахыгъэх.

Мыекъопэ къэралыгъо университетым щеджэхэрэ Анна Горковенкэм, ШъэоцIыкIу Нэф­сэт, Къэлэшъэо Джэнэт къэгъэ­лъэгъонхэм ягуапэу яплъыгъэх. СтIашъу Юрэ иIофшIагъэ лъэшэу ашIогъэшIэгъон. Музеим щалъэ­гъугъэр, къэбарэу щызэхахы­гъэр япшъэшъэгъухэм, Iахьылхэм къафаIотэжьын ямурад.

Волонтерхэр сыхьатыр зэ­рэхъугъэм кIэупчIагъэхэп, телефонхэм яплъыхэу щысыгъэ­хэп. Зэхахьэр ащ къыгъэбаигъ СтIашъу Юрэ сэнэхьатыр къызэрэхихыгъэм, шъуашэхэу «Тыр­гъэтаор», «Гикатей ишъуашэ, мамыр псэукIэм икъэухъумэн афэгъэхьыгъэхэ пкъыгъохэр иIофшIагъэхэм нахь къахигъэщыгъэх, къэбар гъэшIэгъонхэр къыIотагъэх.

Искусствэм цIыфыр зэри­пIурэм, ыгу етыгъэу Iоф ышIэзэ мыпшъэу исэнэхьат зэрэ­лъигъэ­кIуатэрэм, США-м, Тыркуем, Германием, Сирием, Иорданием, Москва, нэмыкIхэм зэращыIа­гъэм, къэгъэлъэгъонхэр зэрэзэхищагъэхэм, фэшъхьаф­хэм СтIашъу Юрэ къытегущы­Iагъ. Лъэпкъ гупшысэр, шIэжьыр, цIыфыр IофшIэным цIыфы зэришIырэр, IэпыIэгъу къыфэ­хъу­хэрэм зэрафэразэр Ю. СтIа­шъум зэ­гъэфагъэу къыIотагъэх, философие гупшысэу иIофшIагъэ хэлъыр щыIэныгъэм къызэрэхихыгъэр, чэщыр хэкIотагъэми, пчэдыжьым тыгъэм инэбзыйхэр къэмылъагъохэми ыгу псэфырэп, иIофшIэн лъегъэ­кIуатэ.

Волонтерхэр СтIашъу Юрэ фэ­гушIуагъэх, нэпэеплъ шIухьафтынхэр ратыгъэх, бэгъашIэхэм ябэгъэшIэжь хъунэу Тхьэм фе­лъэIу­гъэх, зэхэтхэу сурэт атырахыгъ.

Ю. СтIашъум къыфэгушIуагъэ­хэм «тхьашъуегъэпсэу» къариIожьыгъ. ЕмтIылъ Нурбый.