Лъэпкъ искусствэм икIэлэцIыкIу къэшъокIо ансамблэу «Синдхэр» зыфиIорэр Щынджые щызэхащагъ.

Художественнэ пащэу Шалэ Рустам иIэнатIэ зыIутыр илъэси 3 фэдиз мэхъу. Гурыт еджапIэм икIэлэеджэкIо 34-мэ лъэпкъ къашъохэр зэрагъашIэх. «ЗэфакIу», «Удж», «ХьакIулащ», «Зыгъэлъат», «Лъэпэрышъу», нэмыкIхэри ашIогъэшIэгъоных.

«Убых къашъор», «Пшъэшъэ къашъор», «НыбжьыкIэ къа­шъор», фэшъхьафхэри пчыхьэзэхахьэхэм къащагъэлъэгъонхэм зыфагъэхьазыры.

— Къашъо пэпчъ екIолIэкIэ шъхьаф фэпшIын зэрэфаер тикIэлэеджакIохэм дэгъоу къагурэIо, — къеIуатэ Шалэ Рустам. — Ижъырэ къашъохэр, лъэпкъ классикэм хэхьагъэхэ къашъо­хэр, лъэхъанэу тызыхэтым щагъэуцухэрэ къашъохэр дахэх. Лъэпкъ гупшысэу ахэлъым къы­зэригъэбайхэрэм яхьылIагъэхэ зэгъэпшэнхэм ащытэгъэгъуазэх.

Гурыт еджапIэм икIэлэегъа­джэхэр, къуаджэм культурэм и Унэу дэтым ипащэу Мэзыужьэкъо Саныет зэхэщэн IофыгъохэмкIэ ансамблэм IэпыIэгъу къыфэхъух.

Лъэпкъ къашъохэм адакIоу, адыгэ шэн-зекIуакIэхэр, тари­хъыр, искусствэр кIэлэцIыкIухэм арагъашIэх, кIэлэцIыкIу джэгукIэхэм ащагъэгъуазэх. Тэхъу­тэмыкъое район ансамблэу «Адыгэхэр» зыфиIорэм хэтхэр, иныбджэгъухэу Маремыкъо Артур, Тхьаркъохъо Тимур, нэмыкIхэри Р. Шалэм упчIэжьэгъу ешIых.

КъэшъуакIохэр шым тесынхэм, чIыопсыр зэрагъэлъэгъуным, ялъэныкъо гупсэ зэра­гъэшIэным художественнэ пащэр ишъыпкъэу пылъ. Тхьаркъо­хъо Тимур ишIуагъэкIэ шым тесынхэм кIалэхэм зыфагъасэ.

Аныбжь зэримыкъурэм фэшI еджапIэм амыштагъэхэ кIэлэцIыкIухэри ансамблэм хэтых. Ахэри дахэу къэшъох, адыгэ шъуашэхэр афадыгъэх. Щынджые, Тэхъутэмыкъое районым икъуаджэхэм ащыкIохэрэ зэхахьэхэм «Синдхэр» нахьыбэрэ ахэлэжьэнхэ ямурад. Адыгэ шъуашэм и Мафэ, Адыгэ Рес­публикэм имэфэкI афэгъэхьыгъэ зэхахьэхэм «Синдхэр» ащыуджыщтых, яIэпэIэсэныгъэ лъэпкъ искусствэм къыщагъэлъэгъощт.

Сурэтым итхэр: «Синдхэм» якъэшъуакIохэр.