Хэдзынхэм язэфэхьысыжьхэмкIэ адэгощагъэх
Iоныгъом и 17-м къыщегъэжьагъэу и 19-м нэс Урысыем и Къэралыгъо Думэ ыкIи Адыгеим и Къэралыгъо Совет – Хасэм ядепутатхэм яхэдзынхэу республикэм щыкIуагъэхэм язэфэхьысыжьхэм афэгъэхьыгъэ зэхэсыгъо тыгъуасэ Адыгэ Республикэм хэдзынхэмкIэ и Гупчэ комиссие щызэхащагъ. Ар зэрищагъ ащ и Тхьаматэу Сэмэгу Нурбый.
Хэдзынхэр зыщыкIогъэхэ мафэхэм дэо тхылъэу къаIэкIэхьагъэхэм афэгъэхьыгъэу къэгущыIагъ Гупчэ комиссием и Тхьаматэ игуадзэу Елена Майор. ХэдзыпIэхэм зэмызэгъыныгъэхэр къачIэтаджэхэу къыхэкIыгъ, ау ахэр псынкIэу щагъэзыещтыгъэх. Ащ къызэриIуагъэмкIэ, дэо тхылъэу къаIэкIэхьагъэхэм хэбзэгъэуцугъэм диштэу ахэплъагъэх, зэхафыгъэх, къызыпкъырыкIыгъэхэм джэуапхэр аратыжьыгъэх.
Нэужым яенэрэ зэIукIэгъумкIэ Урысые Федерацием и Федеральнэ ЗэIукIэ и Къэралыгъо Думэ идепутатынымкIэ хэдзынхэу республикэм щызэхащагъэр зэрифэшъуашэу зэрэкIуагъэр агъэунэфыгъ. Гупчэм исекретарэу ХьацIэцIэ Фатимэ къызэриIуагъэмкIэ, зы мандат зиIэ хэдзыпIэ коимкIэ Адыгеим илIыкIоу Владислав Резник Думэм хэхьащт. Ар бэкIэ нэмыкIхэм апэ ишъыгъ.
Нэужым яенэрэ зэIукIэгъумкIэ Урысые Федерацием и Федеральнэ ЗэIукIэ и Къэралыгъо Думэ идепутатынымкIэ зы мандат зиIэ хэдзэкIо купэу N 1-м хэдзын бюллетеньхэу щагъэфедагъэхэм ХьацIэцIэ Фатимэ къатегущыIагъ.
ЗыкI хэдзыпIэ коимкIэ АР-м и Парламент идепутатхэм яхэдзынхэм кIэухэу афэхъугъэхэм нэужым къытегущыIагъэх. КъызэраIуагъэмкIэ, мы лъэныкъомкIэ депутат 25-рэ хадзыгъ. Ахэм ащыщэу 18-р — «Единэ Россием», 4-р — КПРФ-м, 2-р — ЛДПР-м, 1-р — «Справедливая Россия» зыфиIорэм ялIыкIох. ЗэкIэмкIи Къэралыгъо Советым — Хасэм депутат 45-рэ хадзыгъ, ахэм ащыщэу 25-р зыкI хэдзыпIэ коимкIэ, 24-р зы мандат зиIэ хэдзыпIэ коимкIэ пхырыкIыгъэх.
Урысыем и Къэралыгъо Думэ ыкIи Адыгеим и Къэралыгъо Совет — Хасэм ядепутатхэм яхэдзынхэр республикэм хэбзэгъэуцугъэм диштэу щыкIуагъэхэу плъытэ зэрэхъущтыр комиссием хэтхэм зэдаштагъ, ащ епхыгъэ унэшъо гъэнэфагъэм кIэтхэжьыгъэх.
Iофтхьабзэм икIэух хэдзынхэм ахэлэжьагъэхэм чанэу яIофшIэн зэрэзэшIуахыгъэр, ащкIэ зэрафэразэр Сэмэгу Нурбый къыхигъэщыгъ. Хэбзэгъэуцугъэм димыштэу зекIуагъэхэм пшъэдэкIыжь зэрахьыщтыр къыIуагъ.
ДЕЛЭКЪО Анет. Сурэтыр Iэшъынэ Аслъан тырихыгъ.