Адыгэ Республикэми, шъори шъуишIоигъоныгъэхэр парламентым ыхэрэ палатэ – я VIII-рэ зэIугъэкIэ­гъумкIэ Къэралыгъо Думэм къыщызгъэлъэгъонэу цыхьэшхо ятIонэрэу къызэрэсфэшъушIыгъэмкIэ лъэшэу сышъуфэраз. Адыгэ Республикэм и ЛIышъхьэу КъумпIыл Мурат зипэщэ купэу сэри сызыхэтым шъуицыхьэ телъэу ары ащ сызэреплъырэр.

Адыгеим ипащэхэр тигъусэу, партиеу «Единэ Россиер» тиIэпыIэгъоу республикэм социальнэ-экономикэ хэхъоныгъэ егъэшIыгъэнымкIэ, шъолъырым исхэм ящыIэкIэ-псэукIэ зыкъегъэIэтыгъэнымкIэ, нэмыкI Iофы­гъо зэфэшъхьафхэм язэшIохынкIэ илъэситфэу блэкIыгъэм къыкIоцI бэ тпшъэ ифагъэр.

Урысые Федерацием и Правительстви, федеральнэ министерствэхэми, ведомствэхэми Iофышхо адэт­шIагъ. Сиотчет ыпэкIэ зэрэщыхэзгъэунэфыкIыгъагъэу, федеральнэ ахъщэ IэпыIэгъоу илъэс къэс республикэм къыIукIэрэм илъэситфым къыкIоцI фэди 2,5-кIэ хэ­хъуагъ. 2016-рэ илъэсым ар сомэ миллиарди 6,5-рэ хъущтыгъэмэ, 2021-рэ илъэсым сомэ миллиард 16,4-м нэсыгъ. Илъэситфым къыкIоцI федеральнэ IэпыIэгъоу республикэм сомэ миллиард 68-рэ пстэумкIи къыIукIагъ. Ащ хэхьэ сомэ миллиарди 6,7-рэ хъурэ ахъщэ IэпыIэгъу тедзэу коронавирусым пэуцужьыгъэ­ным телъытагъэу 2020-рэ илъэсым Адыгеим къыратыгъэр. Инфраструктурэ, социальнэ псэолъэ зэ­фэшъхьаф­хэм ягъэпсынкIэ ыкIи ягъэкIэжьынкIэ федеральнэ мылъкоу Адыгеим къыфатIупщырэр фэди 9-кIэ нахьыбэ тшIын тлъэкIыгъ. 2016-рэ илъэсым а гухэлъхэм апае сомэ миллион 582,3-рэ къатIупщыгъа­гъэмэ, 2021-рэ илъэсым ар сомэ миллиарди 5,1-м нэдгъэсыгъ. Илъэситфым къыкIоцI республикэм пстэумкIи сомэ миллиард 20,2-рэ къыIукIагъ. Ащ нэмы­кIэу Урысые Федерацием и Правительствэ Адыгеим социальнэ-экономикэ хэхъоныгъэ зэришIыщт унэе программэри ыштагъ. Ащ игъэцэкIэн пае илъэс къэс сомэ миллиард къыхагъэкIы.

Ащ фэдэ федеральнэ мылъкушхо къызэрэIукIа­-гъэм ишIуагъэкIэ республикэм еджэпIакIэхэр, кIэлэцIыкIу IыгъыпIэхэр, сымэджэщхэр, гъогухэр, куль­турэмрэ спортымрэ япсэуалъэхэр, псыр зэраIэкIагъэхьэрэ псэуалъэхэр, укъэбзалъэхэр, нэмыкI псэ­­олъабэхэу социальнэ мэхьанэ зиIэхэр щагъэпсы­гъэх.

Республикэм тапэкIи хэхъоныгъэ егъэшIыгъэнымкIэ, цIыфхэм ящыIэкIэ-псэукIэ зыкъегъэIэтыгъэнымкIэ Адыгеим ипащэхэм джыри мурадышхохэр яIэх. 2021 – 2023-рэ илъэсхэм ателъытэгъэ федеральнэ бюджетым социальнэ лъэныкъоми, Адыгеим щыпсэухэрэм ящыкIэгъэ псэуалъэхэм ягъэпсыни, ягъэкIэжьыни мылъкоу апэIухьащтыр къыщыдэтлъытагъ. Урысые Федерацием и Правительствэ тыригъусэу 2022 – 2024-рэ илъэсхэм ателъытэгъэ бюджетым мыгъэ тыдэлажьэ зыхъукIи, ыпэкIэ фэдэу федеральнэ мылъкум къыкIемыгъэчыгъэным, ищыкIагъэу зыхъурэм, ащ хэгъэхъогъэным тыфэбэнэщт.

СихэдзакIохэр, цыхьэ къызэрэсфэшъушIыгъэмкIэ джыри зэ тхьашъуегъэпсэу шъосэIо. Шъо шъуиIэпыIэгъоу Адыгеим щыпсэурэ пстэуми яфедэ зыхэлъ Iоф­шIэныр тишъыпкъэу лъыдгъэкIотэщт, гухэлъэу тиIэхэр зэкIэ шIокI имыIэу дгъэцэкIэщтых.

Лъытэныгъэ къышъуфэзышIэу, Адыгэ Респуб­ликэм ыцIэкIэ я VIII-рэ зэIугъэкIэгъумкIэ Къэралыгъо Думэм идепутатэу Владислав Резник