Коронавирусым зиушъомбгъуным ищынагъо джыри къызэрэтшъхьарытыр сымаджэхэрэм япчъагъэ къегъэлъагъо.

Джы бжыхьэ лъэхъаным пэтхъу-Iутхъуми ижъотыпIэ къежьэ. ГухэкI нахь мышIэми, зэпахырэ узитIури зэхэхьанхэ алъэкIы ыкIи ащ «микс инфекция» раIо. Ащ фэдэ зыхъурэм цIыфым ар фэукIочIыщтэп. Ащ пае Адыгэ Респуб­ликэм псауныгъэр къэухъумэгъэнымкIэ и Министерствэ, Роспотребнадзорым АдыгеимкIэ и ГъэIорышIапIэ цIыфхэм къяджэ мы Iофыр Iэпэдэлэл амышIынэу, вакцинэр зыхарагъэлъхьанэу.

ЦIыфыбэ зыщызэрэугъоирэ чIыпIэхэм Iоф ащызышIэхэрэм мы узыр къапыхьаным ищынагъо нахь ашъхьарыт. А купым хэхьэх кIэлэегъаджэхэр. Мыгъэрэ илъэс еджэгъур рамыгъэжьэжьызэ коронавирусым пэуцужьырэ вакцинэм ихэлъхьан епхыгъэ Iофтхьабзэм педагогическэ IофышIэхэм япроцент 70-рэ фэдизыр хэлэжьагъ.

ШышъхьэIу мазэр имыкIызэ вакцинациер зыкIугъэхэм ащыщ Мыекъопэ гурыт еджапIэу N 2-м адыгабзэмкIэ икIэлэ­егъаджэу МэщлIэкъо Риммэ. Вакцинацием ухэлэжьэныр — мэхьанэ зиIэ гражданскэ лъэбэкъоу зэрэщытыр ащ къыгурэIо.

— Мы Iофым егъэзыгъэ хэлъэу щытэп. Ау тэ, кIэлэегъа­джэхэм, нэбгырабэмэ тызэрахэтыр зыщыдгъэгъупшэ хъущтэп. Сэ сшъхьэ имызакъоу, мафэ къэс сызыIукIэхэрэм япсауныгъи сыдегупшысагъ. Сыда пIомэ мы узыр зэпахыжьы. Ащ тыщызыухъумэн амалэу джы щыIэу медицинэм иIофы­шIэхэм къаIорэр вакцинэр арыти, илъэс еджэгъур етымы­гъэжьэжьызэ IахьитIури зыхязгъэлъхьагъ, — къыIуагъ МэщлIэкъо Риммэ.

ТигущыIэгъу къызэрэхигъэщыгъэмкIэ, прививкэр ипсауныгъэ лъэшэу къего­уагъэп, ау ыIэпкъ-лъэпкъхэр ыпэрэ мафэм макIэу узыгъэх, чIыпIэу къыз­халъхьаг­ъэр онтэгъоу щытыгъ.

— Вакцинэр зэрэсхэлъым пае къэмынэу Роспотребнадзорым къыгъэнэфэгъэ санитарнэ шапхъэхэр сэгъэцакIэх. Нэгуихъор мэфэ реным сIулъ, бэрэ сIэхэр, пэ кIоцIыр сэтхьакIых, — хи­гъэунэфыкIыгъ кIэлэегъаджэм.