Адыгэ литературэм икъежьэпIэ-уцупIэ Iутыгъэу, ащ лъэныкъуабэкIэ зиIахьышIу хэзышIыхьагъэу Хьаткъо Ахьмэд Джанхъот ыкъор къызыхъугъэр илъэси 120-рэ мэхъу. Ащ фэгъэхьыгъэ мэфэкI къэгъэлъэгъоныр АР-м и Лъэпкъ тхылъеджапIэ къыщызэIуахыгъ.

ТхылъеджапIэм литературэмрэ краеведениемрэкIэ иотдел иIофышIэхэм зэрэхагъэунэфыкIырэмкIэ, А. Дж. Хьаткъор лъэпкъ литературэм игупшыси, ыкIуачIи хэзылъхьэгъэ гъэсагъ. КъыгъэшIагъэр илъэс 36-рэ ныIэп, ау шIагъэу иIэр бэдэд. Итхылъхэм къащиIэтыгъэ Iофыгъохэр непи мэхьанэ зиIэх.

МэфэкI къэгъэлъэгъоным Хьаткъом икъэлэмыпэ къыпыкIыгъэ произведениехэр зыдэт тхылъхэр: «Сыбылым фэкIод», общественнэ-политическэ тхыгъэу «Зао къэхъущта?», инсценировкэхэр зыдэтхэу «КъежьэгъакI», иапэрэ усэхэу 1923-рэ илъэсым гъэзетэу «Адыгэ макъэм» къихьагъэхэр, журналхэм Ахьмэд иусэхэу, рассказхэу, очеркхэу опсауфэ ытхыгъэхэр арытэлъагъох.

УсакIом ежь итворческэ гъогу къизыIотыкIэу, шIошI- еплъыкIэхэу шIэныгъэлэжьхэм, журналистхэм, иIофшIэгъугъэхэм атхыгъэ статьяхэр, рецензиехэр, очерк кIэкIхэр къэгъэлъэгъоным хэлъых, ахэр гъэзет ыкIи журнал зэфэшъхьафхэм къащыхаутыгъэх. Адыгэ тхыгъэ литературэм итомищэу гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм къыщыдэкIыгъэу тишIэныгъэлэжь-литературоведхэм Хьаткъо Ахьмэд ифэшъошэ гущыIэу итворчествэ къыраIуа­лIэхэрэр зыдэтыр къэгъэлъэ­гъоным хэлъ. МэкIайхэм тхылъ зэфэшъхьа­фэу 30 фэдиз атет, ахэр щэIэфэ ежь ытхыгъэхэр ыкIи усакIор зыщымыIэжь уж ипроизведениехэр зыдэтхэу къытырадза­гъэхэр ары. Ахэм зэкIэми Хьаткъо Ахьмэд адыгэ литературэм Iофышхоу филэжьыгъэр, зэрэтхэкIо гъэшIэгъоныгъэр, илъэпкъ паемэ, зэрэпсэемыблэжьыгъэр къащиIотыкIыгъ. Мыщ фэдэ лъэпкъ мэхьанэ зиIэ къэгъэлъэгъонхэм яплъыхэмэ еджакIохэм ыкIи студентхэм къашъхьапэщт.

Дзэукъожь Нуриет.