Мыекъопэ къэлэ администрацием ипащэу Iоф зышIэщтыгъэм къыфызэIуахыгъэ уголовнэ Iофым ылъэныкъокIэ Урысые Федерацием и Следственнэ комитет иследственнэ ГъэIорышIапIэу Адыгэ Республикэм щыIэм зэхэфынэу ышIыгъэхэм къакIэлъыкIоу лажьэ зиIэр хьыкумым ыгъэмысагъ.

УФ-м и Уголовнэ кодекс истатья къызэригъэнафэу, егъэзыгъэ Iоф хэлъэу зэзэгъыныгъэм зэрэкIигъэтхагъэм, къэорэ пкъыгъохэр хэбзэнчъэу зэриIыгъыгъэхэм, зэкъодзэн нэшанэ зиIэ бзэджэшIэгъэ ин зэрэзэрихьагъэм къахэкIыкIэ хъулъфыгъэр агъэмысагъ.

Следствием зэригъэунэфыгъэмкIэ, 2018-рэ илъэсым жъоныгъуакIэм Мыекъопэ къэлэ администрацием ипащэу Iоф зышIэщтыгъэм мэкъумэщ продукцием икъэгъэкIын ыкIи иIугъэкIын дэлэжьэрэ предпринимателыр икабинет къыригъэблэгъагъ ыкIи ащ ичIыгу Iахьэу Мыекъопэ районым щыIэр ежь иемкIэ къырихъожьы шIоигъоу едэуагъ. ЧIыгу Iахьхэм арылъ пчъагъэр ыкIи ауасэр зэрэзэтекIыхэрэр къызыделъытэм, предпринимателыр къезэгъыгъэп. Джащыгъум лажьэ иIэу агъэмысагъэм кIуачIэр къызфигъэфедэзэ предпринимателыр ыгъэщынэу ыублагъ. Нэужым ыгу кIодыгъэу, щынагъом зыщиухъумэзэ Мыекъопэ къэлэ администрацием ипащэу Iоф зышIэщтыгъэм идао фигъэцэкIагъ ыкIи ичIыгу IахькIэ ащ ехъожьыгъ.

Ащ нэмыкIэу агъэмысагъэм иунэу Мыекъуапэ иурамэу Привокзальнэм тетым къэорэ пкъыгъохэр ыкIи щэхэр хэбзэнчъэу щиIыгъхэу къырагъотагъэх.

Джащ фэдэу лажьэ зиIэм 2017-рэ илъэсым бэдзэогъум инэIуасэ горэм ичIыгу Iахьи 3-у Кужорскэ къоджэ псэупIэм щыриIэр гъэпцIагъэкIэ къызIэкIигъэхьан гухэлъ иIэу щэн-щэфын зэзэгъыныгъэм кIигъэтхэнэу къыригъэзыгъагъ. Ау инэIосэ хъулъфыгъэм ичIыгу Iахьхэм ащыщыр нэмыкIым тыритхэн ымылъэкIынэу уполномоченнэ къулыкъоу регистрацие зышIырэм къызэкIигъэкIожьыгъ. Хьыкумым ышIыгъэ унашъомкIэ лажьэ зиIэм илъэси 2-рэ мэзи 6-рэ условнэу тырилъхьагъ. Мы унашъом джыри хэбзэгъэуцугъэ кIуачIэ иIэп.