2014-рэ илъэсым къыщегъэжьагъэу илъэс къэс УФ-м мэкъумэщ хъызмэтымкIэ и Министерствэ журналистхэм, блогерхэм, сурэттех корреспондентхэм апае «Моя земля – Россия» зыфиIорэ зэнэкъокъур зэхещэ.

2020-рэ илъэсым ар къэралыгъо программэу «Къоджэ псэупIэхэм хэ­-хъо­ныгъэ ягъэшIыгъэныр» зыфиIорэм къыдыхэлъытэгъэ проектхэм ащыщ хъу­гъэ.

Къэбар жъугъэм иамалхэм язэнэкъо­къоу мыгъэ щыIэщтым хэлажьэмэ зышIоигъохэм яIофшIагъэхэр аштэнхэу зэрэрагъэжьагъэмкIэ УФ-м мэкъумэщ хъызмэтымкIэ и Министерствэ макъэ къегъэIу, чъэпыогъум и 31-м нэс ащ пIалъэу къыгъэнэфагъ.

Къоджэ псэупIэхэм хэхъоныгъэ ягъэ­шIыгъэнымкIэ, мэкъумэщ туризмэм зегъэушъомбгъугъэнымкIэ опыт зиIэхэм якъэбар лъыгъэкIотэгъэныр, мэкъумэщ хъызмэт IофшIэным нахьыбэу уасэ фашIыныр, лъэпкъ шэн-хабзэхэр къэгъэ­нэжьыгъэнхэр ары пшъэрылъ шъхьаIэу мы Iофтхьабзэм иIэр. Ар номинацие 12-у зэтеутыгъ, мэкъумэщ производствэм, къоджэ псэупIэхэм, социальнэ Iофыгъохэм ахэр афэгъэхьыгъэх.

Къэралыгъо хэбзэ органхэм ялIыкIохэр, зэлъашIэрэ журналистхэр, блогерхэр, гъэхъэгъэ инхэр зышIыгъэ фермерхэр жюрим хагъэхьагъэх. IофшIагъэхэм къыщаIэтыгъэ темэр игъомэ, икъоу ар къыгъэлъэгъуагъэмэ, дизайнер екIолIакIэ иIэу гъэпсыгъэмэ, логикэ хэлъымэ, нэмыкIыбэхэр къыдалъытэзэ ахэм уасэ афашIыщт.