Адыгеим и ЛIышъхьэу КъумпIыл Мурат Адыгэ Респуб­ликэм хэдзынхэмкIэ и Гупчэ комиссие и Тхьаматэу Сэмэгу Нурбый Iоныгъом и 17 – 19-м щыIэгъэ мэкъэтынхэм якIэуххэмкIэ пэшIорыгъэшъ зэфэхьысыжьэу къышIыгъэм тыгъуасэ едэIугъ.

Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэу Владимир Свеженец зэIукIэм хэлэ­жьагъ.

Адыгэ Республикэм хэдзынхэмкIэ и Гупчэ комиссие къызэритыгъэмкIэ, хэдзынхэр Адыгеим щыкIуагъэхэкIэ, цIыфхэр ащ чанэу ахэм хэлэжьагъэхэкIэ алъытагъ. ХэдзакIохэм япроцент 68-м фэдиз а хэдзыпIэхэм къякIолIагъ.

Республикэм и ЛIышъхьэ зэрэхигъэу­нэфыкIыгъэмкIэ, мэхьанэшхо зиIэ хъугъэ-шIагъэу хэдзынхэр щытых, ахэм кIэухэу афэхъухэрэм бэкIэ ялъытыгъэщт илъэси 5-м къыкIоцI хэгъэгуми, респуб­ликэми хэхъоныгъэу ашIыщтыр.

Шъугу къэтэгъэкIыжьы хэдзын Iоф­тхьэбзэ 20 Iоныгъом и 19-м Адыгеим зэрэщыкIуагъэр, Урысые Федерацием и Къэралыгъо Думэ, Адыгэ Республикэм и Къэралыгъо Совет – Хасэм, муниципальнэ образованиехэм ялIыкIо къулыкъу заулэмэ ядепутатхэм яхэдзынхэм цIыфхэр зэрахэлэжьагъэхэр.

Адыгеим ихэдзакIохэм азыныкъо нахьыбэмэ партиеу «Единэ Россиемрэ» Урысыем и Президентэу Владимир Путиным пхырищырэ курсымрэ къадырагъэштагъ.

ХэдзыпIэ кой зыкIымкIэ Къэралыгъо Думэм хэтыщтхэм яхэдзын икIэуххэмкIэ пэщэныгъэр зыубытыгъэр партиеу «Единэ Россиер» ары, Адыгеим щыпсэухэрэм япроцент 66,45-мэ е нэбгырэ мини 154,5-мэ амакъэ ащ фатыгъ. Къэ­ралыгъо Думэм идепутатхэм яхэдзынкIэ цIыфхэм япроцент 14,57-мэ е нэбгырэ мин 34-м фэдизмэ КПРФ-м, проценти 6,54-мэ е нэбгырэ мин 15-м ехъумэ ЛДПР-м къыдырагъэштагъ. Урысые Феде­рацием и Къэралыгъо Думэ идепутатхэм яхэдзынхэм къащагъэлъэгъогъэ адрэ партиехэр проценти 5-м Адыгеим щынэсынхэ алъэкIыгъэп.

Зы мандат зиIэ коимкIэ Къэралыгъо Думэм идепутатхэм яхэдзынкIэ апэ ишъыгъэр ежь-ежьырэу зыкъэзгъэлъэгъожьыгъэу, «Единэ Россием» хэтэу Владислав Резник ары. ХэдзакIохэм япроцент 64,81-мэ е нэбгырэ 150217-мэ амакъэ ащ фатыгъ.

Адыгэ Республикэм и Къэралыгъо Совет – Хасэм идепутатхэм яхэдзынкIэ пэрытныгъэ зыубытыгъэр партиеу «Единэ Россиер» ары. Нэбгырэ мини 154-мэ е хэдзакIохэм япроцент 66,73-мэ амакъэ ащ фатыгъ. ХэдзакIохэм япроцент 17,65-мэ е нэбгырэ мин 40,7-м ехъумэ КПРФ-м, нэбгырэ мин 18-м фэдизмэ е проценти 7,74-мэ ЛДПР-м, нэбгырэ мин 14-м ехъумэ е хэдзакIохэм япроценти 6,14-мэ партиеу «Справедливая Россия – Патриоты – За правду» зыфиIорэм амакъэ фатыгъ.

Республикэм и Къэралыгъо Совет – Хасэм изэIугъэкIэгъукIэ ыпэкIэ хэтыгъэ партием фэдиз джыри хэтыщтыр. Партийнэ спискэхэмкIэ «Единэ Россием» чIыпIэ 18, КПРФ-м – чIыпIи 4, ЛДПР-м – чIыпIи 2, партиеу «Справедливая Россия – Патриоты – За правду» зыфиIорэм зы чIыпIэ ратыщт. ПстэумкIи республикэм ипарламент депутат 49-рэ щыхадзыгъ. Тыгъэгъазэм и 19-м хэ­дзынхэр аухыщтых, Адыгэ Республикэм и Къэралыгъо Совет – Хасэм хэтыщт зы депутатыр а мафэм джыри хадзыщт.

Къалэу Мыекъуапэ ихэдзэкIо комиссиеу N 158-м итхьаматэ хэбзэнчъэу зэрэзекIуагъэм фэгъэхьыгъэ тхьаусыхэ тхылъым зэрэхэплъагъэхэм фэгъэхьы­гъэу Сэмэгу Нурбый къыIотагъ. Адыгэ Респуб­ликэм хэдзынхэмкIэ и Гупчэ комиссие и Тхьаматэ зэрэхигъэунэфыкIыгъэмкIэ, хэдзынхэр республикэм шъхьэихыгъэу, хабзэм диштэу щызэхащагъэх.

«Республикэм исхэм мэкъэтынымкIэ чаныгъэ къызхагъэфагъ. Ащ мэхьанэшхо иIэу щыт – цIыфхэм къыхахырэм елъытыгъэщт тихэгъэгуи, республикэми тапэкIэ хэхъоныгъэу ашIыщтыр зыфэдэр. Мэкъэтыным чанэу зэрэхэлэжьагъэхэм фэшI хэдза­кIохэм лъэшэу сафэраз! Хэдзын Iофтхьабзэхэм ахэлэжьагъэхэми, хабзэм диштэу ахэр зэхэщэгъэнхэм фэIорышIагъэхэми, общественнэ рэхьатныгъэмрэ санитар шапхъэ­хэмрэ къыдэзылъытагъэхэми шъхьафэу тхьашъуегъэпсэу ясэIо», – къыIуагъ КъумпIыл Мурат.

Адыгэ Республикэм и ЛIышъхьэ ипресс-къулыкъу