Адыгэ Республикэм икомиссиеу промышленнэ продукциер хэбзэнчъэу зэрагъэзекIорэм пэуцужьырэм изэхэсыгъоу тыгъуасэ щыIагъэм гъомылапхъэхэр къэбзэнхэм, ахэм фашIэ яIэн зэрэфаем, социальнэ организациехэм шапхъэхэм адимыштэхэрэ гъомлапхъэхэр ащамыгъэфедэнхэм япхыгъэ Iофыгъохэм ыкIи нэмыкIхэм щатегущыIагъэх.

Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу Адыгэ Республикэм и Премьер-министрэу Геннадий Митрофановым зэхэ­сыгъор зэрищагъ.

Роспотребнадзорым Адыгэ РеспубликэмкIэ и ГъэIорышIапIэ ипащэу Сергей Завгороднер консерв продукциер къызэрэдагъэкIырэм къытегущыIагъ. Ащ зэрэхигъэунэфыкIыгъэмкIэ, пцэ­жъыем, хэтэрыкIхэм, пхъэшъхьэ- мышъхьэхэм консервхэр ахэзышIыкIхэрэ предприятиехэм хэукъоныгъэхэр ашIыгъэу рес­публикэм къыщыхагъэщыгъэп. Ау консервэ лъэпкъихыр шапхъэ­хэм адимыштэу тучанхэм ащыщ горэм щагъэунэфыгъ. СатыушI предприятиехэм Iэ­натIэхэр ащызыIыгъхэм административнэ пшъэдэкIыжь арагъэхьыгъ.

2020-рэ илъэсым уплъэкIунэу зэхащэгъагъэхэм якIэуххэм атетэу Джэджэ районым иконсервышI цех горэ къызэтырагъэуцон фаеу хъугъагъэ. Санитар-гигиенэ шапхъэхэр аукъохэзэ мыщ консервхэр къыщыдагъэкIыщтыгъэх.

2020 – 2021-рэ илъэсхэм гъо­млэпхъэшI промышленностым ипредприятии 172-рэ зауплъэ­кIухэм, хэукъоныгъэ 352-рэ къы­хагъэщыгъ, административнэ хэубзэукъоныгъэхэр зэрашIы­гъэм­кIэ протоколи 147-рэ зэхагъэуцуагъ, сомэ миллионрэ мини 124,6-рэ зытефэгъэ тазырхэр арагъэпщыныжьыгъэх, нэбгырэ 42-мэ афагъэпытагъ, хьыкумхэм материали 7 аIэкIагъэхьагъ.

Россельхознадзорым и Къыблэ шъолъыр гъэIорышIапIэ иотдел ипащэ игуадзэу Алексей Рабуш зэхэсыгъом къызэрэщи­IуагъэмкIэ, федеральнэ къэралыгъо лабораторнэ уплъэкIунхэм къадыхэлъытагъэу 2021-рэ илъэсым Адыгэ Республикэм игъомлэпхъэ лъэпкъи 179-р Таможеннэ союзым ишапхъэхэм зэрадиштэрэр ауплъэкIугъ. Гъом­лэпхъи 7-р шапхъэхэм адимыштэу алъытагъ. Социальнэ организациехэм ащарагъэшхырэ гъомлэпхъэ лъэпкъ 16-р зауплъэкIум, лъэпкъи 4-р шапхъэхэм адимыштэу къычIэ­кIыгъ. Ахэр къыдэзыгъэкIыгъэ предприятиехэм административнэ пшъэдэкIыжь арагъэхьыгъ.

Адыгеим и Премьер-министрэу Геннадий Митрофановым зэхэсыгъом зэрэщыхигъэунэфыкIыгъэмкIэ, фашIэ зимыIэ гъом­лапхъэхэр къызэрэхагъэщы­хэрэм имызакъоу, ахэр респуб­ликэм къизыщэхэрэми ягъогупэ пыбзыкIыгъэн фае. КIэлэцIыкIу IыгъыпIэхэми еджапIэхэми кIэлэцIыкIухэр дэгъоу ащагъэшхэнхэм гъунэ лъыфыгъэным мэхьанэшхо зэриIэр шъхьафэу хагъэунэфыкIыгъ. Республикэм и ЛIышъхьэу КъумпIыл Мурат ащ фэдэ пшъэрылъ хэбзэ къулыкъухэми муниципалитетхэми афигъэуцугъ.

Джащ фэдэу этил спиртымрэ шъон пытэхэмрэ хэбзэнчъэу Адыгеим къызэрэщырагъэкIокIырэм зэрэпэуцужьыхэрэми зэ­хэсыгъом щытегущыIагъэх, кIэлэцIыкIухэм атегъэпсыхьэгъэ товархэмрэ джэгуалъэхэмрэ Адыгэ Республикэм хэбзэнчъэу зэрэщызэрагъакIохэрэм пэуцу­жьыгъэнымкIэ Iофэу ашIэхэрэми мыщ щыхэплъагъэх.

Адыгэ Республикэм и ЛIышъхьэ ипресс-къулыкъу