Лъэпкъ проектэу «Культура» зыфиIорэм къыхиубытэу искусствэхэмкIэ кIэлэцIыкIу еджапIэу Джаджэ дэтыр агъэцэкIэжьы. ЗэкIэмкIи а IофшIэнхэм афэшI къафатIупщыгъ сомэ миллион 14-рэ мин 16,8-рэ.

Мы мафэхэм яхъулIэу еджапIэм ия 2-рэ къат тет еджэпIэ классхэр зэрэзэтеутыгъэ дэпкъхэр агъэкIэжьыгъэх макъэр нахь зыгъэмэкIэрэ материалхэр агъэфедэхэзэ, шъхьаныгъупчъэхэр, пчъэ­хэр, джэхашъохэр, инженер коммуникациеу жъы хъугъэхэр зэблахъугъэх. Джащ фэдэу электричествэр зэрыкIощтыр кIэу псэуалъэм зэрэпсаоу щызэбгыращыгъ, видеолъыплъэныр ыкIи машIом зыкъиштэмэ макъэ къэзыгъэIущтыр хэтынхэм пае электрокабелыр ращагъ. Псэуалъэм псырыкIуапIэу иIэхэр агъэкIэжьыгъэх, канализациери ашIыгъ. Унашъхьэри жъы хъугъэти, ари агъэцэкIэжьыгъ.

Псэуалъэм иапэрэ къат плиткэ тыралъхьагъ, унэ кIоцIхэм ядэпкъхэр аухыгъэх, фабэр къэзытыщт системэр агъэкIэжьыгъ. Санитар-техническэ унэу еджапIэм хэтхэм ягъэцэкIэжьын аухыгъ.

«ГъэцэкIэжьын IофшIэнхэр зэкIэ чъэпыогъум аухынхэу щыт. Лъэпкъ проектэу «Культурэм» ишIуагъэкIэ мырэущтэу зэтырагъэпсыхьэгъэ еджа­пIэм щеджэхэрэми, специалист ныбжьыкIэхэми къахэхъонэу тэгугъэ. Амалэу тиIэхэм тиеджапIэ ирейтинги зыкъырагъэIэтыщт, ны-тыхэми ащ анаIэ тырадзэн тшIошIы. ТехнологиякIэхэм яшIуагъэкIэ еджапIэм зипсауныгъэ пыч фэхъугъэ, сэкъатныгъэ зиIэ кIэлэцIыкIухэри щеджэнхэ алъэкIыщт», — къы­Iуагъ Джэджэ районым культурэмкIэ и ГъэIорышIапIэ ипащэ ипшъэрылъхэр зыгъэцэкIэрэ Наталья Авгеринам.