Бжыхьэм аугъоижьырэ пхъэшъхьэ-мышъхьэхэм ащыщ мыIэрысэр. ЧIыпIэ зэфэшъхьафхэм мыIэрысэ лъэпкъ зэфэмыдэхэр къащагъэкIых, ащагъэбагъох. Чъыгхатэхэр дахэх, лэжьыгъэ бэгъуагъэкIэ цIыфхэм къятэх.

Хэгъэгу кIоцI зекIоным изы Iахьэу мыIэрысэхэр къызща­гъэкIхэрэ чIыпIэхэр зыплъы­хьакIохэм ямаршрут хэбгъа­хьэхэмэ ишIуагъэ къэкIощт. Анахьэу автомобилым исхэу зыкъэзыплъыхьанэу гъогу те­хьэхэрэмкIэ ар нахь IэшIэх.

БэмышIэу «Лента ру»-м иредакцие къыIэкIэхьэгъэ къэбархэу мыIэрысэхэр къызща­гъэкI­хэрэ шъолъырхэу ыкIи чIыпIэ гъэнэфагъэхэу къаплъы­хьагъэхэм къащалъэгъугъэхэмкIэ зэфэхьысыжьхэр ашIыгъэх.

Ахэм ахалъытагъэх «Антоновские яблоки» зыфиIорэ лъэпкъэу Коломнэ къыщагъэкIырэр, Липецкэ, Волгоградскэ ыкIи Тульскэ хэкухэм ащагъэбэгъо­хэрэ мыIэрысэхэр. Анахь мыIэрысэ чъыгхэтэ дэгъухэр Урысыем икъыблэ лъэныкъокIэ къызщагъэкIыхэрэм Адыгейри ахэфагъ. ПсэупIэу Абадзехскэм щалъэгъугъэхэ хатэхэр агу рихьыгъэх, къызэрагъэкIырэ шIыкIэр зэрагъэшIагъэ, чъыгхэр къаплъыхьагъэх. Абадзехскэм къыщагъэкIхэрэ мыIэрысэ чъыг­хэм чIыгу гектар 326-рэ зэлъау­быты, тапэкIэ пчъагъэм хагъэ­хъощт. МыIэрысэ лъэпкъхэу «гала», «антоновка», «ред делишес» зыфиIохэрэр гохьых, яIэшIугъэ-хэфагъэхэмкIэ зэтекIых.

Чъыгхэм къатыгъэ лэжьы­гъэр аугъоижьыфэкIэ чъыгхатэхэр зыфэдэхэр, чIыгоу къызща­гъэкIхэрэр, узэрадэлэжьэщт шIыкIэр зыгъэпсэфакIохэм арагъэлъэгъущтых, мыIэрысэхэм ядэгъугъэ арагъэшIэщт.

МыIэрысэхэр зэрэIэшIухэм фэдэу ахэр къызщыкIыхэрэ чъыг­хатэхэри зэрагъэпшагъэх. Абадзехскэм щыIэхэр анахь дахэхэм ахалъытагъэх.

Адыгэ Республикэм и ЛIышъхьэу КъумпIыл Мурат мыIэрысэ лъэпкъ зэфэшъхьафхэм якъэгъэ­кIын ренэу лъэплъэ. БэмышIэу ар Абадзехскэм къыщагъэкIы­хэрэ мыIэрысэ чъыгхатэхэм ащыIагъ. Ахэр загъэтIысыгъэхэр илъэси 10 хъугъэ. Лэжьыгъэ къэзытыхэрэм илъэс къэс къахэ­хъо. ШIыкIэ-амалыкIэхэр зэрагъэфедэхэрэм ишIуагъэ къэкIо. Жьы къабзэм хэтхэу къэкIыхэрэ чъыгхэм къапахырэ мыIэрысэр къабзэ, нитратхэр хэлъэп.

Абадзехскэм къыщагъэкIхэрэ мыIэрысэхэр Адыгеим изакъоп зыщащэхэрэр, ахэм къакIэупчIэ­хэрэм япчъагъэ илъэс къэс къыхэхъо. Мыекъопэ мыIэрысэхэр мы лъэхъаным Москва къыщегъэжьагъэу Сахалин нэсэу ащэх. МыIэрысэ чъыгхатэхэм республикэм федэ къыфахьэу рагъэжьагъ. ТапэкIи ахэр къыз­щагъэкIхэрэ чIыгу гектархэм ахагъэхъощт.

ПкIышъхьэ-мышъхьэхэр зыщаIыгъыщт гъэучъыIэлъэ комплексэу Абадзехскэм щашIы­гъэм мыIэрысэ тонн мини 6 фэдиз чIэфэщт. Оборудованиеу чIагъэуцуагъэм ишIуагъэкIэ мыIэрысэу ачIэлъхэм ятеплъэ къызэрэзэтыригъанэрэм фэшъхьафэу, ахэм яIэшIугъи къыщыкIэрэп. ЗэкIэмкIи республикэм пхъэшъхьэ-мышъхьэ тонн мин 20-м ехъу зычIэфэрэ гъэучъы­Iалъэхэр щагъэфедэх. 2024-рэ илъэсым нэс тонн мин 50 фэдиз зыщаIыгъыщт гъэтIылъыпIэхэр тиIэ хъущтых.