АдыгеимкIи апэ хъугъэх
Адыгеим мэфищ хэдзынхэр зыщэкIохэм, Урысые Федерацием и Къэралыгъо Думэрэ Адыгэ Республикэм и Къэралыгъо Совет – Хасэмрэ ядепутатыщтхэмкIэ анахьыбэу цIыфхэм амакъэ зыфатыгъэу пэшIорыгъэшъ зэфэхьысыжьхэмкIэ агъэунэфыгъэр партиеу «Единая Россия» зыфиIорэр ары.
Къэралыгъо Думэр тштэмэ, партием ифракцие парламентым хэтыщтхэм азыныкъо нахьыбэ щиубытыщт. Хэбзэгъэуцу къулыкъукIэм хэхьащтых общественникхэр, волонтерхэр ыкIи медицинэм иIофышIэхэр.
Адыгеим щыпсэухэрэм япроцент 66,45-мэ амакъэ афатыгъ «Единэ Россием» щыщхэу Къэралыгъо Думэм хэхьащтхэм. Зы мандат зиIэ шъолъырхэмкIэ Думэм Адыгеим илIыкIоу хэхьащтыр Владислав Резник. Мыр бэкIэ нэмыкIхэм апэ ишъыгъ ыкIи процент 64,81-рэ ригъэкъугъ. Шъугу къэдгъэкIыжьын, 2016-рэ илъэсым щыIэгъэ хэдзынхэм пчъагъэр зэрэхъущтыгъэр процент 57,41-рэ.
«Единэ Россием» илIыкIохэр АР-м и Къэралыгъо Совет – Хасэм ия 7-рэ зэIугъэкIэгъуи хэхьанхэмкIэ джащ фэдэу бэмэ амакъэ афатыгъ – процент 66,73-рэ. Партием дезыгъэштагъэхэм япчъагъэ нэбгырэ 153862-рэ мэхъу.
КПРФ-м ятIонэрэ чIыпIэр ыIыгъ – процент 17,65-рэ (нэбгырэ 40706-рэ), ящэнэрэ чIыпIэм щыт ЛДПР-р – проценти 7,47-рэ (нэбгырэ 17843-рэ), партиеу «Справедливая Россия – Патриоты – За правду» зыфиIорэм хэтхэм яплIэнэрэ чIыпIэр аубытыгъ – проценти 6,14-рэ (нэбгырэ 14162-рэ).
«Единэ Россием» хэтхэм къызэраIорэмкIэ, фэдэ зэфэхьысыжь хъунымкIэ зишIуагъэ къэкIуагъэхэр партиер зэрагъэкIэжьыгъэмрэ лъэпкъ программэм Iоф зэрэдашIагъэмрэ.
Адыгеим и ЛIышъхьэу КъумпIыл Мурат республикэм щыпсэухэрэр чанэу хэдзынхэм зэрахэлэжьагъэхэм пае социальнэ хъытыухэмкIэ рэзэныгъэ гущыIэхэр цIыфхэм апигъохыгъэх.
«ХэдзыпIэхэм къызэрякIолIагъэхэмкIэ зэфэхьысыжьхэм къагъэлъэгъуагъ къэралыгъом къырыкIощтым тицIыфхэр зэригъэгумэкIыхэрэр.
ХэдзакIохэм янахьыбэм амакъэхэр фатыгъэх партиеу «Единэ Россием» ыкIи Урысыем и Президент зэшIуихырэ Iофыгъохэм.
Шъуицыхьэ тежъугъэлъ хэдзакIохэм яшIоигъоныгъэхэу партием и Лъэпкъ программэ хэхьагъэхэр ыкIи «Единэ Россием» хэтхэм аIукIэхэ зэхъум къаIэтыгъэхэр гъэцэкIагъэ зэрэхъухэрэм сэ сшъхьэкIэ, республикэм и ЛIышъхьэ ыкIи партием ишъолъыр къутамэ исекретарь IэнатIэхэм къахиубытэу, сызэралъыплъэщтым», – къытхыгъ КъумпIыл Мурат.