Iоныгъом и 17-м щегъэжьагъэу и 19-м нэс Урысыем и Къэралыгъо Думэ ыкIи Адыгеим и Къэралыгъо Совет – Хасэм ядепутатхэм яхэдзынхэу республикэм щыкIуагъэхэр хэбзэгъэуцугъэм диштэу, шъыпкъагъэ хэлъэу зэхэщэгъэнхэм фытегъэпсыхьагъэу Адыгэ Республикэм и Общественнэ палатэ къыщызэIуахыгъэ общественнэ видеолъыплъэным и Гупчэ IофшIэнэу ыгъэцэкIагъэр тыгъуасэ зэфахьысыжьыгъ. Мыщ фэгъэхьыгъэ зэхэсыгъоу зэхащагъэм тхьамэтагъор щызэрихьагъ АР-м и Общественнэ палатэ и Тхьаматэу Устэ Руслъан, Iофтхьабзэм хэлэжьагъэхэм ащыщых Москва къикIыгъэ экспертэу Сергей Числовыр, республикэм иобщественнэ организациехэм ыкIи политикэ партиехэм ялIыкIохэр.

Устэ Руслъан къызэриIуагъэмкIэ, жъоныгъуакIэм IофшIэныр рагъэжьагъ. ЗэкIэмкIи общественнэ лъыплъэкIо 530-рэ фэдиз рагъэджагъ. Хэдзынхэр зыщыкIогъэ мафэхэм партие зэфэшъхьафхэм къагъэнэфэгъэ лъыплъакIохэр, нэбгырэ 15-м щегъэжьагъэу 20-м нэс, Гупчэм чIэсыгъэх. Адыгеим хэдзынхэмкIэ икомиссии 139-мэ ыкIи чIыпIэ участки 9-мэ камерэхэр ачIэтыгъэх, ахэм ачIэхъухьэрэр зэкIэ общественнэ лъыплъакIохэм алъэгъугъ. Хэукъоныгъэ е щыкIагъэ горэ щымыIагъэу пфэIощтэп, ау зэрэпсаоу пштэмэ, общественнэ видеолъыплъэным иIофшIэн зэрифэшъуа­шэу зэхэщагъэ хъугъэ. ХэдзыпIэхэм зэмызэгъыныгъэхэр къачIэтаджэхэу къыхэкIыгъ, ау ахэр псынкIэу щагъэзыещтыгъэх. Зыфэехэ е ашIогъэшIэгъон хэдзыпIэ участкэ хэхыгъэм общественникхэр лъыплъэнхэ амал яIагъ.

— Мы системэр апэрэу къэралыгъом щагъэфедэ, арышъ, иIофшIэн щыкIагъэхэр фэхъунхэ ылъэкIыщт. Опытэу тIэкIэлъ хъугъэр джы дгъэпытэзэ, тапэкIэ къызфэдгъэфедэным мэхьанэшхо иI. Видеолъыплъэным ишIуагъэ къызэрэкIуагъэр мы хэдзынхэм къагъэлъэгъуагъ, — къы­Iуагъ Устэ Руслъан.

Сергей Числовым анахь шъхьа­Iэу ынаIэ зытыридзагъэр ыкIи мэхьанэшхо зэритыгъэр общественнэ лъыплъакIохэм ныбжьыкIабэ зэрахэтыгъэр ары. Хэдзынхэм язэфэхьысыжьхэм закъыфэбгъазэмэ, щыкIэгъэ мыинхэр щыIагъэх нахь мышIэми, кампаниер шэпхъэшIухэм адиштэу республикэм зэрэщызэхащагъэр экспертым хигъэу­нэфыкIыгъ.

ТХЬАРКЪОХЪО Адам. Сурэтхэр Iэшъынэ Аслъан тырихыгъэх.