Адыгеир Пермь дэшъыгъо
Тыгъоспчэдыжь сыхьатыр 11-хэм адэжь Пермь икъэралыгъо лъэпкъ шIэныгъэ-ушэтын университет ищагу амышIэрэ цIыфыр Iашэ ыIыгъэу къыдахьи, еджакIо щыIэ студентхэм яоу ыублагъ. Нэбгыри 8 ыукIыгъ, 24-м нахьыбэм шъобжхэр атырищагъэх.
Адыгеим и ЛIышъхьэу КъумпIыл Мурат зищыIэныгъэ зэпыугъэхэм яIахьылхэм афэтхьаусыхагъ:
— Пермь тхьамыкIэгъошхо къыщыхъугъ. Къэралыгъо университетым нэбгыри 8 щаукIыгъ, 20-м нахьыбэ къыщауIагъ. Адыгеим щыпсэухэрэм ацIэкIэ щымыIэжьхэм яIахьыл-благъэхэм сафэтхьаусыхэ, шъобжхэр зытещагъэхэм псынкIэу япсауныгъэ зэтеуцожьынэу сафэлъаIо.
ТхьамыкIагъоу къихъухьагъэм ыпкъ къикIэу непэ Пермь хэкум шъыгъо-шIэжь мафэу щагъэнэфагъ. Быракъхэр къырагъэхыгъэх, чэф зыхэлъ Iофтхьабзэхэр зэкIахьагъэх.