Мы мылъку тедзэм ишIуагъэкIэ километрэ 23-рэ зикIыхьэгъэ гъогухэр шапхъэхэм адиштэу зэтырагъэпсыхьащтых.

Ведомственнэ программэу «Шъолъыр, муниципальнэ ыкIи чIыпIэ мэхьанэ зиIэ автомобиль гъогухэм хэхъоныгъэ ашIынымкIэ IэпыIэгъу ягъэгъотыгъэныр» зыфиIорэм игъэцэкIэн къыды­хэлъытагъэу федеральнэ ахъщэ тедзэу сомэ миллиард 30 хъурэр къэралыгъом исубъект 84-мэ атырагощагъ. Ащ фытегъэпсы­хьэгъэ зэзэгъыныгъэм зэдыкIэтхагъэх «Росавтодорымрэ» шъолъырхэмрэ. Шъугу къэдгъэ­кIыжьын, Урысыем и Правительствэ иунашъокIэ мылъку тедзэр IэпэчIэгъэнэ фондым къыхагъэкIыгъ.

Федеральнэ IэпыIэгъум ишIуа­гъэкIэ километрэ 2000-м ехъу зэрылъ гъогухэр шапхъэхэм адиштэу зэтырагъэпсыхьанхэу агъэнафэ. Ахэм ахэхьэх социальнэ мэхьанэ зиIэ гъогухэр ыкIи магистральхэр, джащ фэдэу урам-гъогу сетьхэм яIахьхэр. Къэралыгъом ишъолъыр 84-мэ ягъогухэм атыралъхьащтыр квадратнэ метрэ миллион 17,7-рэ мэхъу.

УФ-м и Правительствэ иунашъокIэ Адыгеим сомэ миллион 225-рэ къыфатIупщыгъ. А мылъкумкIэ агъэцэкIэжьыщтых «Мыекъуапэ – Джаджэ – Псыбай – Зеленчукскэр – Карачаевск», «Кощхьабл – Соколов», «Хьакурынэхьабл – Пщыжъхьабл», «Краснэр – Аскъэлай», «Пэ­нэжьыкъуай – Пщыкъуйхьабл», «Суповскэр – Отраднэр», «Тэ­хъутэмыкъуай – Козэт – Новэр – Яблоновскэр» зыфиIорэ гъогухэм ячIыпIэ хэхыгъэхэр, джащ фэдэу къуаджэхэу Блащэпсы­нэрэ Хьакурынэхьаблэрэ, къутырхэу Свободный Трудымрэ Колхознэмрэ якIолIэрэ гъогухэр зэтырагъэпсыхьащтых. Шъолъы­рымкIэ мэхьанэшхо зиIэ псэуа­лъэу мыхэр щытых.

Джащ фэдэу ахъщэ тедзэм ишIуагъэкIэ къуаджэу Блащэпсынэ екIолIэрэ гъогум ишIын нахь псынкIэу аухыщт. Мы объектым социальнэ мэхьанэшхо иI, сыда пIомэ ащ гурыт еджапIэр къыхеубытэ.

– Лъэпкъ проектым игъэцэкIэн изэфэхьысыжь шъхьа­Iэр шъолъыр ыкIи чIыпIэ мэхьанэ зиIэ автомобиль гъо­гухэм язытет бэкIэ нахьышIу зэрэхъугъэр ары. Федеральнэ ахъщэ тедзэм ишIуагъэкIэ ыпэ титэу шъолъыр проектым икъэгъэлъэгъонхэм такIэхьан тлъэкIыщт, – къыIуагъ Адыгеим псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэу Валерий Картамышевым.

Непэрэ мафэм ехъулIэу Iоф­шIэнхэр зэкIэ рагъэжьагъэх ыкIи ыкIэм факIох, 2021-рэ илъэсым чъэпыогъум и 15-м нэс объект­хэр атынхэу агъэнафэ.

Ащ нэмыкIэу, лъэпкъ проектэу «Щынэгъончъэ, шэпхъэшIу­хэм адиштэрэ гъогухэр» зыфиIорэм игъэцэкIэн къыдыхэлъытагъэу республикэм федеральнэ IэпыIэгъу къыIэкIэхьэ. ГущыIэм пае, 2021-рэ илъэсым Адыгеим сомэ миллиард 1,6-м ехъу къыфатIупщыгъ. Ащ ишIуа­гъэкIэ псэолъэ 55-рэ шапхъэ­хэм адиштэу зэтырагъэпсыхьащтых. Гъогухэм якIыхьагъэ километрэ 75-м ехъу, мы уахътэм ехъулIэу IофшIэнхэм япроцент 80-р шъолъырым щагъэцэкIагъ.