Адыгеим фэгъэхьыгъэ къэтын агъэхьазыры
Тревел-шооу «By Foreigners-Россия глазами иностранца» зыфиIорэм иящэнэрэ уцугъо щыщ техыгъэр Адыгэ Республикэм фэгъэхьыгъэщт. Iоныгъом и 15-м къыщегъэжьагъэу и 18-м нэс Шри-Ланка къикIыгъэ студентым Адыгем ичIыпIэ анахь дахэхэр къыкIухьагъэх.
Проектым къыдыхэлъытагъэу Урысыем ичIыпIэ зэфэшъхьафхэр ныбжьыкIэхэм къакIухьэ, ахэм ащыпсэурэ цIыф лъэпкъхэм якультурэ, яшэн-хабзэхэр зэрагъашIэх. Ащ дэлажьэх АНО-у «Центр международных молодежных инициатив» зыфиIорэмрэ Тюменскэ къэралыгъо университетым гъэсэныгъэмкIэ идунэе Гупчэрэ. ШэкIогъум и 14-м YouTube-каналым By Foreigners-р къихьащт.
Шри-Ланка къикIыгъэ хьакIэм Адыгэ Республикэм ичIыпIэ анахь дахэхэр къызэрикIухьэхэрэр тырахыгъ. Адыгэхэм яшэн-хабзэхэр зэрагъэшIагъэх, якультурэ зэрагъэлъэгъугъ. Проектым зэкIэмкIи серии 10 хэтыщт, Урысыем ишъолъыр пэпчъ шъхьафэу къытегущыIэщтых. Ахэр зэкIэ тыгъэгъазэм и 21-м нэс къагъэлъэгъожьыщтых. Проектым иящэнэрэ уцугъо социальнэ сетьхэр къызфагъэфедэхэзэ нэбгырэ миллиони 3-м ехъу еплъынэу агъэнафэ.
— IэкIыб къэралхэм къарыкIырэ студентхэм тикультурэ нэмыкI нэкIэ тырагъэплъы. Тэ, Урысыем щыпсэухэрэм, гъунэгъу шъолъырхэм арысхэм яшэн-хабзэхэр зыфэдэхэр зэхэтэхых, тэшIэх. Апэрэу ахэр зылъэгъурэм гу зылъитэрэ лъэныкъохэр зэхэпхыныр гъэшIэгъоны, — еIо проектым иавторэу Даниил Грамотиным.
IэкIыб къэралхэм ащыпсэурэ ныбжьыкIэхэм яшIошIыкIэ, Урысыем ис лъэпкъ зэфэшъхьафхэм якультурэ, ящыIэкIэ-псэукIэ YouTube проектым къыщагъэлъагъо. Ащ пае IэкIыб къэралыгъохэм къарыкIыгъэ студентхэу тикъэралыгъо щеджэхэрэр чIыпIэ зэфэшъхьафхэм агъакIох. Апэрэ сезоным ипремьерэ 2020-рэ илъэсым ищылэ мазэ щыIагъ. Ащ хэхьэрэ серии 7-мэ гъогогъу 250000-рэ яплъыгъэхэу агъэунэфыгъ, ятIонэрэм 2000000-рэ ыугъоигъ. Камчаткэ, Якутием, Сахалин, Бурятием, Иркутскэ ыкIи нэмыкIхэм афэгъэхьыгъэхэм къатегущыIагъэх.
Адыгеим къэкIогъэ хьакIэм ылъэгъугъэр зэкIэ шIогъэшIэгъоныгъ, бэрэ джыри ыгу зэрилъыщтыр къыIуагъ. Къызыщыхъугъэ Шри-Ланка ичIыопс зэрэфэдэр ащ къыхигъэщыгъ. Лэгъо-Накъэ, Азыщ гъочIэгъым, Хьаджэхъу тIуакIэм, Рыфабгъо ипсыкъефэххэм, къэлэ паркым ыкIи Мэздахэ ар ащагъ.
Нэужым адыгэ шъуашэхэр зыдырэ Цурмыт Рузанэ дэжь кIалэр рагъэблэгъагъ. Адыгэхэм якультурэ, яшэн-хабзэхэр шIогъэшIэгъонэу зэригъэшIагъ. Адыгэ шъуашэр ыгу рихьыгъ, ащ мэхьанэу иIэм, ныбжьыкIэхэм ар зыщалъэмэ къыкIэупчIагъ. Рузанэ адыгэ шъуашэм фэгъэхьыгъэ тарихъыр къыфиIотагъ. Ащ шIогъэшIэгъонэу едэIугъ ыкIи ежьхэм ялъэпкъ шъуашэ зыфэдэм щигъэгъозагъэх. Нэужым бзылъфыгъэ IэпэIасэм хэдыкIынымкIэ мастер-класс къыгъэлъэгъуагъ.
Республикэм къэкIуагъэхэр адыгэ шхынхэмкIэ ахьэкIагъэх ыкIи ахэр зэраупщэрыхьэхэрэр арагъэлъэгъугъ. Адыгеим фэгъэхьыгъэ къэтыныр чъэпыогъу мазэм къыдэкIыщт.
ДЕЛЭКЪО Анет.