Инвестиционнэ проектыр щыIэныгъэм щыпхырызыщырэ компаниеу «Агрохолдинг Мирный» зыфиIорэм мы мафэхэм пчэн 868-рэ Нидерланды къыращи Адыгеим къащагъ. Ахэр Мыекъопэ районым ит поселкэу Трехречнэм щаIыгъыщтых. Непэрэ мафэм ехъулIэу зэкIэмкIи агрохолдингым шъхьэ мини 4,8-рэ иIэ хъугъэ.

— АР-м мэкъу-мэщымкIэ и Министерствэ къызэрэщытаIуа­гъэмкIэ, ООО-у «Агрохолдинг Мирный» зыфи­Iорэм зэригъэгъотыгъэ пчэнхэр зааненскэ лъэпкъ дэгъум къытекIыгъэх. Чэщ-зымафэм щэ литри 3,5-рэ фэдиз къаты. Шъхьэ пчъагъэм зэрэхагъэхъуагъэм ишIуагъэкIэ къыдагъэкIырэ продукциери нахьыбэщт, — еIо мэкъу-мэщымкIэ министрэм иапэрэ гуа­дзэу Сергей Шопиным.

Ащ къызэриIуагъэмкIэ, пчэнхэм гъогъур, нэмыкI чIыпIэ къызэращагъэхэр къяхьылъэкIыгъэп, джырэкIэ ахэм карантин ателъ, мазэкIэ атырахыжьынэу щыт. А уахътэм къыкIоцI чIыпIакIэм есэщтых, ветеринарнэ къулыкъум ищыкIэгъэ уплъэкIунхэр ышIыщтых, вакцинэ ахалъхьащт. Сергей Шопиным къызэрэхигъэщыгъэмкIэ, пчэнхэм яапэрэ Iахь ныIэп Адыгеим къащагъэр, илъэсым ыкIэ нэс джыри шъхьэ 2790-рэ ащ къыращынэу агъэнафэ.

ИкIыгъэ илъэсым ООО-у «Агрохолдинг Мирный» зыфи­Iорэм щэм хэшIыкIыгъэ продукцие къызщыдагъэкIырэ завод республикэм къыщызэIуихыгъ. Итальянскэ производственнэ линие агъэпсыгъ, пчэныщэм хэшIыкIыгъэ продукцие зэфэшъхьафхэр къыдагъэкIых, ахэм зэрахагъэхъощтым ыуж итых.

Предприятием къое зэфэшъхьафхэр, йогурт, къое гъэушкъо­игъэ, тхъу, зэкIэмкIи гъомылэпхъэ зэмылIэужыгъоу 15 къыдагъэкIы. Ахэр Москва, Санкт- Петербург, Мыекъуапэ, Къырым, Краснодар краим ыкIи нэмыкI­хэм ащаIуагъэкIых.

Шъугу къэдгъэкIыжьын 2019-рэ илъэсым ичъэпыогъу мазэ Урысые агропромышленнэ къэ­гъэлъэгъонэу «Дышъэ бжыхь» зыфиIорэм инвестиционнэ зэзэгъыныгъэр зэрэщызэдашIыгъа­гъэр. АР-м и ЛIышъхьэу КъумпIыл Муратрэ ООО-у «Агрохолдинг Мирный» зыфиIорэм ипа­щэу Елена Гангалорэ ащ зэдыкIэтхэгъагъэх.