Шъолъыр пчъагъэхэм ялIыкIохэр зыхэлэжьэгъэ шIэныгъэ-практическэ конференциеу «Адыгеим къэралыгъо гъэпсыкIэ иIэ зэрэхъугъэр» зыфиIоу Iоныгъом и 15-м щыIагъэр Адыгэ Республикэр зызэхащагъэр илъэс 30 зэрэхъурэм фэгъэхьыгъагъ.

Iофтхьабзэр зэхэзыщагъэхэр гуманитар ушэтынхэмкIэ Адыгэ республикэ институтэу Т.М. КIэращэм ыцIэкIэ щытыр, Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм зэпхыныгъэ адыряIэнымкIэ ыкIи къэбар жъугъэм иамалхэмкIэ и Комитет, Урысые общественнэ-къэралыгъо просветительскэ организациеу «Урысые обществэу «ШIэныгъэм» и Адыгэ шъолъыр къутам арых. Онлайн шIыкIэм тетэу кIогъэ конференцием шIэныгъэлэжь, къэралыгъо Iофы­шIэ, краевед 20-м ехъу хэлэ­жьагъ.

Т. КIэращэм ыцIэкIэ щыт гуманитар ушэтынхэмкIэ институтым ипащэу, философие шIэ­ныгъэхэмкIэ докторэу, профессорэу А.Хъ. ЛIыIужъум конференциер къызэIуихыгъ, идок­ладэу «Адыгея: от автономии к республике» зыфиIорэм тарихъ мэхьанэ зиIэ хъугъэ-шIэгъэшхом уасэ къыщыритыгъ. КъэIогъэн фае А.Хъ. ЛIыIужъур а хъугъэ-шIагъэхэм чанэу зэрахэлэжьагъэр, Адыгэ Респуб­ликэм и Апшъэрэ Совет иапэрэ пащэу зэрэщытыгъэр.

1990-рэ илъэсым чъэпыогъум и 5-м народнэ депутатхэм я Адыгэ хэку Совет исессиеу щыIагъэм РСФСР-м хэхьэрэ Адыгэ Автоном Советскэ Соци­алистическэ Республикэ зэрэзэхащагъэмкIэ макъэ къызэрэщагъэIугъэр ащ конференцием хэлажьэхэрэм агу къыгъэкIы­жьыгъ, автономие зытиIэр илъэси 100 зыщыхъурэм ехъу­лIэу Адыгэ автоном хэкум изэхэщэн зиIахьышхо хэзы­шIы­хьэгъэ Хьахъурэтэ Шыхьанчэрые исаугъэт Мыекъуапэ щыгъэуцугъэнэу, Мыекъуапэ иурамхэм ащыщ горэм Н.И. Кондратенкэм ыцIэ фэусыгъэнэу игъо ылъэгъугъ. Конференцием хэлэжьэгъэ пстэуми ащ ипредложениехэм къыдырагъэштагъ. Генерал-майорэу А. А. Дорофеевыр Адыгэ Республикэм и Конституцие иположение шъхьа­Iэхэр къызэрэхахыгъэм, респуб­ликэ ныбжьыкIэм икъэралыгъо- правовой зэфыщытыкIэхэр зыпкъ зэриуцуагъэм игъэкIотыгъэу къатегущыIагъ.

Общественнэ движениеу «Адыгэ Хасэм» изэхэщэн чанэу хэлэжьагъэу, филологие шIэныгъэхэмкIэ докторэу, АРИГИ-м иведущэ научнэ IофышIэу А. С. Къуекъор «40-мэ я Комитет» зыфиIорэми, хэдзынхэми язэхэщэнкIэ Адыгэ Хасэм Iофэу зэрихьагъэхэм къатегущыIагъ. АРИГИ-м иученэ секретарэу, филологие шIэныгъэхэмкIэ кандидатэу Н.А. Тэум идокладэу «Телевидение Адыгеи в переходный период» зыфиIорэмрэ АРИГИ-м инаучнэ IофышIэ шъхьаIэу Н.Хь. ЕмыкIым идок­ладэу «Телепрограмма «Гъундж» — зеркало национальных процессов, происходивших в Адыгее в конце 80-х — начале 90-х гг.» зыфиIорэмрэ къэбар жъугъэм иамалхэм Адыгэ Рес­публикэр ылъэ зыщытеуцощтыгъэ лъэхъаным Iофэу ашIагъэм афэгъэхьыгъагъэх.

АРИГИ-м инаучнэ IофышIэ шъхьаIэу, тарихъ шIэныгъэхэмкIэ докторэу А.Д. Пэнэшъум идокладэу «Преемственность государственно-политической традиции адыгов» зыфиIорэм ижъыкIэ адыгэхэр къэралыгъо гъэпсыкIэ яIэным зэрэфэбэнагъэхэмкIэ щысэхэр къыщихьыгъэх.

АКъУ-м тарихъымкIэ ифакультет идеканэу, тарихъ шIэныгъэхэмкIэ докторэу, профессорэу Н.А. ПэкIэшхом идокладэу «Юго-Восточный Союз: вопросы политико-административного обустройства Юга России» зыфиIорэмрэ АРИГИ-м социологиемкIэ иотдел иведущэ научнэ IофышIэу, социологие шIэныгъэхэмкIэ кандидатэу О.И. Кускаровам идокладэу «О некоторых моментах культурного развития Республики Адыгея на пути становления национальной государственности» зыфиIорэмрэ гъэшIэгъонэу гъэпсыгъагъэх. Къэралыгъом игъэ­псынрэ бзэм хэхъоныгъэ егъэшIыгъэнымрэ пытэу зэрэзэп­хыгъэхэм афэгъэхьыгъагъ АРИГИ-м бзэмкIэ иотдел ипащэу, филологие шIэныгъэхэмкIэ докторэу С.Хь. Анцокъом докладэу къышIыгъэр.

АРИГИ-м иведущэ научнэ IофышIэу, филологие шIэныгъэ­хэмкIэ кандидатэу Т.А. Шэуджэныр мы аужырэ илъэсхэм адыгэ литературэм ипроизведениехэм къэралыгъо гъэпсыкIэм чIыпIэу щарагъэубытыгъэм къытегущыIагъ. Мыекъопэ къэралыгъо технологическэ университетым лъэпкъ дипломатиемкIэ ыкIи культурэ зэпхыныгъэхэмкIэ и Гупчэ ипащэу, тарихъ шIэныгъэхэмкIэ кандидатэу С.Х. Мусхаджиевым Адыгеир ылъэ теуцонымкIэ апшъэрэ еджапIэм мэхьанэу иIагъэм игугъу къышIыгъ. Фило­софие шIэныгъэхэмкIэ докторэу, МКъТУ-м ипрофессорэу Хь. Хь. Азэщыкъыр идокладэу «Адыгея на пути к устойчивому развитию» зыфиIорэм Адыгеим щагъэцэкIэрэ федеральнэ проект заулэмэ къащытегущыIагъ.

АРИГИ-м иведущэ научнэ IофышIэу, искусствоведениемкIэ кандидатэу М. Хь. Къуекъор адыгэхэм яижъырэ быракъ Хэкужъым къызэрахьыжьыгъэм конференцием къыщытегущы­Iагъ. Гъэзетэу «Майкопские новости» зыфиIорэм испецкоррэу, краеведэу А.А. Данильченкэм Адыгэ Республикэм и Къэралыгъо герб фэгъэхьыгъэу къыIотагъэхэм ашIогъэшIэгъонэу конференцием хэлэжьагъэхэр ядэIугъэх.

Конференцием къыщыгущыIэгъэ нэбгырабэмэ Адыгэ Респуб­ликэм и Къэралыгъо Совет —Хасэм зыфагъэзагъ Адыгеим республикэ статус иIэ зыхъугъэ илъэсыр зэхифынэу. «Адыгэ Республикэр щыIэ зыхъугъэм ия 30-рэ е ия 31-рэ илъэса непэ хэдгъэунэфыкIырэр?» зыфиIорэ упчIэр конференцием къыщытэджыгъ. Ащ хэлэжьэгъэ нэбгырабэмэ мыгъэ респуб­ликэм ия 31-рэ илъэс хэдгъэу­нэфыкIэу алъытагъ.

ШIэныгъэ-практическэ конфе­ренцием хэлэжьагъэхэм общественнэ движениеу «Адыгэ Хасэм» Iофтхьэбзэ зэфэшъхьаф­хэр Адыгеим щызехьэгъэнхэмкIэ мэхьанэшхо зэриIэр хагъэу­нэфыкIыгъ.

ШIэныгъэ-практическэ конференцием щагъэфедэгъэ материалхэр ыужкIэ шъхьафэу къыдагъэкIыщтых.

Ацумыжъ Казбек. Тарихъ шIэныгъэхэмкIэ доктор, АРИГИ-м тарихъым­кIэ иотдел ипащ.