Iоныгъом и 19-р – мэзым иIофышIэ и Маф
Мэзым иIофышIэхэу, иветеранхэу лъытэныгъэ зыфэтшIыхэрэр!
Шъуисэнэхьат епхыгъэ мэфэкIымкIэ – мэзым иIофышIэ и МафэкIэ тышъуфэгушIо!
Адыгеим къыгъэгъунэрэ чIыпIэм ипроцент 40 фэдизыр мэзхэм зэрэзэлъаубытрэм епхыгъэу мэзлэжьхэм яIофшIэн тиреспубликэ мэхьанэшхо щыраты.
Адыгеим итеплъэ къэзыгъэдахэхэрэм, иэкономикэ зыкъезыгъэIэтыхэрэм, ижь зыукъэбзхэрэм мэзхэр ащыщых. Мэзлэжьхэм тыкъэзыуцухьэрэ дунаир къэухъумэгъэным, чIыопс байныгъэр акъылыгъэ хэлъэу гъэфедэгъэным акIуачIэ непэ яшъыпкъэу рахьылIэ, республикэм исоциальнэ-экономикэ хэхъоныгъэ яIахьышхо хашIыхьэ.
Мэзлэжьхэм опыт байрэ шIэныгъэ куурэ зэряIэм, теубытагъэрэ гуетыныгъэрэ зэрахэлъым къахэкIэу япшъэрылъхэр тапэкIи гъэхъагъэ хэлъэу зэрагъэцэкIэщтхэм, нахьыбэу инвестициехэр тиэкономикэ къыхалъхьаным зэрэфэIорышIэщтхэм тицыхьэ телъ.
Ныбджэгъу лъапIэхэр, гуетыныгъэ фышъуиIэу шъузэрэлажьэрэм, шъуиIоф шъузэрэфэшъыпкъэм афэшI тызэрэшъуфэразэр непэ къышъуатIо тшIоигъу. Псауныгъэ пытэ, насыпышхо, щыIэкIэ-псэукIэ дэгъу шъуиIэнэу, IофышIоу ешъухьыжьэрэ пстэуми гъэхъагъэхэр ащышъушIынэу тышъуфэлъаIо!
Адыгэ Республикэм и ЛIышъхьэу, Урысые политикэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет – Хасэм и Тхьаматэу Владимир Нарожный