Илъэс къэс Iоныгъо мазэм иящэнэрэ тхьаумафэ мэзым иIофышIэ и Мафэ тикъэралыгъо щыхагъэунэфыкIы.

Мэзыр — тичIыопс ибаиныгъ. Ащ икъэухъумэнкIэ макIэп ашIэ­рэр.

Адыгэ Республикэм мэз хъыз­мэтым чIыпIэшхо щеубыты, сыда пIомэ Адыгеим ишъолъыр ипроцент 40-м ехъур мэзых, зэкIэмкIи чIыгу гектар мин 226-м ехъу зэлъаубыты. Мы мафэм ехъулIэу мэз хъызмэтым зэкIэмкIи нэбгырэ минищым ехъумэ Iоф щашIэ. Мэзхэр къэухъумэгъэнхэм, гъэкIэжьыгъэнхэм ыкIи шIуагъэ къатэу гъэфедэгъэнхэм ахэр пылъых. Джащ фэдэу ахэр къабзэу Iыгъыгъэнхэм ыкIи узхэр къахэмыхьанхэм мэзым иIофышIэхэр ренэу лъэплъэх.

Тиреспубликэ иэкономикэрэ иэкологиерэ якъэкIопIэ шъхьа­Iэхэм зэу ащыщ мэзыр, ащ къыхэкIэу ренэу уфэсакъын фае. Тимэзхэр къызэтегъэнэгъэнхэм мэхьанэшхо иI. Пстэуми апэу къыхэбгъэщын плъэкIыщт мэз­хэм машIо къащымыхъунымкIэ Iофхэм язытет зыпкъитыныгъэ зэриIэр. Мэзхэм машIом закъы­щимыштэным ыкIи закъыщиштагъэмэ, лъэтемытэу шIэгъэн фае­хэр гъэнэфагъэу АР-м мэз­хэмкIэ и ГъэIорышIапIэ Iоф ешIэ. Игъом ыкIи планэу къафагъэуцугъэм диштэу Адыгэ Республикэм ихэушъхьафыкIыгъэ автоном гъэIорышIапIэу «Адыгейская лесопожарная охрана» зыфиIорэм ыкIи мэз участкэхэр бэджэндэу зыIыгъхэм мэзхэм машIо къащымы­хъунымкIэ Iофтхьабзэхэр зэра­хьэх. Джащ фэдэу республикэм имэз фонд хахьэхэрэ чIыпIэхэр зэтегъэпсыхьэгъэнхэм Iоф дашIэ. Адыгеим имэзхэм язытет, ахэм япчъагъэ зэгъэшIэгъэнхэм пае гъэлъэшыгъэ шIыкIэм тетэу IофшIэныр агъэцакIэ. Мы пшъэ­рылъыр зэшIохыгъэным фытегъэпсыхьагъэу федеральнэ бюджетым къикIырэ мылъкур агъэфедэ.

ГъэIорышIапIэм иIофышIэхэм къызэраIорэмкIэ, мэз фондыр зэрифэшъуашэу гъэфедэгъэным мэхьанэшхо иI. Дунэе шапхъэ­хэм адиштэу мэзыр зэтеутыгъэ­ным ылъэныкъокIэ IофшIэныр апэу Урысыем и Къыблэ щезыгъэжьагъэр Адыгеир ары. Мэз хъызмэтыр инвестициехэмкIэ нахь хъопсагъоу щыт, къыдэгъэ­кIыжьыным фэгъэзагъэхэ предприятиехэм ягъэкIэжьын ар фэIорышIэ. КъыдэгъэкIыжьыным нахь зегъэушъомбгъугъэныр ары пшъэрылъ шъхьаIэу непэ щытыр.

ГъэIорышIапIэм иIофыгъохэм язэшIохын республикэм ипащэ­хэм сыдигъуи анаIэ къазэрэтетым, мэз хъызмэтым Iоф щызышIэхэрэм япшъэрылъхэр зэ­рифэшъуашэу зэрагъэцакIэ­хэрэм ыкIи цIыфхэм чIыопсым икъэухъумэн мэхьанэшхо зэрэратырэм ишIуагъэкIэ Адыгеир тапэкIи анахь шъолъыр дахэхэм зэращыщыщтым уицыхьэ тебгъэ­лъы хъущт.

— Хэтрэ цIыфи, мэзым Iоф щызышIэхэрэм агу илъыр зы — тимэзхэр къэухъумэгъэнхэр ыкIи нахь дахэ хъунхэр, машIор апэчыжьэу, жъы хъугъэ чъыгхэр хэтымыгъэкIодэжьхэу цIыфхэм тишIуагъэ ядгъэкIыныр ары, — еIо ГъэIорышIапIэм ипащэу Былымыхьэ Рэщыдэ. — Мэзым шIуагъэу къытын ылъэкIыщтыр зэкIэ къедгъэтынэу тыфэхьазыр, Адыгеим и ЛIышъхьэ ащкIэ къыддырегъаштэ. ЧIэнагъэ ты­мы­шIэу тимэзхэм къатырэ пхъэр дгъэфедэмэ, тиреспубликэ иэкономикэ хэхъоныгъэшIухэр зэришIыщтхэм сицыхьэ телъ.

АР-м имэз хъызмэт иветеранхэм я Совет ипшъэрылъхэм ахахьэу IэпыIэгъу зищыкIэгъэ цIыфхэм адэIэпыIэх, гъэстыныпхъэ ящыкIагъэмэ афащэ, япсауныгъэ агъэпытэным фэшI путевкэхэр арагъэгъотых, ама­лэу ыкIи лъэкIэу яIэмкIэ яшIуа­гъэ арагъэкIы.

— Илъэс къэс зэхащэрэ Урысые Iофтхьабзэу «Живи, лес» зыфиIорэм тиветеранхэр хэтэгъэлажьэх. Ащ нэмыкIэу Мыекъопэ къэралыгъо технологическэ университетым мэз хъызмэтымкIэ ифакультет исту­дентхэм тиIофышIэхэр, ветеранхэр рагъэблагъэх, лекциехэм къяджэх. ЕджэпIэ хъызмэтшIапIэхэм зэпхыныгъэ адытиIэу Iоф адэтэшIэ. Мыщ ыпэкIэ тимы­Iэжьыгъэу, 2008-рэ илъэсым, Былымыхьэ Рэщыдэ тхьаматэу къызыкIуагъэм къыщыублагъэу еджапIэхэм ащыщхэм мэзхъыз­мэтшIапIэхэр къащызэIутхыжьыгъэхэу, мэзлэжьхэм яобществэ хэтхэр тигъусэхэу тадэлажьэ, — еIо Советым ипащэу Бэлокъо Аслъанчэрый.

АР-м мэзхэмкIэ и ГъэIорышIапIэ ипащэу Былымыхьэ Рэщыдэ, АР-м имэз хъызмэт иветеранхэм я Совет ипащэу Бэлокъо Аслъанчэрый ыкIи мэзлэжьхэм яобществэ ипащэу Хьатикъое Мэджыдэ Адыгеим имэзлэжьхэм ыкIи иветеранхэм мэфэкIымкIэ ыгу къадеIэу афэгушIох.

«Тимэзхэр къызэтегъэнэгъэн­хэмкIэ, ухъумэгъэнхэмкIэ пшъэ­дэкIыжь инэу шъуиIэр къыжъугурыIозэ ыкIи гуетыныгъэшхо фышъуиIэу шъузэрэлажьэрэм, мэз хъызмэтым ихэгъэхъон ыкIи общественнэ щыIакIэм чанэу шъузэрэхэлажьэрэм апае инэу тышъуфэраз. ТапэкIи IофшIэным гу кIуачIэу фышъуиIэм къыкIимычэу, тиреспубликэ хэхъоныгъэшIухэр ышIынхэм шъуиIахьышIу хэлъэу къулыкъур шъухьынэу шъуфэтэIо», — къы­щеIо шIуфэсым.

КIарэ Фатим.