Урысые общественнэ движениеу «Народный фронт» зыфиIорэм ишъолъыр къутамэу Адыгэ Республикэм щыIэм иактивистхэм, «Молодежка ОНФ» зыфиIорэ командэм хэтхэм, культурэм иволонтерхэм, джащ фэдэу мэзхэм якъэухъумэнкIэ республикэ Гупчэм илIыкIохэм мэз паркэу «Мэздах» зыфиIорэм игъэкъэбзэнкIэ Iофтхьэбзэ ин щырагъэкIокIыгъ. Мэзым ыкIи мэз къыдэгъэкIын промышленностым иIофышIэхэм я Мафэу къэблагъэрэм Iофтхьабзэр фагъэхьыгъ.

Экологическэ Iофтхьабзэм хэлэжьагъэхэм зэкIэмкIи хэкI дзыо 20-м ехъу къаугъоигъ. ТхылъыпIэжъэу, тутын зыдэлъы­гъэхэ, чипсыр зыкIоцIылъыгъэхэ къэмланэхэу къаугъоигъэхэм янахьыбэр пластикым хэшIыкIыгъэхэ бэшэрэбхэу гъэкIоды­гъуаеу щытхэр ары. Ахэр заводым ащэнхэу ыкIи переработать ашIынэу щыт.

— ТичIыопс зыушIойхэрэ пыдза­фэхэу цIыфхэм къакIэкIэтэкъухэрэм экологием тхьамыкIэгъошхо къыфахьы. Мэз гъэхъунэхэм зыщызыгъэпсэфыхэрэм шIоеу, хэкIэу бэ къагъанэхэрэр. ЧIыопсым ар фэ­укIочIырэп, сыда пIомэ илъэс къэс шIоир нахьыбэ мэхъу, мэ Iае зыпиххэрэ хэкI зэтетэкъуа­гъэхэр тыди ащыолъэгъу. Мы гумэкIыгъор дэдгъэзыжьын тлъэкIыщт цIыф пэпчъ ежь къы­кIэтэкъугъэ шIоир Iуихыжьмэ, — еIо Урысые общественнэ движениеу «Народный фронт» зыфиIорэм ишъолъыр къутамэу Адыгэ Республикэм щыIэм иактивистэу Андрей Крысановым.

КъэIогъэн фае, тыкъэзыуцухьэрэ дунаим пшъэдэкIыжь пылъэу цIыф пэпчъ къекIолIэным фэшI, экологием ехьылIэгъэ Iофтхьабзэхэм, еджакIохэм апае внекласснэ урокхэм язэ­хэщэн общественникхэм ана­- Iэ тырагъэты.