Лъэпкъ проектэу «Псауныгъэм икъэухъумэн» зыфиIорэм къыдыхэлъытагъэу Адыгеим мобильнэ комплексхэр къыIэкIэхьагъэх ыкIи ащ лъыпытэу псэупIэ чыжьэхэм агъэкIуагъэх ахэм ащыпсэухэрэм япсауныгъэ ащауплъэкIуным, апэрэ IэпыIэгъу щарагъэгъотыным, вакцинэхэр ащахалъхьанхэм апае.

Мыекъопэ районым ипсэупIэу Абдзэхэхьаблэ Адыгеим и ЛIышъхьэу КъумпIыл Мурат щыIагъ мы IофшIэныр зэрэщызэхэщагъэр зэригъэлъэгъуным фэшI. ЦIыфхэм япсауныгъэ изытет иуплъэкIун зэрэкIорэм джащ фэдэу зыщагъэгъозагъ Къэралыгъо Думэм АдыгеимкIэ идепутатхэу Владислав Резник­рэ Хьасанэкъо Муратрэ. Мы псэупIэм иамбулаторие мафэм къыкIоцI агъэкощырэ фельдшер-мамыку IэзапIэм Iоф щи­шIагъ. Абдзэхэхьаблэ щыпсэу­хэрэм ямызакъоу, ащ пэгъу­нэгъу чылагъохэм къарыкIыгъэ­хэми IэпыIэгъу афэхъугъэх. Къоджэ псэупIэм мыщ фэдэ Iофтхьабзэ щырегъэкIокIыгъэным мэхьанэшхо зэриIэм ахэм къыкIагъэтхъыгъ.

Агъэкощырэ фельдшер-мамыку IэзапIэхэм яшIуагъэкIэ медицинэ IэпыIэгъур нахь Iэ­рыфэгъу афэхъугъ: къоджэ псэупIэхэм адэсхэр район е республикэ гупчэм мыкIохэу япсауныгъэ сыд фэдэ лъэныкъо­кIи ауплъэкIун амал щыIэ хъугъэ. ИщыкIэгъэ анализхэр щаIа­хых, маммографие, рентген ащыфашIы, нэмыкIэу ищыкIагъэ хъухэрэри арагъэкIу.

ЦIыфхэм IэпыIэгъу зэрарагъэ­гъотырэ шIыкIэр КъумпIыл Мурат зэригъэлъэгъугъ, вакцинациер ягъэшIыгъэным ыкIи псауныгъэм изытет уплъэкIугъэ­ным ямэхьанэ къыкIигъэтхъыгъ. Ащ къызэриIуагъэмкIэ, мы Iоф­тхьабзэхэм анахьыбэу къахагъэлэжьэшъущтым фэдиз аштэн фае. Анахьэу анаIэ зыты­рагъэтынэу щытыр – уз зэфэшъхьафхэр игъом, хэмыужъыныхьэхэзэ къыхэгъэщыгъэнхэр, зэпахырэ узэу коронавирусым земыгъэушъомбгъугъэныр ары.

АР-м псауныгъэр къэухъумэгъэнымкIэ иминистрэу Мэрэтыкъо Рустем къызэриIуагъэмкIэ, зэкIэмкIи мы илъэсым нэбгырэ 77118-мэ япсауныгъэ ауплъэ­кIунэу агъэнафэ, ахэм ащыщэу мин 18-м нахьыбэр куоу ауплъэ­кIущт. Мы шIыкIэр Ковидыр зыпэкIэкIыгъэхэм арахьылIэщт, бэдзэогъум и 1-м аублагъ, уплъэкIун тедзэхэр къыхеубы­тэх. Зэфэхьысыжьхэм ялъытыгъэу псауныгъэмкIэ купхэр агъэнэфэщтых, ащ елъытыгъэу унашъо ашIыщт хэушъхьафыкIыгъэ медицинэ IэпыIэгъу аратыщт­мэ ыкIи япсауныгъэ зэтырагъэу­цожьыщтмэ.

Джырэ уахътэм диспансеризациер нэбгырэ 18617-мэ акIугъах. Узхэр къахагъэщыгъэу хъугъэ-шIэгъэ мини 2 фэдиз агъэунэфыгъ, мыхэм азыны­къор лъым икъекIокIын епхыгъ.

Мыекъопэ районым игупчэ сымэджэщ иврач шъхьаIэу Алла Чернышовам къызэриIуагъэмкIэ, агъэкощырэ фельдшер-мамыку IэзапIэм зы мафэм Абдзэхэхьаблэ Iоф зыщешIэм, ащ щыпсэурэ нэбгырэ 60-мэ япсауныгъэ щауплъэкIугъ, ахэм ащыщэу нэбгырэ 41-р коронавирускIэ гурытэу е хьылъэу сымэджэгъа­хэхэу щытыгъэх.

«Мы IофшIэныр къоджэ псэупIэхэм ащылъыгъэ­кIотэгъэным мэхьанэшхо иI. Медицинэ IэпыIэгъу пстэури республикэм щыпсэухэрэм зэкIэми анэсын фае. ЦIыфхэм япсауныгъэ икъызэтегъэнэн пшъэрылъ шъхьаIэу къэралыгъом ипащэу Владимир Путиным къыгъэуцу­хэ­рэм ащыщ. Ащ игъэцэкIэн пае федеральнэ гупчэр IэпыIэгъу къытфэхъузэ къэкIопIэшIухэр тиIэ хъугъэх. Ар икъу фэдизэу жъугъэфедэ узхэм ащышъуухъумэнхэм, иммунизацием, Iэзэ­гъу уцхэр ягъэгъотыгъэнхэм, специалист гъэнэфагъэхэм адэжь жъугъэкIонхэм, медицинэ организациехэм япсауныгъэ ащауплъэкIуным апае», — псауныгъэр къэу­хъумэгъэнымкIэ Министерствэм ыпашъхьэ пшъэ­рылъ къыгъэуцугъ КъумпIыл Мурат.

Агъэкощырэ фельдшер-мамыку IэзапIэхэр псэупIэхэм зэпымыоу агъэкIонхэм пае дэкIыгъо­хэм язэкIэлъыкIуакIэ зэрагъэ­псыщтым егупшысэнхэу, япсауныгъэ ауплъэкIун зэралъэкIыщтымкIэ цIыфхэм макъэ арагъэ­Iунэу Адыгеим и ЛIышъхьэ пшъэрылъ къыгъэуцугъ, джащ фэдэу къыIуагъ Абдзэхэхьаблэ IэзэпIакIэ зэрэщашIыщтыр. АР-м псауныгъэм икъэухъумэнкIэ апэрэ IэпыIэгъу зыщарагъэгъотырэ IэзапIэхэр гъэкIэжьыгъэнхэмкIэ шъолъыр программэм къыхиубытэу ар зэшIуахыщт.

АР-м и ЛIышъхьэ ипресс-къулыкъу Сурэтхэр А. Гусевым тырихыгъэх.