Адыгэ Республикэм культурэмкIэ и Министерствэ, лъэпкъ творчествэмкIэ Урысыем и Къэралыгъо Унэу В. Д. Поленовым ыцIэ зыхьырэр, Адыгэ Республикэм лъэпкъ культурэмкIэ и Гупчэ, предпринимательствэм хэхъоныгъэ егъэшIыгъэнымкIэ фондыр Iоф­тхьабзэм кIэщакIо ыкIи зэхэщакIо фэхъугъэх.

Лъэпкъ шэн-хабзэхэр къэухъу­мэгъэнхэм, патриотическэ пIу­ныгъэм, ныбжьыкIэхэр яхэ­гъэгу шIу алъэгъоу пIугъэнхэм, лъэпкъ IэпэIасэхэм яIофшIагъэхэм, нэмыкIхэм фестивалыр афэгъэ­хьыгъ. Адыгэ хьакIэщым игъэ­псыкIэ, искусствэм ихэхъоныгъэхэм яхьылIагъэхэр гъэшIэгъонэу къагъэлъэгъощтых.

Дагъыстан, Чэчэным, Къалмыкъым, Къэрэщэе-Щэрджэсым, Темыр Осетием – Аланием, Краснодар, Ставрополь крайхэм, Астрахань, Волгоград, Ростов хэкухэм, Адыгеим яIэпэIасэхэм яIофшIагъэхэр фестивалым щытлъэгъущтых.

«Сэтэнае идышъэ Iуданэ» еплъы зышIоигъохэр бэ мэхъух. ЗэхэщакIохэм ар къыдалъыти, шIыкIэшIухэр агъэфедэнхэу рахъухьагъ.

— Шъолъырхэм яфестиваль лъэпкъыбэ зэфищагъ, — къытиIуагъ Адыгэ Рес­публикэм культурэмкIэ иминистрэ игуадзэу Кушъу Светланэ. — Пэсэрэ лъэ­хъаным къыщегъэжьагъэу лъэпкъхэм зызэраужьыжьырэм, яфольклор зэрэбай дэдэм, джырэ уахътэ псэукIэу яIэм, фэшъхьафхэм фестивалым ащытегущыIэщтых. Искусствэм иIофышIэхэм орэд къаIощт, къэшъощтых, язэфыщытыкIэхэр агъэпытэщтых.

Къэгъэлъэгъонхэр

Лъэпкъ IэпэIасэхэм, бгъэфедэн плъэкIыщт искусствэм, театрализованнэ пкъыгъохэм якъэгъэлъэ­гъонхэр гъэшIэгъон хъущтых.

IофшIапIэу «Нанэм» ипащэу Нэгъуцу Аслъан икъэгъэлъэ­гъонхэр, «IэпэIасэм иеджапI» зыфиIорэр зэрэзэхищэщтым, нэмыкIхэм фестивалыр къа­гъэдэхэщт.

Анахь гъэшIэгъонхэм ащыщ лъэпкъхэм яшъуашэхэм яхьылIэгъэ къэгъэлъэгъоныр.

Фестивалым концертышхо къыщатыщт. «Удж-хъураекIэ» зэхахьэр аухыщт.

Зэкъошныгъэм ипчэгоу Мые­къуапэ дэтым фестивалыр щырагъэжьэщт. Зэхахьэм хэлажьэхэрэр тхылъеджапIэхэм, музейхэм, театрэхэм Iоныгъом и 17 — 19-м ащыIэщтых.

Шъолъырхэм ятворческэ купхэр республикэм ирайонхэм ащыIэщтых, и 19-м концертхэр къащатыщтых.

ЕмтIылъ Нурбый.