Iоныгъом иапэрэ тхьамэфитIу шъолъыр гъэIорышIэнымкIэ Гупчэм республикэм исхэм ятхылъ 578-рэ къыIэкIэхьагъ, тхылъ 396-мкIэ ялъэIу къафагъэцэкIагъ.

Муниципальнэ образованиеу «Красногвардейскэ районыр» зыгъэIорышIэрэ муниципальнэ гупчэм псэупIэу Белэм ыпашъхьэ итыгъэ Iофыгъор Iоныгъом иублэгъу зэшIуихыгъ. Районым ипащэ мы псэупIэм дэт кIэлэцIыкIу IыгъыпIэм къызэкIом, спортым зыщыпылъыщтхэ, мэфэкIхэр зыщызэхащэщт чIыпIэ зэшъхьэзашъо зэримыIэм тегущыIэгъагъэх. Щагур зэрэзэтемыгъэпсыхьагъэм кIэлэцIыкIу­хэми, ны-тыхэми, кIэлэцIыкIу IыгъыпIэм иIофышIэхэми гумэкIыгъуабэ къафихьыщтыгъ. Белосельскэ къоджэ псэупIэм ипащэ зызыфагъэзэ нэуж, муниципалитетым щыпсэурэ цIыф чанхэр IэпыIэгъу къафэхъухэзэ, кIэлэцIыкIу IыгъыпIэм ищагу дахэу зэтырагъэпсыхьагъ.

Шъолъыр гъэIорышIэнымкIэ Гупчэм испециалистхэмрэ псауныгъэр къэухъумэгъэнымкIэ республикэ Министерствэмрэ зэгъусэхэу Iэзэгъу уцым иIэкIэгъэхьан зэшIуахыгъ. Социальнэ хъытыоу инстаграмымкIэ псэупIэу Натырбые дэс бзылъфыгъэ горэм закъыфигъэзагъ ищыIэныгъэкIэ ищыкIэгъэ дэдэу щыт Iэзэгъу уцым икъэгъотынкIэ IэпыIэгъу къыфэхъунхэу. КъызэрэнэфагъэмкIэ, бзылъфыгъэр хэужъыныхьэгъэ узым – жьымыгъотым егъэгумэкIы. Ар зэпхыгъэ аптекэм ищыкIэгъэ Iэзэгъу уцыр игъом къыIэкIэхьагъэп. Бзылъфыгъэм илъэIу псауныгъэр къэухъумэгъэнымкIэ республикэ Министерствэм IэзэнымкIэ иотдел зылъагъэIэсым, Iэзэгъу уцыр псынкIэу бзылъфыгъэм IэкIагъэхьагъ.

Ащ нэмыкIэу шъолъыр гъэIорышIэнымкIэ Гупчэмрэ псауныгъэр къэухъумэгъэнымкIэ рес­публикэ Министерствэмрэ псэ­упIэу Инэм дэс нэмыкI бзылъфыгъэ горэми иIофыгъо зэшIуахыгъ. COVID-19-р къызэ­утэлIэгъэ бзылъфыгъэм еIазэхэу заублагъэр социальнэ хъытыоу инстаграмымкIэ закъызыфе­гъазэ нэуж ары. Бзылъфыгъэм къызэриIотагъэмкIэ, иунэ врач къызымыкIуагъэр мэфэ заулэ хъугъэ. ЗэрихьылIэнхэ фэе Iэзэгъу уцхэм якъитхыкIынкIэ IэпыIэгъу къыфэхъунхэу ар къыкIэлъэIущтыгъ. ЫпэкIэ компьютернэ томографымкIэ зауплъэкIум, итхьабылхэр зэрэзэщыкъуагъэхэр къыраIогъагъ. Тэхъутэмыкъое район сымэджэщым иврач шъхьаIэу Нэхэе Светланэ мы Iофыгъом изэшIохын зыфагъазэм, сымаджэм дэжь врач агъакIуи, зэреIэзэщтхэ шIыкIэр къыфыратхыкIыгъ.

«Национальные приоритеты» зыфиIорэ проектым къыдыхэлъытагъэу автоном мыкоммерческэ организациеу «Диалог Регионы» зыфиIорэмрэ шъо­лъыр гъэIорышIэнымкIэ регион гуп­чэхэмрэ антителахэр зыхэлъ плазмэр зыщаIахырэ медицинэ учреждениехэм афэгъэхьыгъэ къэбархэм яугъоин хэлэжьа­гъэх. АдыгеимкIэ ащ фэдэ плазмэр зыщаIахырэр лъыр зыщахагъэ­хъорэ Адыгэ республикэ станцие закъор ары. ГурытымкIэ плазмэу аштэрэр миллилитрэ 300 – 600 фэдиз. COVID-19-р къызэхьылъэкIырэ нэбгыри 2 – 3-мэ ар афекъу.

«Антителахэр яIэнхэм пай лъым иплазмэ сымаджэхэм зыкIахакIэрэр. Джащ фэдэу зызекIохэкIэ, нахь псынкIэу сымаджэхэм япсауныгъэ зыпкъ иуцожьэу регъажьэ. Зэрар къэ­зыхьырэ бактериехэри, вирусхэри ащ хаукъэбзыкIых, плазмэр щынэгъончъэу щыт», – къы­Iуагъ Москва имэрэу Сергей Собяниным.

Шъолъыр гъэIорышIэнымкIэ Гупчэм иIофышIэхэм илъэсныкъом къехъугъ республикэм икъэралыгъо хабзэ икъулыкъу­хэми, чIыпIэ зыгъэIорышIэжьынымкIэ икъулыкъухэми ярейтинг зызэхагъэуцорэр. Порталэу «Къэралыгъо фэIо-фашIэхэмкIэ» ыкIи социальнэ хъытыухэмкIэ ведомствэхэмрэ муниципальнэ образованиехэмрэ яIофшIэн уасэ къараты. Баллхэр афагъэ­уцу зыхъукIэ цIыфхэм ятхылъхэм къащаIэтыгъэ Iофыгъохэм яхэплъэн уахътэу тырагъэкIодагъэри къыдалъытэ. Порталэу «Къэралыгъо фэIо-фашIэхэм» шышъхьэIум ведомствэхэмкIэ пэрытныгъэр щызыубытыгъэр Адыгеим IофшIэнымрэ социальнэ хэхъоныгъэмрэкIэ и Министерств ары, ащ балли 100 фагъэуцугъ. Муниципальнэ образованиехэмкIэ апэ ишъыгъэр муниципальнэ образованиеу «Къалэу Мыекъуап» ары, балл 61-рэ ащ къыхьыгъ.

Социальнэ хъытыухэмкIэ пэрытныгъэр зыубытыгъэр Адыгэ Республикэм IофшIэнымрэ социальнэ хэхъоныгъэмрэкIэ и Министерств ары, ащ балл 88-рэ фагъэуцугъ, муниципальнэ образованиехэмкIэ Красногвардейскэ районым иадминистрацие атекIуагъ, балл 91-рэ ащ къыхьыгъ.

Адыгеим щыпсэухэрэм ялъэ­Iухэм зэрахаплъэхэрэмкIэ пэ­рытныгъэр зыубытыгъэр Адыгэ Республикэм IофшIэнымрэ социальнэ хэхъоныгъэмрэкIэ и Министерств, ащ ихэплъэн гуры­тымкIэ такъикъ 58-рэ ведомствэм пэIуегъахьэ. ЧIыпIэ зыгъэ­IорышIэжьынымкIэ къулыкъухэм азыфагу апэрэ чIыпIэр щиубытыгъ муниципальнэ образова­ниеу «Кощхьэблэ районым» иадминистрацие, а Iофым ащ такъикъ 21-рэ тыригъэ­кIодагъ.