Нэбгырэ 200-м ехъу хэлэжьагъ
Компаниеу «Россети Кубань» зыфиIорэм и Адыгэ къутамэ икъулыкъушIэхэм электричествэр щынэгъончъэнымкIэ шапхъэу щыIэхэм язэгъэшIэн фэгъэхьыгъэ сыхьатхэр зэхащагъэх, ахэм кIэлэцIыкIу ыкIи Iэтэхъо 200-м ехъу ахэлэжьагъ.
ПэшIорыгъэшъ Iофтхьабзэу «Безопасное электричество – счастливое детство» зыфиIорэм къыдыхэлъытагъэу Iофтхьабзэхэр рагъэкIокIыгъэх. Электричествэм игъэфедэн щынэгъончъэу щытыныр къизыIотыкIырэ егъэджэнхэр гъэшIэгъонэу зэхащагъэх. Ащ пае зэдэгущыIэгъухэр, викторинэхэр, лъэтегъэуцохэр агъэфедагъэх, джащ фэдэу мультфильмэхэр ыкIи роликхэр къагъэлъэгъуагъэх.
ЦIыфымкIэ электрическэ токым мэхьанэу иIэр, ар щынэгъончъэным пае узэрэзекIон фаер, шапхъэу пылъхэр энергетикхэм къаIотагъэх. Энергетикхэм ны-тыхэм ыкIи кIэлэегъаджэхэм агу къагъэкIыжьы, компаниеу «Россети Кубань» иофициальнэ сайт инэкIубгъоу «Профилактика электротравматизма» зыфиIорэм ихьэхэмэ, специалистхэр зыхэлэжьэщтхэ мыщ фэдэ егъэджэнхэр зэхащэнхэмкIэ лъэIу тхылъ къатын алъэкIыщт.
Компанием иреспубликэ къутамэ Адыгеим ыкIи Краснодар краим ямуниципальнэ образованиимэ электроэнергиер аIэкIегъахьэ: Мыекъопэ, Джэджэ, Шэуджэн, Кощхьэблэ, Красногвардейскэ, Шытхьэлэ ыкIи Апшеронскэ районхэм.