«Пушкинскэ картэм» Iоф ешIэ
КъыткIэхъухьэрэ ныбжьыкIэхэм искусствэр зыфэдэр ашIэу, шIэныгъэ гъэнэфагъэхэр яIэхэу ыкIи культурэ ахэлъэу пIугъэнхэр мы картэм ипшъэрылъ.
Шъугу къэтэгъэкIыжьы, федеральнэ хабзэм нэбгырэ пэпчъ Iофтхьабзэу зыхэлэжьэщтхэм апэIуигъэхьанэу 2021-рэ илъэсым сомэ мини 3 зырыз къызэрэфырилъхьагъэр, мы илъэсыр икIымэ, къэкIощт 2022-м сомэ мини 5 джыри къафыригъэхьащт. А ахъщэр «Пушкинскэ картэр» зэзыгъэгъотыгъэ нэбгырэ пэпчъ шIуагъэ къытэу ыгъэфедэныр ары мурадыр.
Адыгеим мы Iофтхьабзэр щаублагъ
НыбжьыкIэхэм апэрэу картэр къызфагъэфеди, Адыгеим и Урыс къэралыгъо драматическэ театрэ щагъэуцугъэ спектаклэу «Одна ночь» зыфиIоу тичIыпIэгъоу Евгений Шварц ытхыгъэр къыщагъэлъэгъуагъ. Онлайн шIыкIэм тетэу билетхэр ащэфыхи, Мыекъуапэ игурыт еджапIэхэм яеджакIохэм ащыщхэр ыкIи Белореченскэ индустриальнэ техникумым истудентхэр ащ еплъыгъэх. Хэгъэгу зэошхом илъэхъан Ленинград щыпсэухэрэм къинэу ащэчыгъэр ащ къыщиIотыкIыгъ гъэшIэгъонэу, еплъыгъэхэм лъэшэу агу рихьыгъ, тапэкIи къагъэлъэгъощтыр зэрагъашIэзэ Урыс къэралыгъо драмтеатрэм иIофшIэгъакIэхэм защагъэгъозэн гухэлъ яI.
Картэм шIуагъэ хэлъэу иапэрэ IофшIэн лъэбэкъу ышIыгъэу плъытэн плъэкIыщт.
Дзэукъожь Нуриет.