Лъэпкъ проектхэм, шъолъыр программэхэм яшIуагъэкIэ Адыгеим псауныгъэм икъэухъумэн тегъэпсыхьэгъэ IофшIэнхэр игъэкIотыгъэу щызэшIуахых.

Анахьэу анаIэ зытырагъэтыхэрэм ащыщых къоджэ псэупIэхэр. ШIуагъэу фэдэ Iофхэм къахьырэр Джэджэ районым, гущыIэм пае, щаушэтыгъах. ИкIыгъэ илъэсым лъэпкъ проектэу «Псауныгъэм икъэухъу­мэн» зыфиIорэм къыдыхэлъытагъэу мыщ фельдшер-мамыку IэзэпIищ щашIыгъ: къутырхэу Вольно-Веселэм, Садовэм ыкIи псэупIэу Сергиевскэм.

Вольно-Веселэм тапэкIэ дэтыгъэ IэзапIэр зашIыгъагъэр блэкIыгъэ лIэшIэгъум ыгузэгу­хэм адэжь. Унэм изытет дэй дэдагъ — чIэхьапIэр, дэпкъхэр зэхэтакъощтыгъэх, къыкIэщхыщтыгъ, хьакукIэ агъэплъыщтыгъ. ИгъэкIотыгъэ гъэцэкIэжьынхэр зыкIи щашIыгъэхэп, ежь IэзапIэм щылажьэхэрэм зыгорэхэр рашIылIэщтыгъэх.

2018-рэ илъэсым къыщыублагъэу IэзапIэм ипащэу, фельдшерэу Iоф зышIэрэ Галина Ростовцевар къыхиубытагъ ижъы­кIэ унэр зэрэщытыгъэм. Ащ Лэбапэ дэт медучилищыр къыухыгъ, цыхьэ зыфашIэу, иIофшIэн хэшIыкI фызиIэу зыкъэзыгъэлъэгъогъэ фельдшер. Галинэ ыгу къэкIыжьы къинэу ежьыми, сымаджэу къакIохэрэми алъэгъущтыгъэр.

Джы мэзибгъу фэдиз хъугъэу Вольно-Веселэм Iоф щызышIэрэ фельдшер-мамыку IэзэпIакIэр шапхъэхэм адиштэу щыт, къуа­джэм щыпсэухэрэм апэрэ медицинэ IэпыIэгъур ятыгъэным тегъэпсыхьагъ. Фельдшерым иIофшIэн зэрифэшъуашэу ыгъэ­псыным фэIорышIэ – гъэстыныпхъэ шхъуантIэкIэ агъэплъы, санитарнэ шапхъэхэм къады­хэлъытэгъэ пстэури щыгъэфедагъ, медицинэ псэуалъэхэу ищыкIагъэхэр аIэкIэлъых. «Джы Iоф пшIэщтмэ, пIэлъэ шIагъу, сымаджэхэм яIофыгъохэр зэшIотэхых унэм ифэIо-фашIэхэм язехьан тимыгъэохъоу», — къы­хегъэщы Галина Ростовцевам.

Джырэ уахътэм Джэджэ районым кIэлэцIыкIухэм зыщяIэзэщтхэ амбулаторие щашIы Адыгэ Республикэм псауныгъэм икъэухъумэнкIэ апэ зэуалIэхэрэ IэзапIэхэр лъэхъаным диштэхэу гъэпсыгъэнхэмкIэ ишъолъыр Программэ къыдыхэлъытагъэу. Ащ бэшIагъэ зегъэушъомбгъугъэн ыкIи иIофшIэн хэгъэхъо­гъэн зыфэягъэр.

АР-м псауныгъэр къэухъумэгъэнымкIэ и Министерствэ ипресс-къулыкъу къызэритырэмкIэ, IэзэпIакIэу квадратнэ метрэ 424-рэ зиинэгъэщтым кIэлэцIыкIухэм зыщяIэзэщтхэ участки 6 хэтыщт, сабыйхэу къеуалIэхэ­рэмкIи, Iоф щызышIэхэрэмкIи Iэрыфэгъущт, аужырэ шапхъэ­хэм адиштэщт. Джырэ уахътэм дэпкъхэр, унэ кIоцIхэр зэтезыутыщтхэр къыдащэегъахэх, Джэджэ район гупчэ сымэджэщым къыпэIулъ чIыналъэр зыгъэпсэфыпIэхэр къыдыхэлъытагъэу зэтырагъэпсыхьэ. Псэолъэ­шIыным мылъкоу зэкIэмкIи къыдэлъытагъэр сомэ миллион 29,9-рэ.

«КIэлэцIыкIу IэзапIэм ишIын мэхьанэшхо зиIэ ыкIи бэрэ тызэжэгъэ Iоф», — еIо Джэджэ район гупчэ сымэджэщым иврач шъхьаIэу Наталья Бурмистровам.

Мы илъэсым ыкIэ нэс Iоф­шIэнхэр аухынхэу агъэнафэ.

ИкIыгъэ илъэсым къыкIоцI Красногвардейскэ гупчэ сымэ­джэщми итеплъэ зызэрихъо­кIыгъ. Псауныгъэм икъэухъумэн­кIэ апэ зэуалIэхэрэ IэзапIэхэр гъэкIэжьыгъэнхэмкIэ шъолъыр Программэм къыдыхэлъытагъэу Iофхэм язэшIохын лъагъэкIуатэ – хирургическэ корпусым гъэцэкIэжьын куухэр щэкIох, сымэ­джэщым къыпэIулъ чIыналъэр зэтырагъэпсыхьэ.

«Тикъоджэ псэупIэ дэсхэмкIэ мэхьанэшхо зиIэ Iофыгъу зэшIотхырэр. Красногвардейскэ сымэджэщым епхыгъэ амбулаторие ыкIи фельдшер-мамыку IэзэпIэ 26-мэ нэбгырэ мин 24-м ехъу къякIуалIэ», — къыхигъэщыгъ сымэджэщым иврач шъхьа­Iэу Сергей Василенкэм.

Къыхэгъэщыгъэн фае, сымэ­джэщыр зычIэт унэр 1931-рэ илъэсым ашIыгъагъ ыкIи итеплъэ дэй дэдагъ. ГъэцэкIэжьын ку­ухэм апэIуагъэхьанэу сомэ миллион 43-м нахьыбэ афатIупщыгъ.

Джырэ уахътэм ехъулIэу дэпкъхэр фэбэнхэм иамалхэр зэрахьэх, унашъхьэр зэбла­хъугъ. Унэ кIыб дэпкъхэм ягъэфэбэн ыкIи ятеплъэ нахьышIу шIыгъэным тегъэпсыхьэгъэ IофшIэнхэр аухыгъэх. Псым икъещэлIэн, изэбгырыщын зэшIозыхыхэрэ, унэр къэзыгъэфэбэщт псэуалъэ­хэр зэблахъугъэх, жьы къабзэр къызэрихьащт ыкIи шIоир зэрикIыщтхэри хагъэуцуагъэх. Ащ ишIуагъэкIэ палатэхэм температурэу арытын фаем къыфэкIощтых, къяуалIэхэрэмкIи Iэрыфэгъущтых. Инженернэ псэолъэ пстэури зэблахъугъ, палатэхэм азыфагу итыгъэхэ дэпкъхэр Iуахыхи, нахь Iэрыфэгъу зэрэ­хъущтхэм тетэу икIэрыкIэу зэтыраутыжьыгъэх. Штукатурнэ IофшIэнхэр процент 95-м нэсэу аухыгъэх, унэ кIыбыр агъапкIэ. Мы илъэсым ыкIэ нэс IофшIэнхэр аухынхэу агъэнафэ.

Адыгеим псауныгъэм икъэу­хъумэнкIэ апэ зэуалIэхэрэ IэзапIэхэр лъэхъаным диштэхэу гъэпсыгъэнхэмкIэ ишъолъыр Программэ къыдыхэлъытагъэу псэолъи 4 кIэу республикэм джырэ уахътэм щашIы, 2-мэ гъэцэкIэжьын куухэр ащызэшIуа­хых.

Къэбарыр хэутыным къыфэзыгъэхьазырыгъэр МэщлIэкъо Саид.