Роспотребнадзорым Адыгэ РеспубликэмкIэ и ГъэIорышIапIэ къызэрэщаIуагъэмкIэ, 2021-рэ илъэсым гъэмэфэ псауныгъэр зыщагъэпытэрэ учреждение 95-мэ Iоф ашIагъ. Ахэм ащыщэу 91-р гурыт еджапIэхэм къащызэIуахыгъэх, ахэм мафэрэ зыныбжь имыкъугъэхэр аштагъэх. Джащ фэдэу илъэсым къыкIоцI зэпымыоу Iоф зышIэрэ учреждениищмэ ыкIи зы санаторие кIэлэцIыкIухэм защагъэпсэфын амал яIагъ.

— 2021-рэ илъэсым игъэмэфэ кампание республикэм щыпсэурэ кIэлэцIыкIу 7216-мэ загъэпсэфыгъ ыкIи япсауныгъэ агъэпытагъ. Шолъырым зи икIыгъэп, — къыщаIуагъ ГъэIорышIапIэм.

Зэфэхьысыжьхэм къызэрагъэлъэгъуагъэмкIэ, зызгъэпсэфыгъэхэм япроцент 96,1-мэ япсауныгъэ агъэпытэнымкIэ гъэмэфэ кампанием ишIуагъэ къэкIуагъ, проценти 3,6-м — макIэу, процент 0,3-мэ алъэныкъокIэ зи шIуагъэ къытыгъэп.