Оперативнэ штабым къытыгъэ къэбарымкIэ, Iоныгъо мазэм и 11-м къыщыублагъэу тыгъосэ пчэдыжьым нэс пчэдыжьым сыхьатыр 10-м ехъулIэу Адыге­им зэпахырэ узхэмкIэ исымэджэщхэм нэбгырэ 18-мэ ящыIэныгъэ щызэпыугъ. Апэрэ мэфищым — нэбгырэ плIырыплIэу, ащ аужырэ мэфитIум — щырыщэу.

Тыгъуасэ пчэдыжьым сыхьатыр 10-м ехъулIэу къаIэкIэхьэгъэ къэбарымкIэ, нэбгырищэу уз щынагъоу Ковидым илIыкIыгъэ зы хъулъфыгъэмрэ бзылъфыгъитIумрэ Мыекъуапэ щыщых.

Iоныгъом и 15-м ехъулIэу зэпахырэ узэу коронавирусыр Адыгеим щыпсэурэ нэбгырэ 18936-мэ къахагъэщыгъ.

Ахэм ащыщэу нэбгырэ 1783-мэ яIазэх (чэщ-зымафэм къыхэхъуагъэр нэбгырэ 51-рэ), хъужьыгъэр нэбгырэ 16761-рэ (чэщ-зымафэм хэхъуагъэр 48-рэ), зидунай зыхъожьыгъэр — 386-рэ (чэщ-зымафэм нэбгыри 3 хэхъуагъ).

Нэбгырэ 18936-р республикэм имуниципальнэ псэупIэхэм атегощагъэу:

— Мыекъуапэ — 7579-рэ; — Тэхъутэмыкъое районыр — 2825-рэ; — Мыекъопэ районыр — 2434-рэ; — Красногвардейскэ районыр — 1361-рэ; — Кощхьэблэ районыр — 1256-рэ; — Джэджэ районыр — 1034-рэ; — Теуцожь районыр — 933-рэ; — Адыгэкъалэ — 841-рэ; — Шэуджэн районыр — 673-рэ.

Узыр къыппыхьагъэми, ар нахь псынкIэу ппэкIэкIыным, реанимацием Iофыр нимыгъэсынымкIэ зишIуа­гъэ къэкIо закъоу джырэ уахътэм щыIэр вакцинэр арэу медицинэм иIофышIэхэм къыхагъэщы. Ар зызщыхяжъугъэлъхьан шъулъэкIыщт чIыпIэ 30-м ехъу Адыгеим щызэIухыгъ, сыд фэдэрэм шъуекIолIагъэми, прививкэр зыхяжъугъэлъхьан шъулъэкIыщт.